ନୂଆଦିଲ୍ଲୀ, ୧୨ ଅଗଷ୍ଟ (ହି.ସ.)- ବିହାରରେ ଭୋଟର ତାଲିକାର ସ୍ୱତନ୍ତ୍ର ସଘନ ସଂଶୋଧନ (ଏସଆଇଆର) ଏବଂ ସାମ୍ପ୍ରତିକ ନିର୍ବାଚନରେ ଭୋଟ ଚୋରି ଅଭିଯୋଗକୁ ନେଇ ରାଜ୍ୟସଭାରେ ବିରୋଧୀ ଦଳ ଉପନେତା ପ୍ରମୋଦ ତିୱାରୀ ସରକାର ଏବଂ ନିର୍ବାଚନ କମିଶନଙ୍କୁ ଟାର୍ଗେଟ୍ କରିଛନ୍ତି । ସେ ନିର୍ବାଚନ କମିଶନଙ୍କୁ ନିରପେକ୍ଷ ରହିବା ଏବଂ ଭୋଟର ତାଲିକାରେ ଅନିୟମିତତାର ସ୍ୱାଧୀନ ଭାବେ ତଦନ୍ତ କରିବାକୁ ଦାବି କରିଛନ୍ତି ।
ପ୍ରମୋଦ ତିୱାରୀ ଏଠାରେ ସାମ୍ବାଦିକମାନଙ୍କୁ କହିଛନ୍ତି ଯେ, ଏହା ଏକ ରାଜନୈତିକ ପ୍ରସଙ୍ଗ ନୁହେଁ, ବରଂ ଏହା ସମ୍ବିଧାନ ଦ୍ୱାରା ଭାରତର ପ୍ରତ୍ୟେକ ନାଗରିକଙ୍କୁ ଦିଆଯାଇଥିବା ସର୍ବବୃହତ ଅଧିକାର, ଅର୍ଥାତ୍ ଭୋଟ୍ ଦେବାର ଅଧିକାରକୁ ସୁରକ୍ଷା ଦେବାର ବିଷୟ । ସେ କହିଛନ୍ତି ଯେ, ଦେଶର ଇତିହାସରେ ପ୍ରଥମ ଥର ପାଇଁ ୩୦୦ ରୁ ଅଧିକ ସାଂସଦ ରାସ୍ତାକୁ ଓହ୍ଲାଇଥିଲେ, ଯାହାଦ୍ୱାରା ସେମାନେ ନିର୍ବାଚନ କମିଶନଙ୍କୁ ଏହା ଅପିଲ୍ କରିପାରିବେ ଯେ, ଲୋକଙ୍କ ଭୋଟ୍ ଦେବାର ଅଧିକାର ଛଡ଼ାଇ ନିଆନଯାଉ । ସେ କହିଛନ୍ତି ଯେ ବିରୋଧୀ ସାଂସଦମାନେ ଶାନ୍ତିପୂର୍ଣ୍ଣ ଭାବରେ ପ୍ରତିବାଦ କରିବାକୁ ଚାହୁଁଥିଲେ, କିନ୍ତୁ ସରକାର ସେମାନଙ୍କୁ ଅଟକାଇବା ପାଇଁ ବ୍ୟାରିକେଡ୍ ଲଗାଇ ସେମାନଙ୍କୁ ହେପାଜତକୁ ନେଇଥିଲା । ଅନେକ ସାଂସଦଙ୍କୁ ପୋଲିସ ଷ୍ଟେସନକୁ ନିଆଯାଇଥିଲା, ଯାହା ସ୍ପଷ୍ଟ କରେ ଯେ ଗଣତାନ୍ତ୍ରିକ ମୂଲ୍ୟବୋଧକୁ ଦମନ କରିବାକୁ ଚେଷ୍ଟା କରାଯାଉଛି ।
ହିନ୍ଦୁସ୍ଥାନ ସମାଚାର / ପ୍ରଦୀପ୍ତ