
ନୂଆଦିଲ୍ଲୀ, ୧୬ ନଭେମ୍ବର (ହି.ସ.)। ସାରା ଦେଶରେ ନହାୟ-ଖାୟ ସହ ନଭେମ୍ବର ୧୩ ତାରିଖରୁ ଆରମ୍ଭ ହୋଇଥିବା ଚାରିଦିନିଆ ଛଠ୍ ମହାପର୍ବ ଆଜି ଉଦିତ ସୂର୍ଯ୍ୟଙ୍କୁ ଅର୍ଘ୍ୟ ଅର୍ପଣ ସହ ସମ୍ପନ୍ନ ହେବ। ଏହି ଅବସରରେ ଠେକୁଆ ପ୍ରସାଦ ବଣ୍ଟନ କରାଯିବ। ୩୬ ଘଣ୍ଟା ଧରି ନିର୍ଜଳା ଉପବାସ ରଖିଥିବା ବ୍ରତଧାରୀମାନେ ଉଦିତ ସୂର୍ଯ୍ୟଦେବଙ୍କୁ ଅର୍ଘ୍ୟ ଅର୍ପଣ କରିବା ପରେ ନିଜର ଅନୁଷ୍ଠାନ ସମାପନ କରିବେ। ଜାତୀୟ ରାଜଧାନୀ ଦିଲ୍ଲୀରେ ଯମୁନା ନଦୀ ସମେତ ବିଭିନ୍ନ ଜଳାଶୟରେ ଏଥିପାଇଁ ଆବଶ୍ୟକ ବ୍ୟବସ୍ଥା କରାଯାଇଛି। ମୁଖ୍ୟମନ୍ତ୍ରୀ ରେଖା ଗୁପ୍ତା ମଧ୍ୟ ଏହି ମହାପର୍ବରେ ସାମିଲ ହେଉଛନ୍ତି।
ଘାଟଗୁଡ଼ିକରେ ପ୍ରସାଦ ବଣ୍ଟନ ସହିତ ବିଶେଷକରି ବିହାର ଓ ଝାଡ଼ଖଣ୍ଡର ସଂସ୍କୃତି ସହ ଜଡ଼ିତ ସୂର୍ଯ୍ୟ ଉପାସନାର ଚାରିଦିନିଆ ସ୍ୱତନ୍ତ୍ର ଅନୁଷ୍ଠାନ ତଥା ଲୋକଆସ୍ଥାର ମହାପର୍ବ ଛଠ୍ର ସମାପନ ହେବ। ଏହି ମହାପର୍ବର ସମାପନର ପୂର୍ବ ସନ୍ଧ୍ୟାରେ ଅର୍ଥାତ୍ ତୃତୀୟ ଦିନରେ ଶ୍ରଦ୍ଧାଳୁ ଓ ଛଠ୍ ବ୍ରତଧାରୀମାନେ ଅସ୍ତଗାମୀ ସୂର୍ଯ୍ୟଦେବଙ୍କୁ ଅର୍ଘ୍ୟ ଅର୍ପଣ କରିଥିଲେ।
ଦିଲ୍ଲୀରେ ଯମୁନା ନଦୀର ସମସ୍ତ ଛଠ୍ ଘାଟର ସମ୍ବେଦନଶୀଳ ସ୍ଥାନଗୁଡ଼ିକରେ ଗୋତାଖୋରମାନଙ୍କୁ ନିୟୋଜିତ କରାଯାଇଛି। ଆଜି ଉଦିତ ସୂର୍ଯ୍ୟଙ୍କୁ ଅର୍ଘ୍ୟ ଅର୍ପଣ କରିବାକୁ ଆସୁଥିବା ଶ୍ରଦ୍ଧାଳୁଙ୍କ ସୁବିଧା ପାଇଁ ମେଟ୍ରୋ ସେବା ଭୋର ୪ଟା ୩୦ ମିନିଟ୍ରୁ ଆରମ୍ଭ ହୋଇଛି। ସାଧାରଣ ଦିନଗୁଡ଼ିକରେ ମେଟ୍ରୋ ଚଳାଚଳ ସକାଳ ୬ଟାରୁ ଆରମ୍ଭ ହୋଇଥାଏ। ଆଜି ରାଜଧାନୀ ଦିଲ୍ଲୀରେ ସୂର୍ଯ୍ୟୋଦୟ ସକାଳ ୬ଟା ୪୩ ମିନିଟ୍ରେ ହେବ।
ସୁରକ୍ଷା ବ୍ୟବସ୍ଥାରେ ଦିଲ୍ଲୀ ପୋଲିସ କର୍ମଚାରୀଙ୍କ ବ୍ୟତୀତ ହୋମଗାର୍ଡ, ସିଭିଲ୍ ଡିଫେନ୍ସ ଏବଂ ଏଡିଆରଏଫ୍ ଟିମ୍କୁ ମଧ୍ୟ ନିୟୋଜିତ କରାଯାଇଛି। ଘାଟଗୁଡ଼ିକରେ ଲଗାଯାଇଥିବା ସିସିଟିଭି କ୍ୟାମେରା ମାଧ୍ୟମରେ ନଜର ରଖାଯାଉଛି। ଏଥିପାଇଁ ଏକ ନିୟନ୍ତ୍ରଣ କକ୍ଷ ମଧ୍ୟ ଖୋଲାଯାଇଛି। ଘାଟଗୁଡ଼ିକର ପ୍ରବେଶ ଓ ପ୍ରସ୍ଥାନ ଦ୍ୱାରରେ ସ୍ୱତନ୍ତ୍ର ନଜର ରଖାଯାଇଛି। ଗତକାଲି ସନ୍ଧ୍ୟା ଭଳି ଆଜି ମଧ୍ୟ ୧୧ କିଲୋମିଟର ଦୀର୍ଘ ମୁନକ କେନାଲ ଛଠ୍ ଘାଟ ସମେତ ଯମୁନା ନଦୀର ଉଭୟ ପାର୍ଶ୍ୱରେ ନିର୍ମିତ ଛଠ୍ ଘାଟଗୁଡ଼ିକରେ ବ୍ରତଧାରୀମାନେ ଉଦିତ ସୂର୍ଯ୍ୟଦେବଙ୍କୁ ଅର୍ଘ୍ୟ ଅର୍ପଣ କରିବା ପାଇଁ ପହଞ୍ଚିବା ଆରମ୍ଭ କରିଛନ୍ତି।
ହିନ୍ଦୁସ୍ଥାନ ସମାଚାର / ସ୍ୱାଗତିକା