ଭୁବନେଶ୍ଵର, 05 ଅଗଷ୍ଟ (ହି.ସ.) : କର୍ମଚାରୀ ରାଜ୍ୟ ବୀମା ନିଗମ ଆଞ୍ଚଳିକ କାର୍ଯ୍ୟାଳୟ ଭୁବନେଶ୍ୱର, ଆଜି ସ୍ପ୍ରି ୨୦୨୫ (ନିଯୁକ୍ତିଦାତା/କର୍ମଚାରୀଙ୍କ ପଞ୍ଜିକରଣକୁ ପ୍ରୋତ୍ସାହିତ କରିବା ଯୋଜନା) ଏବଂ ଆମନ୍ସେଷ୍ଟି ଯୋଜନା-2025 ବିଷୟରେ ହିତାଧିକାରୀମାନଙ୍କୁ ସୂଚନା ଦେବା ପାଇଁ ଏକ ସଚେତନତା କାର୍ଯ୍ୟକ୍ରମ ସଫଳତାର ସହ ଆୟୋଜନ କରିଛି। ଯାହାକୁ ସମ୍ପ୍ରତି ହିମାଚଳ ପ୍ରଦେଶର ସିମଲାରେ କେନ୍ଦ୍ର ଶ୍ରମ ଓ ନିଯୁକ୍ତି ଏବଂ ଯୁବ ବ୍ୟାପାର ଓ କ୍ରୀଡା ମନ୍ତ୍ରୀ ଡକ୍ଟର ମନସୁଖ ମାଣ୍ଡଭିୟଙ୍କ ଅଧ୍ୟକ୍ଷତାରେ ଅନୁଷ୍ଠିତ 196ତମ ଇଏସ୍ଆଇସି ବୈଠକରେ ଅନୁମୋଦନ କରାଯାଇଛି।
ଆଞ୍ଚଳିକ କାର୍ଯ୍ୟାଳୟରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ପୂର୍ବ ଏବଂ ଉତ୍ତର ପୂର୍ବ କ୍ଷେତ୍ରର ବୀମା କମିଶନର ଶ୍ରୀ ପ୍ରଣୟ ସିହ୍ନା ଅଧ୍ୟକ୍ଷତା କରିଥିଲେ ଏବଂ ଏଥିରେ ବିଭିନ୍ନ ଶିଳ୍ପ ସଂଘ, ନିଯୁକ୍ତିଦାତା ଏବଂ ଅଞ୍ଚଳର ଅନ୍ୟାନ୍ୟ ଅଂଶୀଦାରମାନଙ୍କର ପ୍ରତିନିଧିମାନେ ଯୋଗ ଦେଇଥିଲେ।
ଶ୍ରୀ ସିହ୍ନା ଏହି ଦୁଇଟି ଯୋଜନାର ମୁଖ୍ୟ ବିଶେଷତା ଓ ଲାଭ ସମ୍ପର୍କରେ ଆଲୋକପାତ କରିଥିଲେ। ସ୍ପ୍ରି ୨୦୨୫ ଯୋଜନା ଏକ ସମୟ ସୀମିତ ସୁଯୋଗ ପ୍ରଦାନ କରୁଛି, ଯାହାର ମାଧ୍ୟମରେ ଅପରିଚ୍ଛଦ୍ଧ ନିୟୋଜକ ଓ କର୍ମଚାରୀମାନେ ପଞ୍ଜିକୃତ ହେବା ପାଇଁ ଅବସର ପାଇପାରିବେ। ଏଥିରେ କୌଣସି ଅର୍ଥଦଣ୍ଡ ଲାଗୁ ହେବ ନାହିଁ, ପୂର୍ବତନ ଅବଧି ପାଇଁ କୌଣସି ବକାୟା ଦାବି କରାଯିବ ନାହିଁ, ଓ ଆସନ୍ତା ଏକ ବର୍ଷ ପର୍ଯ୍ୟନ୍ତ ନିରୀକ୍ଷଣ ମୁକ୍ତ ରହିବେ। ଏହି ଯୋଜନା ୧ ଜୁଲାଇ ରୁ ୩୧ ଡିସେମ୍ବର ୨୦୨୫ ପର୍ଯ୍ୟନ୍ତ ଖୋଲା ରହିବ, ଯାହା ଅନିବନ୍ଧିତ ନିୟୋଜକ ଓ ବଞ୍ଚିତ କର୍ମଚାରୀମାନେ–ଯଥା ଠିକାଦାର ଓ ଅସ୍ଥାୟୀ କର୍ମଚାରୀମାନେ– ଇଏସ୍ଆଇ ଆଇନ ଅନ୍ତର୍ଗତ ଅନୁସୂଚୀତ ହେବାକୁ ଏକ ଅନନ୍ୟ ସୁଯୋଗ ମିଳିବ। ଏହି ଅବଧିରେ ପଞ୍ଜିକୃତ ହେଉଥିବା ନିୟୋଜକମାନେ ପଞ୍ଜିକରଣ ତାରିଖ ରୁ ବା ତାଙ୍କ ଦ୍ୱାରା ଘୋଷିତ ତାରିଖ ରୁ କଭର୍ ହେବେ, ଯେଉଁଥିରେ ନୂତନ କର୍ମଚାରୀମାନେ ତାଙ୍କ ପଞ୍ଜିକରଣ ତାରିଖ ରୁ ଅନୁସୂଚୀତ ହେବେ।
