
ଖଡ଼ଗପୁର, ୨୧ ନଭେମ୍ବର (ହି.ସ.)। ଆଇଆଇଟି ଖଡ଼ଗପୁରର ପ୍ଲାଟିନମ୍ ଜୁବିଲି ସମାରୋହରେ ଯୋଗଦେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶନିବାର ବାମପନ୍ଥୀ ଦଳଗୁଡ଼ିକ ଉପରେ ଶିଳ୍ପର ବିକାଶରେ ବାଧା ସୃଷ୍ଟି କରିଥିବା ଅଭିଯୋଗ ଆଣିଛନ୍ତି। ସେ କହିଛନ୍ତି ଯେ, ପ୍ରାୟ ପାଞ୍ଚ ଦଶନ୍ଧି ପୂର୍ବରୁ ଭାରତରେ ସେମିକଣ୍ଡକ୍ଟର ଚିପ୍ ନିର୍ମାଣ କରିବାକୁ କମ୍ପାନୀଗୁଡ଼ିକ ଆସିଥିଲେ। କିନ୍ତୁ ସେହି ସମୟରେ ଲାଲ୍ ପତାକା ଦେଖାଇ ବିରୋଧ କରାଯିବାରୁ ସେମାନଙ୍କୁ ଫେରିଯିବାକୁ ବାଧ୍ୟ କରାଯାଇଥିଲା। ଏଥିସହ ଛାତ୍ରଛାତ୍ରୀମାନଙ୍କୁ ନିଜ ସୀମା ବାହାରକୁ ଯାଇ ନୂଆ ଲକ୍ଷ୍ୟ ସ୍ଥିର କରିବା ଏବଂ ତାହା ହାସଲ କରିବାକୁ ସେ ଆହ୍ୱାନ ଦେଇଛନ୍ତି।
ଆଇଆଇଟି ଖଡ଼ଗପୁରର ୭୫ ବର୍ଷ ପୂର୍ତ୍ତି ଅବସରରେ ପ୍ରଧାନମନ୍ତ୍ରୀ ଏକ ସ୍ୱତନ୍ତ୍ର ସ୍ମାରକୀ ମୁଦ୍ରାର ଉନ୍ମୋଚନ କରିଥିଲେ। ଏହାପରେ 'ବିକଶିତ ଭାରତର ୭୫ ସ୍ୱର' ପଦକ୍ଷେପ ଅନ୍ତର୍ଗତ ୭୫ ଜଣ ଛାତ୍ରଛାତ୍ରୀଙ୍କ ସହ ଆଲୋଚନା କରିଥିଲେ। ଏହି ସମୟରେ ସେ ଛାତ୍ରଛାତ୍ରୀଙ୍କ ପାଠପଢ଼ା, ଭବିଷ୍ୟତ ଯୋଜନା ଏବଂ ଦେଶର ବିକାଶରେ ସେମାନଙ୍କ ଭୂମିକା ସମ୍ପର୍କରେ ଚର୍ଚ୍ଚା କରିଥିଲେ। ଏହାପରେ ଆୟୋଜିତ ମୁଖ୍ୟ ସମାରୋହକୁ ସମ୍ବୋଧିତ କରିଥିଲେ।
ନିଜ ଅଭିଭାଷଣରେ ଆଇଆଇଟି ଖଡ଼ଗପୁରର ଗୌରବମୟ ଇତିହାସ ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ, ଏହି ଅନୁଷ୍ଠାନରେ ଦେଶର ଅତୀତ, ବର୍ତ୍ତମାନ ଓ ଭବିଷ୍ୟତ ଏକାଠି ପ୍ରତିଫଳିତ ହେଉଛି। ୨୦୪୭ ସୁଦ୍ଧା ବିକଶିତ ଭାରତର ଲକ୍ଷ୍ୟ ହାସଲ କରିବାରେ ଆଇଆଇଟି ଖଡ଼ଗପୁରର ଛାତ୍ରଛାତ୍ରୀଙ୍କ ଗୁରୁତ୍ୱପୂର୍ଣ୍ଣ ଭୂମିକା ରହିବ। ଆଗାମୀ ଦୁଇ ଦଶନ୍ଧି ଛାତ୍ରଛାତ୍ରୀଙ୍କ ଜୀବନ ପାଇଁ ଅତ୍ୟନ୍ତ ମହତ୍ତ୍ୱପୂର୍ଣ୍ଣ ବୋଲି ସେ କହିଥିଲେ। ସେମାନେ 'ରାଷ୍ଟ୍ର ପ୍ରଥମ' ସିଦ୍ଧାନ୍ତକୁ ଆପଣାଇ ଦେଶର ବିକାଶରେ ଯୋଗଦାନ ଦେବା ଉଚିତ।
ପ୍ରଧାନମନ୍ତ୍ରୀ କହିଥିଲେ ଯେ, ଆଇଆଇଟି ଖଡ଼ଗପୁରର ଛାତ୍ରଛାତ୍ରୀମାନେ ଷ୍ଟାର୍ଟଅପ୍, ମହାକାଶ ଏବଂ ବୈଷୟିକ ଜ୍ଞାନକୌଶଳ ସମେତ ବିଭିନ୍ନ କ୍ଷେତ୍ରରେ ନିଜ ପ୍ରତିଭାର ପରିଚୟ ଦେଉଛନ୍ତି। ସେମିକଣ୍ଡକ୍ଟର ଶିଳ୍ପ ସମ୍ପର୍କରେ ଉଲ୍ଲେଖ କରି ସେ କହିଥିଲେ ଯେ, ପ୍ରାୟ ପାଞ୍ଚ ଦଶନ୍ଧି ପୂର୍ବରୁ ଭାରତରେ ଚିପ୍ ନିର୍ମାଣର ବ୍ୟାପକ ସମ୍ଭାବନା ରହିଥିଲା। କିନ୍ତୁ ତତ୍କାଳୀନ ପରିସ୍ଥିତି ଓ ବିରୋଧ ଯୋଗୁଁ କମ୍ପାନୀଗୁଡ଼ିକୁ ଫେରିଯିବାକୁ ପଡ଼ିଥିଲା। ବିଳମ୍ବରେ ଆରମ୍ଭ କରିଥିଲେ ମଧ୍ୟ ଆଜି ଭାରତ ଚିପ୍ ରପ୍ତାନି କରୁଛି ବୋଲି ସେ କହିଥିଲେ।
ହିନ୍ଦୁସ୍ଥାନ ସମାଚାର / ସ୍ୱାଗତିକା