ଜୟପୁର, ୨୩ ଏପ୍ରିଲ୍ (ହି.ସ.)- ଆରମ୍ଭ ହୋଇଛି ଜନ ଗଣନା-୨୦୨୭ କାର୍ଯ୍ୟକ୍ରମର ପ୍ରଥମ ପର୍ଯ୍ୟାୟ l ଏହି ପରିପେକ୍ଷୀରେ ଜନ ଗଣନା ଦାୟିତ୍ୱରେ ଥିବା ଶିକ୍ଷକଙ୍କୁ ଜିଲ୍ଲାର ସୀମାନ୍ତ ଅଂଚଳ ବାସୀ ସହଯୋଗ କରୁନଥିବା ଅଭିଯୋଗ ପରେ ଆଜି ନିଜେ ଜୟପୁର ଉପଜିଲ୍ଲାପାଳ ଯଦୁମଣି ନାୟକ ସୀମାନ୍ତ ଅଂଚଳ ଗାଁ ରେ ପହଂଚି ଲୋକଙ୍କୁ ବୁଝାସୁଝା କରିଛନ୍ତି l

କୋରାପୁଟ ଓ ମାଲକାନଗିରି ଜିଲ୍ଲାର ସୀମାନ୍ତ ଅଂଚଳ କୁଲାବେଡା ଗାଁ ଟି ବୈପାରୀଗୁଡା ବ୍ଲକ ଅନ୍ତର୍ଗତ ଦଣ୍ଡାବାଡ଼ି ପଂଚାୟତ ଅଧିନରେ ଅବସ୍ଥିତ l ହେଲେ ଏହି କୁଲାବେଡା ଗାଁ ଲୋକେ ଜନ ଗଣନା ଦାୟିତ୍ୱରେ ଥିବା ଚିପାକୁର ହାଇସ୍କୁଲର ଶିକ୍ଷକଙ୍କୁ ସହଯୋଗ କରିନଥିଲେ l ଏନେଇ ଶିକ୍ଷକ ସ୍ଥାନୀୟ ତହସିଲଦାର ସିଂଗ୍ଧା ଚୌଧୁରୀଙ୍କୁ ଜଣାଇବା ପରେ ଉପଜିଲ୍ଲାପାଳଙ୍କ ନଜକୁ ଅଣାଗଲା l ସୂଚନା ପାଇ ଆଜି ଜୟପୁର ଉପଜିଲ୍ଲାପାଳ କୋରାପୁଟ ଓ ମାଲକାନଗିରି ଜିଲ୍ଲାର ସୀମାନ୍ତ ଅଂଚଳ କୁଲାବେଡା ଗାଁରେ ପହଂଚି ଲୋକଙ୍କ ସମସ୍ୟା ପଚାରି ବୁଝିଥିଲେ l ଜନ ଗଣନା-୨୦୨୭ କାର୍ଯ୍ୟକ୍ରମରେ ପ୍ରଶାସନକୁ ସହଯୋଗ କରିବା ପାଇଁ ଅନୁରୋଧ କରିଥିଲେ l

ଗାଁ ଲୋକଙ୍କ ଅଭିଯୋଗ ଅନୁଯାୟୀ, କୁଲାବେଡା ଗାଁ ଟି ୨ ଜିଲ୍ଲା ସୀମାନ୍ତରେ ଅବସ୍ଥିତ l ଅଧିକାଂଶ ପରିବାର ମାଲକାନଗିରି ଜିଲ୍ଲା ପ୍ରଶାସନ ତରଫରୁ ସମସ୍ତ ସରକାରୀ ସୁବିଧା ପାଉଛନ୍ତି କିନ୍ତୁ ସେମାନଙ୍କ ଜମିବାଡ଼ି ପଟ୍ଟା କୋରାପୁଟ ଜିଲ୍ଲାରେ ରହିଛି l ଦୀର୍ଘ ଦିନରୁ କୁଲାବେଡାରେ କୋରାପୁଟ ପ୍ରଶାସନ ତରଫରୁ ମେଡିକାଲ, ସ୍କୁଲ ଭଳି ବିଭିନ୍ନ ମୌଳିକ ସୁବିଧା ଯୋଗାଇ ଦେବା ପାଇଁ ଦାବୀ ରହିଛି l କିନ୍ତୁ ପ୍ରଶାସନ ଏଥିପ୍ରତି ଦୃଷ୍ଟି ଦେଇନଥିବାରୁ ଏଭଳି ଜନଗଣନାକୁ କୁଲାବେଡା ଗାଁ ଲୋକେ ବିରୋଧ କରିଛନ୍ତି l

ହିନ୍ଦୁସ୍ଥାନ ସମାଚାର / ପିକେପି