ଧାର, ଅକ୍ଟୋବର ୨୬ (ହି.ସ.)। ମଧ୍ୟପ୍ରଦେଶର ଧାର ଜିଲ୍ଲାରେ ରବିବାର ବିଳମ୍ବିତ ରାତିରେ ଘଟିଥିବା ଏକ ସଡ଼କ ଦୁର୍ଘଟଣାରେ ୪ ଜଣ ଯୁବକଙ୍କ ମୃତ୍ୟୁ ହୋଇଥିବା ବେଳେ ଅନ୍ୟ ଜଣେ ଗୁରୁତର ଆହତ ହୋଇଛନ୍ତି। ପାଞ୍ଚ ଜଣ ସାଙ୍ଗ ସାଁୱରିଆ ସେଠଙ୍କ ଦର୍ଶନ କରି କାର୍ରେ ଘରକୁ ଫେରୁଥିଲେ। ଏହି ସମୟରେ ଲେବଡ଼-ନୟାଗାଁ ଫୋର୍ଲେନ୍ରେ ସେମାନଙ୍କ ଡିଜାୟର କାର୍ ଅନିୟନ୍ତ୍ରିତ ହୋଇ ଏକ ପୋଲିଆର ଡିଭାଇଡର୍ରେ ଧକ୍କା ହୋଇ ତଳକୁ ଖସିପଡ଼ିଥିଲା। ଧକ୍କା ପରେ କାର୍ରେ ନିଆଁ ଲାଗିଯିବାରୁ ଭିତରେ ଫସି ରହିଥିବା ୪ ଜଣ ଯୁବକ ଜୀବନ୍ତ ଦଗ୍ଧ ହୋଇଯାଇଥିଲେ। ଗୁରୁତର ଆହତ ଯୁବକଙ୍କୁ ପ୍ରାଥମିକ ଚିକିତ୍ସା ପରେ ଇନ୍ଦୋରକୁ ସ୍ଥାନାନ୍ତର କରାଯାଇଛି।

ପୁଲିସ ସୂଚନା ଅନୁଯାୟୀ, ରବିବାର ରାତି ପ୍ରାୟ ସାଢ଼େ ୧୧ଟା ସମୟରେ ସାଦଲପୁର ଥାନା ଅଞ୍ଚଳର ସାଦଲପୁର ଓ ଖେରୋଦ ମଧ୍ୟରେ ଥିବା ଏକ ଢାବା ନିକଟରେ ଏହି ଦୁର୍ଘଟଣା ଘଟିଥିଲା। କାର୍ରେ ଥିବା ପାଞ୍ଚ ଜଣ ସାଙ୍ଗ ସାଗୌରରୁ ସାଁୱରିଆ ସେଠଙ୍କ ଦର୍ଶନ ପାଇଁ ଯାଇଥିଲେ। ଫେରିବା ସମୟରେ ସାଦଲପୁର ନିକଟରେ ସେମାନଙ୍କ କାର୍ ହଠାତ୍ ଅନିୟନ୍ତ୍ରିତ ହୋଇ ପୋଲିଆର ଡିଭାଇଡର୍ରେ ଧକ୍କା ହୋଇଥିଲା। ଧକ୍କା ଏତେ ଜୋର୍ଦାର ଥିଲା ଯେ କାର୍ର ଇଞ୍ଜିନ୍ ଖସି ବାହାରକୁ ପଡ଼ିଯାଇଥିଲା ଏବଂ ଗାଡ଼ିଟି ପୋଲିଆ ତଳକୁ ଖସିପଡ଼ିଥିଲା। ଏହାର ତୁରନ୍ତ ପରେ କାର୍ରେ ନିଆଁ ଲାଗିଯାଇଥିଲା।

ଦୁର୍ଘଟଣା ସମୟରେ ଜଣେ ଯୁବକ କାର୍ରୁ ବାହାରକୁ ଛିଟିକି ପଡ଼ିଥିବା ବେଳେ ଅନ୍ୟ ଚାରି ଜଣ ଭିତରେ ଫସି ରହିଥିଲେ। ନିଆଁ ଦ୍ରୁତଗତିରେ ବ୍ୟାପିବାରୁ ସେମାନଙ୍କୁ ବାହାରକୁ ବାହାରିବାର ସୁଯୋଗ ମିଳିନଥିଲା। ଫଳରେ ଚାରି ଜଣଙ୍କର ଘଟଣାସ୍ଥଳରେ ହିଁ ମୃତ୍ୟୁ ହୋଇଥିଲା। କାର୍ରୁ ବାହାରକୁ ଛିଟିକି ପଡ଼ିଥିବା ଯୁବକ ଜଣକ ମଧ୍ୟ ଗୁରୁତର ଆହତ ହୋଇଥିଲେ।

ହିନ୍ଦୁସ୍ଥାନ ସମାଚାର / ସ୍ୱାଗତିକା