ପଂଚାୟତିରାଜ ବ୍ୟବସ୍ଥାରେ ଲୋକପ୍ରତିନିଧିଙ୍କ କ୍ଷମତା ସଂକୁଚିତ କରାଯିବା ପ୍ରସଙ୍ଗକୁ ନେଇ ବିଜେଡି ବିଧାୟକଙ୍କ ହଟ୍ଟଗୋଳ

କଂଗ୍ରେସ ବିଧାୟକ ମାନେ କହିଲେ ବିଜେପି- ବିଜେଡି ଭାଇ ଭାଇ

ଚାଲି ପାରିଲା ନାହିଁ ପ୍ରଶ୍ନକାଳ ଓ ଶୂନ୍ୟକାଳ

ଅପରାହ୍ନ 4ଟା ଯାଏ ଗୃହ ମୁଲତବୀ

ଭୁବନେଶ୍ୱର, 22 ସେପ୍ଚେମ୍ବର (ହି.ସ.) । ଆଜି ବିଧାନସଭାର ମୌସୁମୀ ଅଧିବେଶନର ଚତୁର୍ଥ ଦିନରେ ପଂଚାୟତିରାଜ ବ୍ୟବସ୍ଥାରେ ଲୋକପ୍ରତିନିଧିଙ୍କ କ୍ଷମତା ସଂକୁଚିତ କରାଯିବା ପ୍ରସଙ୍ଗକୁ ନେଇ ନାରାବାଜୀ ଓ ହଟ୍ଟଗୋଳ କରିଛନ୍ତି । ଶୁକ୍ରବାର ଓ ଶନିବାର ଦିନ ଏହି ଚାଷୀ ସମସ୍ୟା ଓ ସାରର ଅଭାବ ପ୍ରସଙ୍ଗରେ ବିଜେଡି ବିଧାୟକ ମାନେ ହଟ୍ଟଗୋଳ କରିଥିବାରୁ ଗୃହରେ କୌଣସି କାମ ହୋଇ ପାରି ନ ଥିଲା । ତେବେ ଆଜି ଏକ ଭିନ୍ନ ପ୍ରସଙ୍ଗ ପଂଚାୟତିରାଜ ବ୍ୟବସ୍ଥାରେ ଲୋକପ୍ରତିନିଧିଙ୍କ କ୍ଷମତା ସଂକୁଚିତ କରାଯିବା ପ୍ରସଙ୍ଗକୁ ନେଇ ଆଜି ମଧ୍ୟ ପ୍ରଥମାର୍ଧ ବୈଠକ ହୋଇ ପାରି ନ ଥିଲା । ଅନ୍ୟ ପକ୍ଷରେ କଂଗ୍ରେସ ବିଧାୟକ ମାନେ ତାଙ୍କ ଆସନରେ ଠିଆ ହୋଇ ବିଜେପି – ବିଜେଡି ଭାଇ ଭାଇ ଲେଖାଥିବା ପ୍ଲାକାର୍ଡ ମାନ ଧରି ଠିଆ ହୋଇଥିଲେ । ହଟ୍ଟଗୋଳ କାରଣରୁ ବାଚସ୍ପତି ସୁରମା ପାଢୀ ଗୃହକୁ ଅପରାହ୍ନ 4ଟା ଯାଏ ମୁଲତବୀ ଘୋଷଣା କରିଥିଲେ । ଏହି କାରଣରୁ ଆଜି ପ୍ରଶ୍ନକାଳ, ଶୂନ୍ୟ କାଳ ଓ ଅନ୍ୟ ନିର୍ଧାରିତ କାର୍ଯ୍ୟକ୍ରମ ହୋଇ ପାରି ନ ଥିଲା ।

