ୱାଶିଂଟନ ଡିସି, ୨୯ ଅକ୍ଟୋବର (ହି.ସ.)। ଆମେରିକା ୟୁକ୍ରେନକୁ ୫୦୦ଟି ପାଟ୍ରିଅଟ୍ ପିଏସି-୩ ଏମ୍ଏସ୍ଇ କ୍ଷେପଣାସ୍ତ୍ର ଏବଂ ଏହା ସହ ଜଡ଼ିତ ଉପକରଣ ବିକ୍ରି କରିବାକୁ ଅନୁମତି ଦେଇଛି। ଆମେରିକାର ବୈଦେଶିକ ବିଭାଗ ଶୁକ୍ରବାର ଏହି ନିଷ୍ପତ୍ତି ଘୋଷଣା କରିଛି। ଏହି ଚୁକ୍ତିର ଆନୁମାନିକ ମୂଲ୍ୟ ୨.୧ ବିଲିୟନ ଡଲାର ରହିଛି। ବିଶେଷ କଥା ହେଉଛି, ଏହି କ୍ରୟର ସମସ୍ତ ଖର୍ଚ୍ଚ ୟୁକ୍ରେନର ସହଯୋଗୀ ଏବଂ ଭାଗୀଦାର ଦେଶଗୁଡ଼ିକ ବହନ କରିବେ। ତେବେ ଏହି କ୍ଷେପଣାସ୍ତ୍ରଗୁଡ଼ିକର ଯୋଗାଣ ପାଇଁ ଅନେକ ବର୍ଷ ସମୟ ଲାଗିପାରେ।

ତୁର୍କିଏର ସରକାରୀ ସମ୍ବାଦ ସଂସ୍ଥା ଅନାଦୋଲୁ ଏବଂ ଆମେରିକୀୟ ଟେଲିଭିଜନ ନେଟୱାର୍କ (ଏବିସି) ଆମେରିକାର ବୈଦେଶିକ ବିଭାଗକୁ ଉଦ୍ଧୃତ କରି କହିଛନ୍ତି ଯେ, ଏହି ଚୁକ୍ତି ପାଇଁ ୟୁକ୍ରେନ କାନାଡା, ଜର୍ମାନୀ ଏବଂ ନରୱେଠାରୁ ମିଳୁଥିବା ଆର୍ଥିକ ସହାୟତା ବ୍ୟବହାର କରିବ। ଆମେରିକାର 'ଜମ୍ପଷ୍ଟାର୍ଟ' (ଜଏଣ୍ଟ ୟୁକ୍ରେନ ମଲ୍ଟିନ୍ୟାସନାଲ ପ୍ରୋଗ୍ରାମ୍-ସର୍ଭିସେସ୍, ଟ୍ରେନିଂ ଆଣ୍ଡ ଆର୍ଟିକିଲ୍ସ ରାପିଡ୍ ଟାଇମ୍ଲାଇନ୍) କାର୍ଯ୍ୟକ୍ରମ ଅଧୀନରେ ଏହି ଅର୍ଥ ଯୋଗାଇ ଦିଆଯିବ। ଏହା ବ୍ୟତୀତ ୟୁରୋପୀୟ ସଂଘର 'ୟୁକ୍ରେନ ସପୋର୍ଟ ଲୋନ୍' ମାଧ୍ୟମରେ ମଧ୍ୟ ଏହି ଅର୍ଥ ପ୍ରଦାନ କରାଯିବ।

ଆମେରିକାର ବୈଦେଶିକ ବିଭାଗ ସ୍ପଷ୍ଟ କରିଛି ଯେ, ଏହି ଚୁକ୍ତିରେ ଆମେରିକାର ନିଜସ୍ୱ କୌଣସି ପାଣ୍ଠି ସାମିଲ ନାହିଁ। ଏହି ଅସ୍ତ୍ର କାରବାରରେ ଆମେରିକୀୟ ପ୍ରତିରକ୍ଷା କମ୍ପାନୀ ଲକ୍ହିଡ୍ ମାର୍ଟିନ୍ ମୁଖ୍ୟ ଠିକାଦାର ରହିବ। ଏହି ପ୍ୟାକେଜ୍ରେ ୫୦୦ଟି ପିଏସି-୩ ଏମ୍ଏସ୍ଇ କ୍ଷେପଣାସ୍ତ୍ର ସହିତ ଗୋପନୀୟ ଏବଂ ସାଧାରଣ ସ୍ପେୟାର ପାର୍ଟସ୍, ଲଜିଷ୍ଟିକ୍ସ ଏବଂ କାର୍ଯ୍ୟକ୍ରମ ସହାୟତା ମଧ୍ୟ ଅନ୍ତର୍ଭୁକ୍ତ ରହିଛି।

ପିଏସି-୩ ଏମ୍ଏସ୍ଇ ଇଣ୍ଟରସେପ୍ଟରଗୁଡ଼ିକ ଦ୍ରୁତଗତିରେ ଆସୁଥିବା ବାଲିଷ୍ଟିକ୍ କ୍ଷେପଣାସ୍ତ୍ରଗୁଡ଼ିକୁ ଆକାଶ ମାର୍ଗରେ ହିଁ ଧ୍ୱଂସ କରିବା ପାଇଁ ପ୍ରସ୍ତୁତ କରାଯାଇଛି। ରୁଷ୍ ପକ୍ଷରୁ ୟୁକ୍ରେନର ଶକ୍ତି କେନ୍ଦ୍ର ଏବଂ ସାଧାରଣ ଭିତ୍ତିଭୂମି ଉପରେ ଲଗାତାର କ୍ଷେପଣାସ୍ତ୍ର ଆକ୍ରମଣ ହେଉଥିବାରୁ ଏହି ଇଣ୍ଟରସେପ୍ଟରଗୁଡ଼ିକର ଚାହିଦା ବୃଦ୍ଧି ପାଇଛି। ରୁଷ୍ର ବଢ଼ୁଥିବା ଆକ୍ରମଣକୁ ଦୃଷ୍ଟିରେ ରଖି ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କି ଆମେରିକାକୁ ଯଥାଶୀଘ୍ର ଏହି କ୍ଷେପଣାସ୍ତ୍ର ଯୋଗାଣ ସୁନିଶ୍ଚିତ କରିବାକୁ ଦାବି କରିଛନ୍ତି।

ହିନ୍ଦୁସ୍ଥାନ ସମାଚାର / ସ୍ୱାଗତିକା