ଜୟପୁର, ୨୨ ସେପ୍ଟେମ୍ବର (ହି.ସ.)- ଆଠ ଦଫା ଦାବି ନେଇ ଜୟପୁର ଠାରେ କମ୍ୟୁନିଟି ସପୋର୍ଟ ଷ୍ଟାଫଙ୍କ ଧାରଣା l ବ୍ଲକ କାର୍ଯ୍ୟାଳୟ ସମ୍ମୁଖରେ ଧାରଣରେ ବସିବା ସହ ମିଶନ ଶକ୍ତି କାର୍ଯ୍ୟାଳୟରେ ତାଲା ମାରି ଧାରଣରେ ବସି ବିକ୍ଷୋଭ କରିଥିଲେ l

ଛଅ ମାସ ହେଲା ଦରମା ମିଳୁନାହିଁ ଦୁର୍ଦ୍ଦିନ ଭିତରେ ପରିବାର । ପାର୍ବଣ ଋତୁରେ ବି ଦରମା ଦିଆଯାଉ ନାହିଁ । ହାଡ଼ଭଙ୍ଗା କାମ ସତ୍ତ୍ବେ ମିଳୁନି ସଠିକ ପାରିଶ୍ରମିକ । ପ୍ରତିବାଦରେ ଆଜି ସାରା ରାଜ୍ୟର କମ୍ୟୁନିଟି ସପୋର୍ଟ ଷ୍ଟାଫ୍ ଆନ୍ଦୋଳନ ଜାରି ରଖିଥିବା ବେଳେ ଏହାର ପ୍ରଭାବ ଜୟପୁରରେ ମଧ୍ୟ ଦେଖିବାକୁ ମିଳିଛି । ଜୟପୁର ଠାରେ ସିଆରପି, ଏମବିକେ, ବ୍ୟାଙ୍କ ମିତ୍ର ମାନେ ଧାରଣାରେ ବସିଛନ୍ତି l ଆଜି କୋରାପୁଟ ଜିଲ୍ଲାର ଶହ ଶହ ସିଆରପି, ଏମବି କେ ବ୍ୟାଙ୍କ ମିତ୍ର ନିଜ ନିଜ ବ୍ଲକ ଜୀବିକା ମିଶନ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇ ଜୋରଦାର ପ୍ରତିବାଦ କରିଛନ୍ତି । ଦକ୍ଷତା ଭିତିକ ନୁହେଁ, ଫିକ୍ସ ଦରମା ଦେବାକୁ ଦାବି I ୨୦୦୯ ମସିହାରୁ ରାଜ୍ୟର ବିଭିନ୍ନ ଜିଲ୍ଲାରୁ ପଞ୍ଚାୟତ ଅଫିସ ପର୍ଯ୍ୟନ୍ତ ଏମାନେ କାର୍ଯ୍ୟରତ ଥିବାବେଳେ ଏବେ ଅଣଦେଖା କରାଯାଉଥିବା ଅଭିଯୋଗ କରିଛି ସଂଘ । ଏମବିକେ, ସିଆରପି, ବ୍ୟାଙ୍କ ମିତ୍ର, କୃଷି ମିତ୍ର, ଛଅ ମାସ ହେଲା ପାଇ ନାହାନ୍ତି ଦରମା । ପୂର୍ବ ସରକାର ସମୟରେ ମିଳୁଥିବା ଫିକ୍ସ ଦରମାକୁ ଅପସାରଣ କରି ଦକ୍ଷତା ଭିତିକ ପାରିଶ୍ରମିକ ଦେବାକୁ ସରକାର ନିଷ୍ପତ୍ତି ନେଇଛନ୍ତି । ରାଜ୍ୟ ସରକାରଙ୍କ ସମସ୍ତ ଲୋକାଭିମୁଖି ଯୋଜନାକୁ ଲୋକଙ୍କ ପାଖରେ ପହଞ୍ଚାଇବା ପାଇଁ ଗୁରୁ ଦାୟିତ୍ଵ ବହନ କରୁଛନ୍ତି । ସାରା ରାଜ୍ୟରେ ୬୦ ହଜାରରୁ ଅଧିକ ମହିଳା କାର୍ଯ୍ୟରତ ଅଛନ୍ତି । ବିନା ଦରମାରେ ଛଅ ମାସ ହେଲା ସେମାନେ ଦୟନୀୟ ସ୍ଥିତିରେ ଥିବା ଅଭିଯୋଗ କରିଛନ୍ତି । ଦାବୀ ପୂରଣ ନହେବା ଯାଏଁ ଅନିର୍ଦ୍ଦିଷ୍ଟ କାଳ ଯାଏଁ ଧାରଣାରୁ ହଟିବୁନି ବୋଲି ଚେତାବନୀ ଦେଇଛନ୍ତି ବିକ୍ଷୋଭକାରୀ l ଜୟପୁର ବ୍ଲକ ର କାର୍ଯ୍ୟରତ କର୍ମଚାରୀ ମାନେ ଦୁଇ ଭାଗ ହୋଇ ଆନ୍ଦୋଳନ ଜାରି ରଖିଛନ୍ତି l ଦାବି ପୂରଣ ନହେବା ଯାଏଁ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ଧାରଣା ଜାରି ରହିବ ବୋଲି ସୂଚନା ଦିଆଯାଇଛି l

ହିନ୍ଦୁସ୍ଥାନ ସମାଚାର / ପିକେପି