ସମ୍ବଲପୁର,୨୫, ମାର୍ଚ୍ଚ (ହି.ସ.) ପେନସନ ଭେଲିଡେସନ ଆକ୍ଟ ପ୍ରତ୍ୟାହାର ଦାବୀ ନେଇ ଆଜି ଅବସରପ୍ରାପ୍ତ ଶିକ୍ଷକ ଏବଂ କର୍ମଚାରୀ ମାନେ ପ୍ରଧାନମନ୍ତ୍ରୀଙ୍କ ଉଦ୍ଦେଶ୍ୟ ରେ ସ୍ମାରକ ପତ୍ର ପ୍ରଦାନ କରିଛନ୍ତି। ସର୍ବଭାରତୀୟ ପେନସନର ଫେଡରେସନ ଓ ଓଡିଶା ରାଜ୍ୟ ଶିକ୍ଷକ କର୍ମଚାରୀ ସଂଗଠନ ର ଆହ୍ୱାନ କ୍ରମେ ସମ୍ବଲପୁର ଜିଲ୍ଲା ଶିକ୍ଷକ ଓ କର୍ମଚାରୀ ସଂଘ ତରଫରୁ ଜିଲାପାଳ ଙ୍କ ଜରିଆରେ ଏକ ସ୍ମାରକପତ୍ର ପ୍ରଧାନମନ୍ତ୍ରୀ ଙ୍କ ଉଦେଶ୍ୟରେ ପ୍ରଦାନ କରାଯାଇଥିଲା। ଜିଲ୍ଲାପାଳ ଙ୍କ ଅନୁପସ୍ଥିତି ରେ ଅତିରିକ୍ତ ଜିଲାପାଳ ସୁଧାଂଶୁ କୁମାର ଭୋଇ ସ୍ମାରକ ପତ୍ର ଗ୍ରହଣ କରିଥିଲେ।ଆସନ୍ତା ଅଷ୍ଟମ ଦରମା ସମିକରଣ କମିଟି ର ସୁପାରିଶ କୁ ଚଳିତ ବର୍ଷ ଜାନୁୟାରୀ ୧ ତାରିଖ ପୂର୍ବରୁ ଅବସର ନେଇଥିବା କେନ୍ଦ୍ର ଓ ରାଜ୍ୟ ର ପେନସନ ଭୋଗୀ ଙ୍କ ପାଇଁ ଲାଗୁ ନକରିବା ପାଇଁ ସଂସଦରେ ଗତ ବର୍ଷ ମାର୍ଚ୍ଚ ୨୫ ରେ ତରବରିଆ ଭାବେ କେନ୍ଦ୍ର ସରକାର ଏହି ଆକ୍ଟ କୁ ଗୃହୀତ କରାଇଛନ୍ତି। ଏହାଦ୍ୱାରା ସମଗ୍ର ଦେଶ ରେ କେନ୍ଦ୍ର ଓ ରାଜ୍ୟ ସରକାରଙ୍କ ପେନସନର ମାନେ ନାହିଁ ନ ଥିବା କ୍ଷତି ର ସମ୍ମୁଖୀନ ହେବେ ଓ ପେନସନ ଏକପ୍ରକାର ସ୍ଥାଣୁ ହୋଇଯିବାର ଆଶଙ୍କା ସୃଷ୍ଟି ହୋଇଛି। ଏହି ପରିପ୍ରେକ୍ଷୀରେ ଏହି ଆକ୍ଟ କୁ ଏକ କଳା ଆଇନ ଦର୍ଶାଇ ସମଗ୍ର ଦେଶ ର ପ୍ରତିବାଦ ସ୍ବରୂପ ଆଜି ସମ୍ବଲପୁର ଜିଲ୍ଲା ରେ ସ୍ମାରକ ପତ୍ର ପ୍ରଦାନ କରାଯାଇ ଏହି ଆଇନକୁ ପ୍ରତ୍ୟାହାର ଦାବି କରାଯାଇଛି। ସଂଗଠନ ର ସଭାପତି ହୀରାଲାଲ ବାରିକ ଓ ସମ୍ପାଦକ ରାଜେନ୍ଦ୍ର ପଣ୍ଡାଙ୍କ ନେତୃତ୍ୱରେ ବିଭିନ୍ନ ବ୍ଲକ ର ଅନେକ ଶିକ୍ଷକ ପ୍ରତିନିଧି ଆନ୍ଦୋଳନ ରେ ସାମିଲ ହୋଇ ବିକ୍ଷୋଭ ପ୍ରଦର୍ଶନ କରିଥିଲେ। ଏହାପରେ ମଧ୍ୟ ଯଦି ଏହି ଆଇନ ପ୍ରତ୍ୟାହାର ନ ହୁଏ ଆଗାମୀ ଦିନ ଭୟଙ୍କର ଆନ୍ଦୋଳନ ହେବ ବୋଲି ସଂଗଠନ ପକ୍ଷରୁ ସୂଚନା ଦିଆଯାଇଛି।

---------------

ହିନ୍ଦୁସ୍ଥାନ ସମାଚାର / ଶୈଳେଶ