କେନ୍ଦୁଝର, 15 ଅଗଷ୍ଟ (ହି.ସ.)

କେନ୍ଦୁଝର ଜିଲ୍ଲା ହରିଚନ୍ଦନପୁର ବ୍ଲକ ଜଙ୍ଘିରା ସରସ୍ବତୀ ଶିଶୁ ବିଦ୍ୟା ମନ୍ଦିର ପ୍ରାଙ୍ଗଣରେ ଶ୍ରୀକୃଷ୍ଣ ଜନ୍ମାଷ୍ଟମୀ ଉତ୍ସବ ମହାଆଡମ୍ବରରେ ପାଳିତ ହୋଇଯାଇଛି। ମୁଖ୍ୟ ଅତିଥି ଭାବେ ପଣ୍ଡାପଡା ଥାନା ଭାରପ୍ରାପ୍ତ ଥାନା ଅଧିକାରୀ ଲକ୍ଷୀକାନ୍ତ ପ୍ରଧାନ ଓ ମୁଖ୍ୟ ବକ୍ତା ଭାବେ ସୁନାମଧନ୍ୟ ପାଲାଗାୟକ ନାରାୟଣ ଶତପଥି ଯୋଗଦେଇ ଶ୍ରୀକୃଷ୍ଣ ଜନ୍ମାଷ୍ଟମୀ ପାଳନର ମହତ୍ୱ ବିଷୟରେ ଶିଶୁ ମାନଙ୍କ ଉଦ୍ଦେଶ୍ୟରେ ଉଦବୋଧନ ପ୍ରଦାନ କରିଥିଲେ। ରାହାସ ମନ୍ଦିର ଦର୍ଶନ କରିବା ସହିତ ଅତିଥିଙ୍କ ଗହଣରେ ଦଧିହାଣ୍ଡି ଭଙ୍ଗା ଓ କୁନି କୁନି ପିଲାଙ୍କ ଦ୍ୱାରା ଧୂନ୍ କୀର୍ତ୍ତନ ପରିବେଷଣ କରାଯାଇଥିଲା। ଜଙ୍ଘିରା ସରସ୍ଵତୀ ଶିଶୁ ବିଦ୍ୟା ମନ୍ଦିରର ୮୦ ଜଣ କୁନି କୁନି ଭାଇ ଭଉଣୀ କୃଷ୍ଣ ବେଶ ପରିଧାନ କରିଥିଲେ । କୃଷ୍ଣ ବେଶରେ ଉପସ୍ଥିତରେ ଏକ ବର୍ଣ୍ଣାଜ୍ୟ ପରିବେଶ ସୃଷ୍ଟି ହୋଇଥିଲା। ପବିତ୍ର ବାତାବରଣ ମଧ୍ଯରେ ସମସ୍ତ କାର୍ଯ୍ୟ ସଂପାଦିତ ହୋଇଥିଲା। ଉକ୍ତ କାର୍ଯ୍ୟକ୍ରମରେ ଛାତ୍ରଛାତ୍ରୀ,ଅଭିଭାବକ ଏବଂ ସମସ୍ତ ଗୁରୁଜୀ,ଗୁରୁମା, ସେବକ,ସେବିକା ଓ ପରିଚାଳନା କମିଟିର ସମସ୍ତ ସଦସ୍ୟ ସଦସ୍ୟା ଉପସ୍ଥିତ ରହି କାର୍ଯ୍ୟକ୍ରମ ପରିଚାଳନା କରିଥିଲେ ।

ହିନ୍ଦୁସ୍ଥାନ ସମାଚାର / SANTOSH KUMAR MOHAPATRA