ଆଜି ନିର୍ଧାରିତ 10.30 ମିନିଟରେ ଗୃହ କାର୍ଯ୍ୟ ଆରମ୍ଭ ହୋଇଥିଲା । ପ୍ରଥମେ ବିଧାନସଭା ବାଚସ୍ପତି ସୁରମା ପାଢୀ ପ୍ରଶ୍ନକାଳ କାର୍ଯ୍ୟକ୍ରମ ଆରମ୍ଭ କରିଥିଲେ । ବଡସାହୀ ବିଧାୟକ ସନାତନ ବିଜୁଳିଙ୍କ ମୟୁରଭଂଜ ଜିଲ୍ଲାରେ ଫାଂଡି ଖୋଲା ଯିବା ସମ୍ପର୍କରେ ସ୍ବରାଷ୍ଟ୍ର ବିଭାଗର ଏକ ପ୍ରଶ୍ନ ପାଇଣଁ ମୁଖ୍ୟମନ୍ତ୍ରୀଙ୍କ ପକ୍ଷରୁ ଉତର ଦେବାକୁ ଦେବାକୁ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନଙ୍କୁ ଡାକିଥିଲେ । ମନ୍ତ୍ରୀ ଶ୍ରୀ ହରିଚନ୍ଦନ ମଧ୍ୟ ତାଙ୍କ ଉତ୍ତର ପଢିବା ଆରମ୍ଭ କରିଥିଲେ । ତେବେ ବିରୋଧୀ ଦଳ ବିଜେଡିର ବିଧାୟକ ମାନେ ପଂଚାୟତିରାଜ ବ୍ୟବସ୍ଥାରେ ଲୋକପ୍ରତିନିଧିଙ୍କ କ୍ଷମତା ସଂକୁଚିତ କରାଯିବା ପ୍ରସଙ୍ଗକୁ ନେଇ । ସେମାନେ ହାତରେ ବ୍ୟାନର, ପ୍ଲାକାର୍ଡ ମାନ ଧରି ବିଜେପି ସରକାର ବିରୁଦ୍ଧରେ ନାରାବାଜୀ କରିବା ସହ ଗୃହର ମଧ୍ୟ ଭାଗକୁ ଚାଲି ଆସିଥିଲେ । ବିଜେଡି ବିଧାୟକ ମାନେ ନାରାବାଜୀ କରି କହିଥିଲେ ଯେ ପଂଚାୟତିରାଜ ବ୍ୟବସ୍ଥାକୁ ଦୁର୍ବଳ କରି ରାଜ୍ୟ ସରକାର ବ୍ୟୁରୋକ୍ରୋଟ ମାନଙ୍କୁ ଅଧିକ କ୍ଷମତା ଦେବା ସହ ଜନ ପ୍ରତିନିଧି ମାନଙ୍କର କ୍ଷମତାକୁ ସଂକୁଚିତ କରିଛନ୍ତି । ଏହାକୁ କଦାପି ସହନ କରାଯିବ ନାହିଁ ବୋଲି ସେମାନେ ଲଗାତାର ନାରାବାଜୀ କରିବା ଦେଖିବାକୁ ମିଳିଥିଲା ।

ସେହି ସମୟରେ ଅନ୍ୟତମ ବିରୋଧୀ କଂଗ୍ରେସ ଦଳର ବିଧାୟକ ମାନେ ସେମାନଙ୍କ ହାତରେ ପ୍ଲାକାର୍ଡ ଧରି ଠିଆ ହୋଇଥିଲେ । ‘ବିଜେପି- ବିଜେଡି ଭାଇ ଭାଇ – ଅନାସ୍ଥା ପ୍ରସ୍ତାବ ଆଣନ୍ତି’ ନାହିଁ ବୋଲି ଏହି ପ୍ଲାକାର୍ଡରେ ଲେଖା ଯାଇଥିଲା

ଧୀରେ ଧୀରେ ବିଜେଡି ବିଧାୟକ ମାନେ ନାରାବାଜୀକୁ ଜୋରଦାର କରିଥିଲେ । ବାଚସ୍ପତି ସୁରମା ପାଢୀ ହଟ୍ଟଗୋଳ କରୁଥିବା ବିଧାୟକ ମାନଙ୍କୁ ବାରମ୍ବାର ସେମାନଙ୍କ ଆସନକୁ ଯିବାକୁ କହିବା ସହ ପ୍ରଶ୍ନକାଳ କାର୍ଯକ୍ରମ ଚଳାଇବାକୁ ସହଯୋଗ କରିବାକୁ ଅନୁରୋଧ କରିବାକୁ ଦେଖିବାକୁ ମିଳିଥିଲା । ବାଚସ୍ପତିଙ୍କ ବାରମ୍ବାର ଅନୁରୋଧ ସତ୍ୱେ ବିରୋଧୀ ବିଜେଡି ବିଧାୟକ ମାନେ ତାଙ୍କର କଥା ଶୁଣି ନ ଥିଲେ୍ ଓ ସେମାନେ ହଟ୍ଟଗୋଳ ଜାରୀ ରଖିଥିଲେ । ଏହା ଫଳରେ ବାଚସ୍ପତି ସୁରମା ପାଢୀ ସକାଳ 10.47ରୁ ଗୃହକୁ ଅପରାହ୍ନ 4ଟା ଯାଏ ମୁଲତବୀ ରହିଲା ବୋଲି ଘୋଷଣା କରିଥିଲେ । । ଏହି କାରଣରୁ ଆଜି ପ୍ରଶ୍ନକାଳ, ଶୂନ୍ୟ କାଳ ଓ ଅନ୍ୟ ନିର୍ଧାରିତ କାର୍ଯ୍ୟକ୍ରମ ହୋଇ ପାରି ନ ଥିଲା ।

---------------

ହିନ୍ଦୁସ୍ଥାନ ସମାଚାର / ସମନ୍ୱୟ