ବଲାଙ୍ଗିର, ୨୪ ଫେବୃଆରୀ (ହି.ସ.)-

ସ୍ଥାନୀୟ ବଲାଙ୍ଗିର ସାମ୍ବାଦିକ ଭବନ ଠାରେ କବି ଗଣେଶ ବାରିକ୍ ଙ୍କ ଅନୁବାଦ କବିତା ସଂକଳନ 'ସାଁପ୍ ଡେରନାର ଖେଲ୍' ର ଲୋକାର୍ପଣ ଅନୁଷ୍ଠିତ ହୋଇଯାଇଛି । କବି ସୁଶାନ୍ତ ବାଗଙ୍କ ସଭାପତିତ୍ୱରେ ଅନୁଷ୍ଠିତ ବୈଠକରେ ମୁଖ୍ୟ ଅତିଥି ଭାବେ କବି ତଥା ଅନୁବାଦକ ଭାଗିରଥି ମିଶ୍ର, ମୁଖ୍ୟବକ୍ତା ଭାବରେ କବି ଗାଳ୍ପିକ ଓ ସମୀକ୍ଷକ ହିମାଂଶୁ ପରିଡ଼ା ଓ ସମ୍ମାନିତ ଅତିଥି ଭାବରେ ମୂଳ ବହିର ଲେଖକ କବି ମନୋରଞ୍ଜନ ସାହୁ ଯୋଗଦାନ କରିଥିବା ବେଳେ ପ୍ରଥମେ ଇଂରାଜୀ ଭାଷାରେ ଅନୁବାଦ କରିଥିବା କବି ପିତାମ୍ବର ନାଏକ ହାଇଦ୍ରାବାଦରୁ ବହି ସମ୍ପର୍କରେ ନିଜର ଦେଇଥିବା ବାର୍ତ୍ତାକୁ ଗଣେଶ ବାରିକ୍ ପଢ଼ି ଶୁଣାଇଥିଲେ । ପରେ ଅନୁବାଦ ସାହିତ୍ୟ ଲେଖିବା କେତେ କାଠିକର ପାଠ ଏବଂ ଅନୁବାଦ ସାହିତ୍ୟର ସୌନ୍ଦର୍ଯ୍ୟ ଆଉ ଅନୁବାଦ ସାହିତ୍ୟର ଭୂମିକା ଏବଂ ଭାଷା ସହ ଭାଷାର ସମ୍ପର୍କ ପାଇଁ ଅନୁବାଦ କେତେ ଜରୁରୀ ସେଇ ବାବଦରେ ଅତିଥିମାନେ ମତବ୍ୟକ୍ତ କରିଥିଲେ। ଉନ୍ମୋଚନ ପୁସ୍ତକର ଅନୁବାଦ କବିତାଗୁଡିକୁ କବି ରମାକାନ୍ତ ନାଏକ ଓ କବି ସୁଜିତ୍ କୁମାର ଶତପଥୀ ଆବୃତ୍ତି କରିଥିବା ବେଳେ କାର୍ଯ୍ୟକ୍ରମକୁ ସଂଯୋଜନା କରିଥିଲେ କବି ରତ୍ନମୟ ତ୍ରିପାଠୀ । ଶେଷରେ ଗଣେଶ ବାରିକ୍ ଧନ୍ୟବାଦ ଜ୍ଞାପନ କରିଥିଲେ l ମଧ୍ୟାହ୍ନ ଭୋଜନ ପରେ ଏକ ବର୍ଣ୍ଣାଢ଼୍ୟ କବିତା ଆସର ଅନୁଷ୍ଠିତ ହୋଇଥିଲା । କବି ପ୍ରହ୍ଲାଦ ଶତପଥୀଙ୍କ ସଭାପତିତ୍ୱରେ ମୁଖ୍ୟ ଅତିଥି ଭାବରେ ଅନୁବାଦିକା ତଥା କବିୟତ୍ରୀ ସଂଘମିତ୍ରା ଦାଶ, ସମ୍ମାନୀତ ଅତିଥି ଭାବରେ ଅଧ୍ୟାପକ ଶିବ ପ୍ରସାଦ ସା ଯୋଗଦେଇଥିଲେ । ପ୍ରଥମେ କବି ମନୋରଞ୍ଜନ ସାହୁ ଉନ୍ମୋଚନ ପୁସ୍ତକର ଶୀର୍ଷକ କବିତା ପଡ଼ିଥିବା ବେଳେ ରାଜେନ୍ଦ୍ର ବିଶ୍ୱବିଦ୍ୟାଳୟର ହିନ୍ଦୀ ବିଭାଗର ମୁଖ୍ୟ ରୁପଧର ଗମାଙ୍ଗ ହିନ୍ଦୀ ଅନୁବାଦ କବିତା ପଢ଼ିଥିଲେ। ସଭାରେ ଭୀମଭୋଇ, ଗଙ୍ଗାଧର ମେହେରଙ୍କ ଠାରୁ ଆରମ୍ଭ କରି କବି ପାବ୍ଲୋ ନେରୁଦା ଯାଏଁ ସମସ୍ତଙ୍କର କବିତା ଆବୃତ୍ତି କରାଯାଇଥିଲା ।

ଅନ୍ୟ ମାନଙ୍କ ମଧ୍ୟରେ ଲକ୍ଷ୍ମୀଧର ବିଭାର, ଦିଲ୍ଲିପ ପୁରୋହିତ, ରମାକାନ୍ତ ସାହୁ, ପ୍ରିୟତୋଷ ଦଳାଇ, ତପସ୍ୱିନୀ ପଶାୟତ, ବାସନ୍ତୀ ମଂଜୁରୀ ହନୁମାନ, ଦିଲ୍ଲୀପ ପଶାୟତ, ମଧୁସୂଦନ ଦାଶ, ମୃଗେଶ ବୈଷ୍ଣବ ପାଣିଗ୍ରାହୀ ପ୍ରମୁଖ କବିତା ଆବୃତ୍ତି କରିଥିଲେ। କବିତା ସବୁକୁ ସଂଯୋଜନା କରିଥିଲେ କବି ଚନ୍ଦନ ନାଗ ଓ କବି ନିର୍ମାଲ୍ୟ ସ୍ବାଇଁ । କାର୍ଯ୍ୟକ୍ରମକୁ ପରିଚାଳନାରେ ଆଶୁତୋଷ ମିଶ୍ର, ଗଣେଶରାମ ମିଶ୍ର, କର୍ଣ୍ଣ ବାରିକ୍ ସହଯୋଗ କରିଥିଲେ।

ହିନ୍ଦୁସ୍ଥାନ ସମାଚାର / ଗୋପବନ୍ଧୁ