ବଲାଙ୍ଗିର, ୬ ସେପ୍ଟେମ୍ବର (ହି.ସ.)- ଗତକାଲି ରାଜ୍ୟସ୍ତରୀୟ ଗୁରୁ ଦିବସ ପାଳନ ଓ ମୁଖ୍ୟମନ୍ତ୍ରୀ ଶିକ୍ଷା ପୁରସ୍କାର ପ୍ରଦାନ କରାଯାଇଛି l ଭୁବନେଶ୍ବର ଲୋକ ସେବା ଭବନ ସମ୍ମିଳନୀ କକ୍ଷ ଠାରେ ଅନୁଷ୍ଠିତ ଏକ ବର୍ଣ୍ଣାଢ୍ୟ ଉତ୍ସବରେ ରାଜ୍ୟର ବିଭିନ୍ନ ଜିଲ୍ଲାର କୃତୀ ଶିକ୍ଷକ ଶିକ୍ଷୟିତ୍ରୀ ମାନଙ୍କୁ ଶିକ୍ଷା ପୁରସ୍କାର ପ୍ରଦାନ କରାଯାଇଛି l ଏହି କ୍ରମରେ ବଲାଙ୍ଗୀର ପତିତପାବନ ଏକାଡେମୀର ଖେଳ ଶିକ୍ଷୟିତ୍ରୀ ଭାବରେ କାର୍ଯ୍ୟରତ ସସ୍ମିତାରାଣୀ ମିଶ୍ରଙ୍କୁ ଖେଳକୁଦ ଆୟୋଜନ ଓ ପ୍ରଶିକ୍ଷଣ କ୍ଷେତ୍ରରେ ଉତ୍ତମ ପ୍ରଦର୍ଶନ ପାଇଁ ଶ୍ରେଷ୍ଠ ଖେଳ ଶିକ୍ଷୟିତ୍ରୀ ଭାବରେ ପୁରସ୍କୃତ କରାଯାଇଛି l ଏହି ସମାରୋହ ରେ ମୁଖ୍ୟ ଅତିଥି ଭାବେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଓ ବରେଣ୍ୟ ଅତିଥି ଭାବରେ ଉଚ୍ଚ ଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ ଯୋଗ ଦେଇ ଶିକ୍ଷୟିତ୍ରୀ ଶ୍ରୀମତୀ ମିଶ୍ର ଙ୍କୁ ୨୫ ହଜାର ଟଙ୍କାର ଅର୍ଥରାଶି ସହ ଫଳକ ଓ ଉପଢୌକନ ପ୍ରଦାନ କରିଛନ୍ତି l ଶିକ୍ଷୟିତ୍ରୀ ଶ୍ରୀମତୀ ଏହି ପୁରସ୍କାର ଗ୍ରହଣ କରି ବଲାଙ୍ଗୀରରେ ପହଂଚିବା ପରେ ଆଜି ପତିତପାବନ ଏକାଡେମୀ ସ୍କୁଲ ପରିସର ରେ ତାଙ୍କୁ ସ୍କୁଲ ତରଫରୁ ଅଭିନନ୍ଦନ ଜ୍ଞାପନ କରାଯାଇଥିଲା l ସ୍କୁଲର ପ୍ରଧାନ ଶିକ୍ଷୟିତ୍ରୀ ଅଂଶୁପା ଭୋଇ ଙ୍କ ସମେତ ଶିକ୍ଷୟିତ୍ରୀ କେତକୀ ଭୋଇ, ସତ୍ୟଜିତ ବୁଡେକ ଓ ଖୁସବୁ ବେଗମ୍ ପ୍ରମୁଖ ରାଜ୍ଯ ପୁରସ୍କାରପ୍ରାପ୍ତ ଖେଳ ଶିକ୍ଷୟିତ୍ରୀ ସସ୍ମିତାରାଣୀ ମିଶ୍ରଙ୍କୁ ଶୁଭେଚ୍ଛା ଜ୍ଞାପନ କରିଛନ୍ତି l ସୂଚନାଯୋଗ୍ୟ ଯେ ସସ୍ମିତା ମିଶ୍ରଙ୍କ ପ୍ରଶିକ୍ଷଣରେ ସ୍କୁଲର ଛାତ୍ର ମାନେ ବ୍ଯାଡମିନ୍ଟନ, ସନ୍ତରଣ ଓ ଅନ୍ୟାନ୍ୟ ଖେଳକୁଦରେ ରାଜ୍ୟସ୍ତରରେ ନିଜର ଉତ୍କର୍ଷତା ପ୍ରତିପାଦନ କରିସାରିଛନ୍ତି

ହିନ୍ଦୁସ୍ଥାନ ସମାଚାର / ଗୋପବନ୍ଧୁ