ଭୁବନେଶ୍ୱର, 05 ଅକ୍ଟୋବର (ହି.ସ.) ବିଭିନ୍ନ ଆଳ ଦେଖାଇ ପୂର୍ବତନ ସରକାର ୨୦୧୭ ମସିହାରୁ ଛାତ୍ରସଂଘ ନିର୍ବାଚନ ବନ୍ଦ ରଖିଥିଲେ । ଏହାଦ୍ୱାରା ଏକ ସମ୍ପୂର୍ଣ୍ଣ ପିଢ଼ିର ଛାତ୍ରଛାତ୍ରୀ ନିଜ ପ୍ରତିନିଧି ବାଛିବାର ଗଣତାନ୍ତ୍ରିକ ଅଧିକାରରୁ ବଞ୍ଚିତ ହୋଇଥିଲେ । ଛାତ୍ରଛାତ୍ରୀଙ୍କୁ ଦିଆଯାଇଥିବା ପ୍ରତିଶ୍ରୁତି ପାଳନ କରି ରାଜ୍ୟ ସରକାର ଛାତ୍ରସଂଘ ନିର୍ବାଚନ ପୁନଃ ଆରମ୍ଭ କରିଛନ୍ତି ବୋଲି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଛନ୍ତି।
ମୁଖ୍ୟମନ୍ତ୍ରୀ ସୋମବାର ସାମାଜିକ ଗଣମାଧ୍ୟମରେ ଏକ ବାର୍ତ୍ତା ଦେଇ କହିଛନ୍ତି ଯେ, ଛାତ୍ରଛାତ୍ରୀଙ୍କୁ ଦିଆଯାଇଥିବା ପ୍ରତିଶ୍ରୁତି ପାଳନ କରି ରାଜ୍ୟ ସରକାର ଛାତ୍ରସଂଘ ନିର୍ବାଚନ ପୁନଃ ଆରମ୍ଭ କରିଛନ୍ତି। ଦୀର୍ଘ ବର୍ଷର ଅପେକ୍ଷା ପରେ ଆସନ୍ତା ୧୫ ଅକ୍ଟୋବରରେ ଓଡ଼ିଶାର ସମସ୍ତ ମହାବିଦ୍ୟାଳୟ ଓ ବିଶ୍ୱବିଦ୍ୟାଳୟରେ ଛାତ୍ରସଂଘ ନିର୍ବାଚନ ଅନୁଷ୍ଠିତ ହେବ।
ମାଝୀ କହିଛନ୍ତି ଯେ, ଓଡ଼ିଶାର ଯୁବପିଢ଼ି କେବଳ ଆସନ୍ତାକାଲିର ନେତୃତ୍ୱ ନୁହନ୍ତି, ବରଂ ଆଜିର ଓଡ଼ିଶା ଗଠନରେ ମଧ୍ୟ ସେମାନେ ସକ୍ରିୟ ଭାଗୀଦାର। ଛାତ୍ରଛାତ୍ରୀଙ୍କ ସ୍ୱର, ଚିନ୍ତାଧାରା ଓ ଆକାଂକ୍ଷାକୁ ଶିକ୍ଷାନୁଷ୍ଠାନ ପରିସର ଏବଂ ଗଣତାନ୍ତ୍ରିକ ପ୍ରକ୍ରିୟାରେ ସ୍ଥାନ ମିଳିବା ଆବଶ୍ୟକ।
ଛାତ୍ରସଂଘ ନିର୍ବାଚନ କେବଳ ଏକ ଔପଚାରିକତା ନୁହେଁ, ଏହା ଯୁବପିଢ଼ିଙ୍କୁ ଗଣତାନ୍ତ୍ରିକ ପ୍ରକ୍ରିୟାରେ ଭାଗ ନେବା, ନିଜ ପ୍ରତିନିଧି ବାଛିବା ଏବଂ ନେତୃତ୍ୱର ଗୁଣ ବିକଶିତ କରିବା ପାଇଁ ଏକ ଗୁରୁତ୍ୱପୂର୍ଣ୍ଣ ମଞ୍ଚ ବୋଲି ସେ କହିଛନ୍ତି।
ମୁଖ୍ୟମନ୍ତ୍ରୀ କହିଛନ୍ତି, ଛାତ୍ରଛାତ୍ରୀଙ୍କୁ ଗଣତାନ୍ତ୍ରିକ ଅଧିକାର ଫେରାଇ ଦିଆଯିବ ବୋଲି ତାଙ୍କ ସରକାର ପ୍ରତିଶ୍ରୁତି ଦେଇଥିଲା। ଏବେ ଏହି ପ୍ରତିଶ୍ରୁତିକୁ ନିଷ୍ପତ୍ତି ଓ କାର୍ଯ୍ୟାନ୍ୱୟନ ମାଧ୍ୟମରେ ପୂରଣ କରାଯାଇଛି।
ସେ ଛାତ୍ରଛାତ୍ରୀଙ୍କୁ ଆତ୍ମବିଶ୍ୱାସ, ଶୃଙ୍ଖଳା, ମର୍ଯ୍ୟାଦା ଓ ଗଣତାନ୍ତ୍ରିକ ଭାବନା ସହ ନିର୍ବାଚନରେ ସାମିଲ ହେବାକୁ ଆହ୍ୱାନ ଦେଇଛନ୍ତି। ନିଜ ସ୍ୱରକୁ ଶକ୍ତିଶାଳୀ କରିବା, ପ୍ରତିନିଧି ବାଛିବା ଏବଂ ନିଜ ଶିକ୍ଷାନୁଷ୍ଠାନ ସହ ରାଜ୍ୟର ଭବିଷ୍ୟତ ଗଠନରେ ସକ୍ରିୟ ଭୂମିକା ନେବାକୁ ସେ ଛାତ୍ରଛାତ୍ରୀଙ୍କୁ କହିଛନ୍ତି।
ଆତ୍ମବିଶ୍ୱାସୀ ଯୁବପିଢ଼ି ଓ ସକ୍ରିୟ ଶିକ୍ଷାନୁଷ୍ଠାନ ଗଣତନ୍ତ୍ର ଏକ ସମୃଦ୍ଧ ଓ ବିକଶିତ ଓଡ଼ିଶା ଗଠନ ପାଇଁ ଅତ୍ୟନ୍ତ ଆବଶ୍ୟକ ବୋଲି ମୁଖ୍ୟମନ୍ତ୍ରୀ କହିଛନ୍ତି।
---------------
ହିନ୍ଦୁସ୍ଥାନ ସମାଚାର / ସମନ୍ୱୟ
05 Oct 2026