ସେ ଆହୁରି କହିଛନ୍ତି ଯେ ଇଏସ୍ଆଇସି ର ଆମନ୍ସେଷ୍ଟି ଯୋଜନା-2025, 1 ଅକ୍ଟୋବର 2025 ରୁ 30 ସେପ୍ଟେମ୍ବର 2026 ପର୍ଯ୍ୟନ୍ତ ଏକକାଳୀନ ବିବାଦ ସମାଧାନ ୱିଣ୍ଡୋ ପ୍ରଦାନ କରୁଛି ଯାହା ଦ୍ୱାରା ଦୀର୍ଘଦିନ ଧରି ପଡ଼ି ରହିଥିବା ଇଏସ୍ଆଇସି ମାମଲାଗୁଡ଼ିକର ସମାଧାନ, ମକଦ୍ଦମା ହ୍ରାସ ଏବଂ ନିଯୁକ୍ତିଦାତାମାନଙ୍କୁ ପାରସ୍ପରିକ ସମାଧାନ ପାଇଁ ଆଗକୁ ଆସିବାର ସୁଯୋଗ ମିଳିବ। ସେ ସମସ୍ତ ଯୋଗ୍ୟ ଉଦ୍ୟୋଗ ଏବଂ ଶ୍ରମିକଙ୍କୁ ଏହି ପଦକ୍ଷେପଗୁଡ଼ିକର ସୁଯୋଗ ନେବାକୁ ଅନୁରୋଧ କରିଥିଲେ, ଯାହାର ଲକ୍ଷ୍ୟ ପଞ୍ଜୀକରଣ ପ୍ରକ୍ରିୟାକୁ ସରଳ କରିବା ଏବଂ ସ୍ୱେଚ୍ଛାକୃତ ଅନୁପାଳନକୁ ପ୍ରୋତ୍ସାହିତ କରିବା।
ଆଞ୍ଚଳିକ ନିର୍ଦ୍ଦେଶକ ଶ୍ରୀ ରୁଦ୍ରଦୀପ ଦତ୍ତ ମଧ୍ୟ ଅଂଶଗ୍ରହଣକାରୀମାନଙ୍କୁ ସମ୍ବୋଧିତ କରିଥିଲେ, ଇଏସ୍ଆଇ ଯୋଜନା ଅଧୀନରେ ପ୍ରଦାନ କରାଯାଉଥିବା ବିଭିନ୍ନ ସୁବିଧାର ଏକ ବିସ୍ତୃତ ସାରାଂଶ ପ୍ରଦାନ କରିଥିଲେ। ସେ ଶ୍ରମିକମାନଙ୍କ ପାଇଁ ସାମାଜିକ ସୁରକ୍ଷାର ଗୁରୁତ୍ୱ ଉପରେ ଗୁରୁତ୍ୱାରୋପ କରିଥିଲେ ଏବଂ ସମସ୍ତ ନିଯୁକ୍ତିଦାତାଙ୍କୁ ସେମାନଙ୍କର କର୍ମଚାରୀମାନଙ୍କୁ ବ୍ୟାପକ ଚିକିତ୍ସା ସେବା ଏବଂ ଅନ୍ୟାନ୍ୟ ସୁବିଧା ପାଇବା ପାଇଁ ଇଏସ୍ଆଇ ନେଟୱର୍କ ରେ ଅନ୍ତର୍ଭୁକ୍ତ କରିବାକୁ ଉତ୍ସାହିତ କରିଥିଲେ।
ଏହି ସଚେତନତା କାର୍ଯ୍ୟକ୍ରମ ସାମାଜିକ ସୁରକ୍ଷା କଭରେଜକୁ ବୃଦ୍ଧି କରିବା ଏବଂ ଇଏସ୍ଆଇ ନିୟମାବଳୀର ଅନୁପାଳନ ସୁନିଶ୍ଚିତ କରିବା ପାଇଁ ଇଏସ୍ଆଇସି ର ଚାଲିଥିବା ପ୍ରୟାସର ଏକ ଅଂଶ ଥିଲା। ଏହି ପାରସ୍ପରିକ ଆଲୋଚନା ଅଧିବେଶନ ଅଂଶଗ୍ରହଣକାରୀମାନଙ୍କୁ ସେମାନଙ୍କର ସନ୍ଦେହକୁ ଦୂର କରିବା ଏବଂ ଯୋଜନା ଏବଂ ସେଗୁଡ଼ିକର କାର୍ଯ୍ୟାନ୍ୱୟନ ବିଷୟରେ ଭଲ ଭାବରେ ବୁଝିବା ପାଇଁ ଏକ ମଞ୍ଚ ପ୍ରଦାନ କରିଥିଲା।
---------------
ହିନ୍ଦୁସ୍ଥାନ ସମାଚାର / ସମନ୍ୱୟ
