ଭୁବନେଶ୍ୱର, ୫

ଅକ୍ଟୋବର (ହି.ସ.)। ଆୟଠାରୁ ଅଧିକ ସମ୍ପତ୍ତି (ଡିଏ) ରଖିଥିବା ଅଭିଯୋଗରେ ଓଡ଼ିଶା ଭିଜିଲାନ୍ସ ସୋମବାର

ମୟୂରଭଞ୍ଜ ଜିଲ୍ଲାର ବେତନଟୀ ଆର୍ଆଣ୍ଡ୍ବି ଉପଖଣ୍ଡର ସହକାରୀ କାର୍ଯ୍ୟନିର୍ବାହୀ ଯନ୍ତ୍ରୀ

ଅରବିନ୍ଦ ମହାନ୍ତିଙ୍କ ସହ ସମ୍ପୃକ୍ତ ୧୦ଟି ଠିକଣାରେ ଏକକାଳୀନ ତଲାସୀ ଅଭିଯାନ ଆରମ୍ଭ କରିଛି।

ତାଙ୍କ ଜଣାଶୁଣା ଆୟର ଉତ୍ସ ତୁଳନାରେ ଅଧିକ ସମ୍ପତ୍ତି ଅର୍ଜନ କରିଥିବା ଅଭିଯୋଗ ଆଧାରରେ ଏହି

ଚଢ଼ାଉ କରାଯାଉଛି।

ବାରିପଦାର ଭିଜିଲାନ୍ସ

ସ୍ୱତନ୍ତ୍ର ଅଦାଲତର ବିଚାରପତିଙ୍କ ଦ୍ୱାରା ଜାରି ତଲାସୀ ୱାରେଣ୍ଟ ଆଧାରରେ ଭିଜିଲାନ୍ସ ଏହି

କାର୍ଯ୍ୟାନୁଷ୍ଠାନ କରୁଛି। ପାଞ୍ଚ ଜଣ ଡିଏସ୍ପି ଏହି ତଲାସୀ ଅଭିଯାନର ନେତୃତ୍ୱ ନେଉଛନ୍ତି।

ସେମାନଙ୍କ ସହ ୮ ଜଣ ଇନ୍ସପେକ୍ଟର ଓ ଅନ୍ୟ ସହଯୋଗୀ କର୍ମଚାରୀ ସାମିଲ ଅଛନ୍ତି।

ଭିଜିଲାନ୍ସ ଟିମ୍ ମୟୂରଭଞ୍ଜ, ବାଲେଶ୍ୱର

ଓ ଖୋର୍ଦ୍ଧା ଜିଲ୍ଲାରେ ଥିବା ମହାନ୍ତିଙ୍କ ସହ ସମ୍ପୃକ୍ତ ବିଭିନ୍ନ ପରିସରରେ ତଲାସୀ କରୁଛି।

ଏଥିରେ ବାଲେଶ୍ୱରର ଅଙ୍ଗାରଗଡ଼ିଆସ୍ଥିତ ତାଙ୍କର ତିନି ମହଲା କୋଠା, ଖୋର୍ଦ୍ଧାର

ବାଲିଅନ୍ତାସ୍ଥିତ ଦୁଇ ମହଲା କୋଠା, ବେତନଟୀସ୍ଥିତ ତାଙ୍କ କାର୍ଯ୍ୟାଳୟ ଓ ବାସଭବନ ରହିଛି।

ଏହା ବ୍ୟତୀତ ବାଲେଶ୍ୱର ଜିଲ୍ଲାର

ଜଳେଶ୍ୱର ଅଞ୍ଚଳର ରାୟଣ-ରାମଚନ୍ଦ୍ରପୁରସ୍ଥିତ ତାଙ୍କ ପୈତୃକ ବାସଭବନ, ବାଲେଶ୍ୱରର

ବସନ୍ତପୁରସ୍ଥିତ ଫାର୍ମ ହାଉସ୍ ଏବଂ ବାମପଦାସ୍ଥିତ ଅନ୍ୟ ଏକ ଘରେ ମଧ୍ୟ ତଲାସୀ ଚାଲିଛି।

ଭିଜିଲାନ୍ସ ଅଧିକାରୀମାନେ

ତାଙ୍କ ଘନିଷ୍ଠ ସହଯୋଗୀମାନଙ୍କ ସହ ସମ୍ପୃକ୍ତ ତିନୋଟି ପରିସରକୁ ମଧ୍ୟ ତଲାସୀ ପରିସରଭୁକ୍ତ

କରିଛନ୍ତି। ଏଥିରେ ଅଙ୍ଗାରଗଡ଼ିଆ, ବୈଶିଙ୍ଗା (ମୟୂରଭଞ୍ଜ) ଏବଂ ବାମପଦା (ବାଲେଶ୍ୱର)ସ୍ଥିତ ବାସଭବନ

ସାମିଲ ଅଛି।

ଭିଜିଲାନ୍ସ ପକ୍ଷରୁ

କୁହାଯାଇଛି ଯେ ସମସ୍ତ ସ୍ଥାନରେ ତଲାସୀ ଅଭିଯାନ ଜାରି ରହିଛି। ତଲାସୀ ଶେଷ ହେବା ପରେ ଜବତ

ସମ୍ପତ୍ତି ଓ ଅନ୍ୟାନ୍ୟ ଦସ୍ତାବିଜ ସମ୍ପର୍କରେ ବିସ୍ତୃତ ତଥ୍ୟ ସାମ୍ନାକୁ ଆସିବ ବୋଲି ଆଶା

କରାଯାଉଛି। ତଲାସୀ ଅଭିଯାନ ଶେଷ ହେବା ପରେ ମାମଲା ସମ୍ପର୍କରେ ପରବର୍ତ୍ତୀ ରିପୋର୍ଟ ଦିଆଯିବ।

---------------

ହିନ୍ଦୁସ୍ଥାନ ସମାଚାର / ସ୍ୱାଗତିକା