ନୂଆଦିଲ୍ଲୀ, ଅକ୍ଟୋବର ୫ (ହି.ସ.) - ଦେଶର ତିନୋଟି ରାଜ୍ୟ ଏବଂ ଗୋଟିଏ କେନ୍ଦ୍ରଶାସିତ ଅଂଚଳର ପାଂଚଟି ବିଧାନସଭା ଆସନ ଏବଂ ଗୋଟିଏ ଲୋକସଭା ଆସନରେ ମଙ୍ଗଳବାର, ଅକ୍ଟୋବର ୬ ରେ ଉପନିର୍ବାଚନ ହେବ । ପଶ୍ଚିମବଙ୍ଗର ନନ୍ଦିଗ୍ରାମ ଏବଂ ରେଜିନଗର, ତାମିଲନାଡୁର ମଦୁରାନ୍ତକମ ଏବଂ ଧାରାପୁରମ, ପୁଡୁଚେରୀର ଥାଟ୍ଟାନଚାୱଡି ବିଧାନସଭା ଆସନ ଏବଂ ଆସାମର ନାଗାଓନ ଲୋକସଭା ଆସନରେ ସକାଳ ୭ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ମତଦାନ ହେବ । ଅକ୍ଟୋବର ୯ ତାରିଖରେ ଭୋଟ ଗଣତି ହେବ ।
ଏହି ଛଅଟି ଆସନରେ ଭାରତୀୟ ଜନତା ପାର୍ଟି (ବିଜେପି), କଂଗ୍ରେସ, ତୃଣମୂଳ କଂଗ୍ରେସ (ଟିଏମସି), ଦ୍ରାବିଡ଼ ମୁନେତ୍ର କଡ଼ଗମ (ଡିଏମକେ), ତାମିଲାଗା ଭେଟ୍ରି କଡ଼ଗମ (ଟିଭିକେ), ଅଲ୍ ଇଣ୍ଡିଆ ଆନ୍ନା ଦ୍ରାବିଡ଼ ମୁନେତ୍ର କଡ଼ଗମ (ଏଆଇଏଡିଏମକେ), ବାମପନ୍ଥୀ ଦଳ, ଅଲ୍ ଇଣ୍ଡିଆ ୟୁନାଇଟେଡ୍ ଡେମୋକ୍ରାଟିକ୍ ଫ୍ରଣ୍ଟ (ଏଆଇୟୁଡିଏଫ), ଅଲ୍ ଇଣ୍ଡିଆ ଏନଆର କଂଗ୍ରେସ (ଏଆଇଏନଆରସି), ଅନ୍ୟମାନଙ୍କ ମଧ୍ୟରେ ପ୍ରତିଦ୍ୱନ୍ଦ୍ୱିତା କରୁଛନ୍ତି । ୨୦୨୬ ବିଧାନସଭା ନିର୍ବାଚନରେ ଦୁଇଟି ଆସନରୁ ନିର୍ବାଚିତ ପ୍ରତିନିଧିମାନେ ଗୋଟିଏ ଆସନ ଛାଡ଼ିବା କିମ୍ବା ବିଧାୟକ ପଦରୁ ଇସ୍ତଫା ଦେବା କାରଣରୁ ଅଧିକାଂଶ ଆସନ ଖାଲି ପଡ଼ିଛି ।
ଆସାମର ନାଗାଓଁ ଲୋକସଭା ଆସନରେ ୧୯,୦୧,୮୯୯ ଭୋଟର ଏବଂ ୨,୩୦୭ ମତଦାନ କେନ୍ଦ୍ର ରହିଛି । ପଶ୍ଚିମବଙ୍ଗର ନନ୍ଦିଗ୍ରାମ ବିଧାନସଭା ଆସନରେ ୨୦୨୬ ଭୋଟର ତାଲିକା ଅନୁଯାୟୀ ୨,୬୬,୪୧୫ ଭୋଟରଙ୍କ ସହ ୨୮୨ଟି ମତଦାନ କେନ୍ଦ୍ର ରହିଛି । ରେଜିନଗରରେ ୨,୩୯,୨୯୫ ଭୋଟର ଏବଂ ୩୨୫ଟି ମତଦାନ କେନ୍ଦ୍ର ରହିଛି । ତାମିଲନାଡୁର ମଦୁରାନ୍ତକମ୍ ଆସନରେ ୨,୧୩,୭୮୮ ଭୋଟର ଏବଂ ୨୮୫ ମତଦାନ କେନ୍ଦ୍ର ଥିବାବେଳେ ଧାରାପୁରମରେ ୨,୨୩,୨୪୭ ଭୋଟର ଏବଂ ୩୨୦ ମତଦାନ କେନ୍ଦ୍ର ରହିଛି । ପୁଡୁଚେରୀର ଥଟ୍ଟାନଚାୱାଡି ଆସନରେ ୨୬,୯୨୧ ଭୋଟର ଅଛନ୍ତି । ଉପଲବ୍ଧ ତଥ୍ୟ ଅନୁଯାୟୀ, ଏହି ଛଅଟି ଆସନରେ ମୋଟ ୨୬,୭୧,୫୬୫ ଭୋଟର ସେମାନଙ୍କ ମତାଧିକାର ସାବ୍ୟସ୍ତ କରିବେ । ଏଥିରେ ନାଗାଓଁ ଲୋକସଭା ନିର୍ବାଚନ ମଣ୍ଡଳୀର ଭୋଟର ମଧ୍ୟ ସାମିଲ ଅଛନ୍ତି ।
ହିନ୍ଦୁସ୍ଥାନ ସମାଚାର / ଭାନୁ ଚରଣ