Bhubaneswar, 02 ଏପ୍ରିଲ୍ (ହି.ସ.)

ଦେଶରେ ନୂତନ ଶ୍ରମ କୋଡ୍ର କାର୍ଯ୍ୟକାରିତାକୁ ବିରୋଧ କରି ଆଜି ଭୁବନେଶ୍ୱରଠାରେ କେନ୍ଦ୍ରୀୟ ଶ୍ରମିକ ସଂଗଠନଗୁଡ଼ିକ ପକ୍ଷରୁ ଏକ ‘କଳା ଦିବସ’ ପାଳନ କରାଯାଇଛି। ଏହି ବିକ୍ଷୋଭ ପ୍ରଦର୍ଶନରେ ଭାରତୀୟ ଜାତୀୟ ଶ୍ରମିକ କଂଗ୍ରେସ (INTUC), ସର୍ବଭାରତୀୟ ଟ୍ରେଡ୍ ୟୁନିୟନ କଂଗ୍ରେସ (AITUC), ହିନ୍ଦ ମଜଦୁର ସଭା (HMS), ସେଣ୍ଟର ଅଫ୍ ଇଣ୍ଡିଆନ୍ ଟ୍ରେଡ୍ ୟୁନିୟନ (CITU), ସର୍ବଭାରତୀୟ ସଂଯୁକ୍ତ ଟ୍ରେଡ୍ ୟୁନିୟନ କେନ୍ଦ୍ର (AIUTUC), ସର୍ବଭାରତୀୟ କେନ୍ଦ୍ରୀୟ କାଉନସିଲ୍ ଅଫ୍ ଟ୍ରେଡ୍ ୟୁନିୟନ (AICCTU), ଟ୍ରେଡ୍ ୟୁନିୟନ ସମନ୍ୱୟ କେନ୍ଦ୍ର (TUCC) ଏବଂ ଲେବର ପ୍ରୋଗ୍ରେସିଭ୍ ଫେଡେରେସନ୍ (LPF) ଭଳି ପ୍ରମୁଖ ଶ୍ରମିକ ସଂଗଠନଗୁଡ଼ିକ ଅଂଶଗ୍ରହଣ କରିଥିଲେ।

ଏହି ଅବସରରେ ଶ୍ରମିକ ନେତାମାନେ ଭାରତୀୟ ଜନତା ପାର୍ଟି ନେତୃତ୍ୱାଧୀନ ସରକାରଙ୍କ ନୀତିକୁ କଠୋର ସମାଲୋଚନା କରି କହିଥିଲେ ଯେ, ଏହି ନୂତନ ଶ୍ରମ କୋଡ୍ ଶ୍ରମିକ ବିରୋଧୀ ଏବଂ ଏହା ଶ୍ରମିକ ଶ୍ରେଣୀର ଅଧିକାରକୁ କ୍ଷୁର୍ଣ୍ଣ କରିବ। ଏହି କୋଡ୍ ଗୁଡ଼ିକର କାର୍ଯ୍ୟକାରିତା ଫଳରେ ବହୁଳ ଭାବେ ଛଟେଇ ବଢ଼ିବ, ଚାକିରିର ସୁରକ୍ଷା ଦୁର୍ବଳ ହେବ ଏବଂ ପ୍ରବାସୀ ତଥା ଅସଂଗଠିତ କ୍ଷେତ୍ରର ଶ୍ରମିକମାନଙ୍କୁ ସଠିକ୍ ସୁରକ୍ଷା ମିଳିବ ନାହିଁ ବୋଲି ସେମାନେ ଉଦ୍ବେଗ ପ୍ରକାଶ କରିଛନ୍ତି।

ସମାବେଶକୁ ସମ୍ବୋଧିତ କରିଥିବା ପ୍ରମୁଖ ନେତାମାନଙ୍କ ମଧ୍ୟରେ INTUC ରୁ କିଶୋର ଜେନା, ମଦନ ମୋହନ ଧଳ ଓ ଶ୍ୟାମ ସୁନ୍ଦର ମହାପାତ୍ର; AITUC ରୁ ବିଜୟ ଜେନା, ଜୟନ୍ତ ଦାସ ଓ ସୁର ଜେନା; HMS ରୁ ରଣେନ୍ଦ୍ର ପ୍ରତାପ ସ୍ୱାଇଁ ଓ ବି.ଏନ୍. ମହାପାତ୍ର; CITU ରୁ ବିଷ୍ଣୁ ମହାନ୍ତି, ଦୁଷ୍ମନ୍ତ ଦାସ ଓ ପ୍ରଦୀପ ନାୟକ; AIUTUC ରୁ ଜୟସେନ ମେହେର, ନିରଞ୍ଜନ ମହାନ୍ତି ଓ ପୂର୍ଣ୍ଣ ବେହେରା; AICCTU ରୁ ମହେନ୍ଦ୍ର ପରିଡ଼ା, ରାଧାକାନ୍ତ ସେଠୀ ଓ ବଂଶୀଧର ପରିଡ଼ା; TUCC ରୁ ଜ୍ୟୋତିରଞ୍ଜନ ମହାପାତ୍ର, ଲକ୍ଷ୍ମୀ ଡୋରା ଓ ସୁଶୀଲ ଥାନପତି ଏବଂ LPF ରୁ ଅର୍ଚ୍ଚନା ପରିଡ଼ା, ପ୍ରଣତି ମିଶ୍ର, ନମିତା ସାହୁ , ରିଙ୍କି ସାହୁ ପ୍ରମୁଖ ସାମିଲ ଥିଲେ।

ବକ୍ତାମାନେ ସାମୂହିକ ଭାବେ ଶ୍ରମ କୋଡ୍କୁ ତୁରନ୍ତ ପ୍ରତ୍ୟାହାର କରିବାକୁ ଦାବି କରିଛନ୍ତି। ଯଦି ସରକାର ଏଥିରେ ବିଫଳ ହୁଅନ୍ତି, ତେବେ ଆଗାମୀ ଦିନରେ ସାରା ଦେଶରେ ବିକ୍ଷୋଭ ଓ ଆନ୍ଦୋଳନକୁ ଆହୁରି ତୀବ୍ରତର କରାଯିବ ବୋଲି ଚେତାବନୀ ଦିଆଯାଇଛି। ଏଥିପାଇଁ ସରକାର ସମ୍ପୂର୍ଣ୍ଣ ଦାୟୀ ରହିବେ ବୋଲି ସେମାନେ କହିଛନ୍ତି।

ଶେଷରେ, ଦେଶର ଶ୍ରମିକ ଅଧିକାରକୁ ସୁରକ୍ଷିତ ରଖିବା ପାଇଁ ଶ୍ରମିକ ସଂଗ୍ରାମକୁ ଅଧିକ ଶକ୍ତିଶାଳୀ କରିବାକୁ ଏକଜୁଟ୍ ହୋଇ ଆହ୍ୱାନ ଦିଆଯାଇ କାର୍ଯ୍ୟକ୍ରମ ଶେଷ ହୋଇଥିଲା।

---------------

ହିନ୍ଦୁସ୍ଥାନ ସମାଚାର / ରଶ୍ମିତା