
ନୂଆଦିଲ୍ଲୀ, ୧୭ ନଭେମ୍ବର (ହି.ସ.)। ଫିଲିପାଇନ୍ସର ରାଜଧାନୀ ମନିଲାସ୍ଥିତ ଐତିହାସିକ ଖାଲସା ଦିୱାନ ଗୁରୁଦ୍ୱାରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଥା ଟେକିବା ସହ ଏହାର ପୁନର୍ବିକାଶ ପାଇଁ ଶିଳାନ୍ୟାସ କରିଥିବା ପଦକ୍ଷେପକୁ ବିଜେପି ସାଂସଦ ତରୁଣ ଚୁଗ୍ ସ୍ୱାଗତ କରିଛନ୍ତି। ସେ କହିଛନ୍ତି ଯେ, ପ୍ରଧାନମନ୍ତ୍ରୀଙ୍କ ଏହି ପଦକ୍ଷେପ ଶିଖ୍ ଗୁରୁମାନଙ୍କ ମହାନ ପରମ୍ପରା ଏବଂ ଶିଖ୍ ସମ୍ପ୍ରଦାୟ ପ୍ରତି ତାଙ୍କର ଗଭୀର ସମ୍ମାନ, ଶ୍ରଦ୍ଧା ଓ ଭଲପାଇବାର ପ୍ରତୀକ।
ତରୁଣ ଚୁଗ୍ କହିଛନ୍ତି ଯେ, ଏହି ପଦକ୍ଷେପ କେବଳ ଏକ ଧାର୍ମିକ ସ୍ଥଳର ପୁନର୍ବିକାଶ ମଧ୍ୟରେ ସୀମିତ ନୁହେଁ, ବରଂ ଏହା ଭାରତର ଗୌରବମୟ ଐତିହ୍ୟକୁ ସଂରକ୍ଷିତ କରିବା ସହ ଶିଖ୍ ଗୁରୁମାନଙ୍କ ମହାନ ବାର୍ତ୍ତାକୁ ଆଗକୁ ବଢ଼ାଇବାର ଏକ ସଂକଳ୍ପ। ଶିଖ୍ ଗୁରୁମାନେ ସମଗ୍ର ମାନବଜାତିକୁ ସମାନତା, ଭାଇଚାରା ଓ ଏକତାର ବାର୍ତ୍ତା ଦେଇଛନ୍ତି। ସେମାନଙ୍କର ‘ମାନସ କି ଜାତ ସବୈ ଏକୈ ପହିଚାନବୋ’ ବାର୍ତ୍ତା ଆଜି ମଧ୍ୟ ସମଗ୍ର ବିଶ୍ୱ ପାଇଁ ପ୍ରାସଙ୍ଗିକ ରହିଛି।
ସେ ଆହୁରି କହିଛନ୍ତି ଯେ, ଶିଖ୍ ସମ୍ପ୍ରଦାୟ ପ୍ରତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସମ୍ମାନ କେବଳ ଭାରତ ମଧ୍ୟରେ ସୀମିତ ନୁହେଁ। ବିଶ୍ୱର ଯେକୌଣସି କୋଣରେ ରହୁଥିବା ଶିଖ୍ ଭାଇଭଉଣୀଙ୍କ ପ୍ରତି ତାଙ୍କର ସ୍ନେହ, ସମ୍ବେଦନଶୀଳତା ଓ ଆତ୍ମୀୟତା ସବୁବେଳେ ପ୍ରତିଫଳିତ ହୋଇଥାଏ। ଚୁଗ୍ କହିଛନ୍ତି ଯେ, ମନିଲାର ଐତିହାସିକ ଖାଲସା ଦିୱାନ ଗୁରୁଦ୍ୱାରର ପୁନର୍ବିକାଶ ପଦକ୍ଷେପ ଶିଖ୍ ସମ୍ପ୍ରଦାୟର ଧାର୍ମିକ ଓ ସାଂସ୍କୃତିକ ଐତିହ୍ୟକୁ ସଂରକ୍ଷିତ କରିବା ସହ ଆଗାମୀ ପିଢ଼ିକୁ ଗୁରୁ ସାହିବାନଙ୍କ ଶିକ୍ଷା ସହ ଯୋଡ଼ିବାର ଏକ ମାଧ୍ୟମ ହେବ।
ହିନ୍ଦୁସ୍ଥାନ ସମାଚାର / ସ୍ୱାଗତିକା