ଉଜ୍ଜୟିନୀ, ୦୬ ନଭେମ୍ବର (ହି.ସ.)। ମଧ୍ୟପ୍ରଦେଶର ଉଜ୍ଜୟିନୀସ୍ଥିତ ବିଶ୍ୱପ୍ରସିଦ୍ଧ ଜ୍ୟୋତିର୍ଲିଙ୍ଗ ଶ୍ରୀ ମହାକାଳେଶ୍ୱର ମନ୍ଦିରରେ ଆଜିଠାରୁ ଦୀପୋତ୍ସବ ଆରମ୍ଭ ହେବ। ଧନତେରସ ଅବସରରେ ମନ୍ଦିରର ନନ୍ଦୀ ହଲ୍ରେ ପରମ୍ପରା ଅନୁଯାୟୀ ସ୍ୱତନ୍ତ୍ର ମହାପୂଜା ଆୟୋଜନ କରାଯିବ। ଆଜି ସକାଳ ୯ଟାରୁ ପୂଜା ଆରମ୍ଭ ହୋଇଛି। ଏକ ଘଣ୍ଟା ଧରି ଗଣପତି, ମହାଲକ୍ଷ୍ମୀ ଏବଂ ଭଗବାନ ମହାକାଳଙ୍କ ପୂଜା ଓ ଅଭିଷେକ କରାଯିବ। ଏହି ଅବସରରେ ଭଗବାନ ମହାକାଳଙ୍କୁ ରୁପା ମୁଦ୍ରା ଅର୍ପଣ କରାଯିବା ସହ ଧନ କୁବେର ଏବଂ ରୁପା ମୁଦ୍ରାଗୁଡ଼ିକର ମଧ୍ୟ ପୂଜା କରାଯିବ।
ପୁରୋହିତ ସମିତିର ପୁରୋହିତ ବୈଭବ, ଆରୋଗ୍ୟ, ସୁଖ ଓ ସମୃଦ୍ଧି ସହିତ ଜନକଲ୍ୟାଣ ଏବଂ ବିଶ୍ୱକଲ୍ୟାଣ କାମନା କରି ମହାପୂଜା କରିବେ। ପ୍ରଥମେ ଗଣପତି ପୂଜା ଏବଂ ମହାଲକ୍ଷ୍ମୀ ପୂଜାରୁ ଆରମ୍ଭ ହେବ ଏହି ପୂଜାର୍ଚ୍ଚନା। ଏହାପରେ ଭଗବାନ ମହାକାଳଙ୍କ ପଞ୍ଚାମୃତ ପୂଜା ଏବଂ ରୁଦ୍ରାଭିଷେକ କରାଯିବ। ଏହି ଆୟୋଜନରେ ଜିଲ୍ଲାପାଳ ରୋଶନ କୁମାର ସିଂହ, ଏସ୍ପି ପ୍ରଦୀପ ଶର୍ମା, ମନ୍ଦିର ପ୍ରଶାସକ ପ୍ରଥମ କୌଶିକଙ୍କ ସମେତ ପୁଜାରୀ ଓ ପୁରୋହିତମାନେ ସାମିଲ ହେବେ।
ପୁରୋହିତ ସମିତିର ଅଧ୍ୟକ୍ଷ ଲୋକେଶ ବ୍ୟାସଙ୍କ କହିବା ଅନୁଯାୟୀ, ଧନତେରସ ଅବସରରେ ହେଉଥିବା ଏହି ପୂଜା ମନ୍ଦିରର ପରମ୍ପରାର ଏକ ଅଂଶ। ଏଥିରେ ସମସ୍ତଙ୍କ ସୁଖ, ସମୃଦ୍ଧି ଓ ଆରୋଗ୍ୟ ସହିତ ବିଶ୍ୱକଲ୍ୟାଣ ପାଇଁ ପ୍ରାର୍ଥନା କରାଯିବ। ଏହି ମହାପୂଜା ସହିତ ମହାକାଳ ମନ୍ଦିରରେ ଦୀପୋତ୍ସବର ଧାର୍ମିକ କାର୍ଯ୍ୟକ୍ରମ ଆରମ୍ଭ ହେବ।
ହିନ୍ଦୁସ୍ଥାନ ସମାଚାର / ସ୍ୱାଗତିକା
