ସମ୍ବଲପୁର, ୨୫, ଫେବ୍ରୁଆରୀ (ହି.ସ.) ଗତ କିଛି ଦିନ ତଳେ ସମ୍ବଲପୁର ଜିଲ୍ଲା ପ୍ରଶାସନ ସହରର ବିଭିନ୍ନ ସ୍ଥାନରେ ବର୍ଷ ବର୍ଷ ଧରି ମୁଣ୍ଡ ଟେକିଥିବା ଜବରଦଖଲକୁ ଦୃଢ଼ ହସ୍ତରେ ଉଛେଦ କରିଥିବା ଦେଖିବାକୁ ମିଳିଥିଲା । ଏଥିପାଇଁ ଜିଲ୍ଲା ପ୍ରଶାସନ ଓ ସମ୍ବଲପୁର ମହାନଗର ନିଗମକୁ ଲୋକେ ପ୍ରଶଂସା ଓ ବହୁ ଉଚ୍ଚପ୍ରଶଂସା ମଧ୍ୟ କରିଥିଲେ । ହେଲେ ଅଧିକାରୀଙ୍କ ଠୁଁ କର୍ମଚାରୀ ପର୍ଯ୍ୟନ୍ତ ମାସିକ ମୋଟା ବେତନ ପାଉଥିଲେ ମଧ୍ୟ ନିଅଂଟିଆ ଓ ଅଭାବ କେଉଁଠି ରହିଲା ତାହା ଏବେ ନିର୍ଦ୍ଧିଷ୍ଟ ମହଲରେ ଅନୁସନ୍ଧାନ ଆରମ୍ଭ ହୋଇଥିବା ଶୁଣିବାକୁ ମିଳିଛି । ସୂଚନାନୁଯାୟୀ ମହାନଗର ନିଗମର ଉଚ୍ଛେଦ ପ୍ରକ୍ରିୟା ବେଳେ ବହୁ ଗରିବ ଗୁରୁବାଙ୍କ କାନ୍ଦ ବୋବାଳି ଓ ଅସହାୟତାକୁ ଅଣଦେଖା କରାଯାଇଥିଲା । ଯାହା ଭଙ୍ଗାଗଲା ଭଙ୍ଗାଗଲା, ଆଉ ଅନେକ ସାମଗ୍ରୀ ଜବତ ମଧ୍ୟ କରାଯାଇଥିଲା । ହେଲେ ସ୍ପଷ୍ଟ ଦିବାଲୋକରେ ଗରିବ ଗୁରୁବାଙ୍କ ଭଙ୍ଗା ଆଜବେଷ୍ଟସ, ଲୁହା ଟୁକୁରା ସାମଗ୍ରୀକୁ ନିଜ ଗାଡ଼ିରେ ନେଇ କୌଣସି କବାଡ଼ି ଗୋଦାମକୁ ଯାଇ ବିକ୍ରି କରିବା ଘଟଣା ସମ୍ପ୍ରତି ମହାନଗର ନିଗମର ଆଭିମୁଖ୍ୟ ପ୍ରତି ପ୍ରଶ୍ନବାଚୀ ସୃଷ୍ଟି କରାଇଛି । କାହାର ଏତେ ଅଭାବ ପଡ଼ିଲା, ଯାହାକି ଅଫିସ୍ ଗାଡ଼ିରେ ଭଙ୍ଗା ଦଦରା ଜିନିଷ ବିକିବାକୁ କବାଡ଼ି ଦୋକାନକୁ ଯିବାକୁ ପରିସ୍ଥିତି ବାଧ୍ୟ କଲା । ଏବେ ଏହି ଦୃଶ୍ୟର ଭିଡିଓ ଫୁଟେଜ୍ ବିଭିନ୍ନ ସୋସିଆଲ ମିଡିଆରେ ଭାଇରାଲ ହେଉଥିବା ବେଳେ ଏବାବଦରେ କ'ଣ ସଫେଇ ଦିଆଯିବ ସେନେଇ ନିର୍ଦ୍ଧିଷ୍ଟ କର୍ମଚାରୀଙ୍କ ରୁଦ୍ଧଦ୍ୱାର ବୈଠକ ଏବେ ଚର୍ଚ୍ଚାର ପ୍ରସଙ୍ଗ ପାଲଟିଛି ।
---------------
ହିନ୍ଦୁସ୍ଥାନ ସମାଚାର / ଶୈଳେଶ
