ବିଶ୍ଵନାଥ (ଆସାମ), ୫ ଅପ୍ରେଲ (ହି.ସ.)- ଆସାମର ବିଶ୍ୱନାଥରେ ଏକ ସାଧାରଣ ସଭାକୁ ସମ୍ବୋଧିତ କରି ଲୋକସଭା ସାଂସଦ ତଥା ବିରୋଧୀ ଦଳ ନେତା ରାହୁଲ ଗାନ୍ଧୀ ରବିବାର ଦିନ ମୁଖ୍ୟମନ୍ତ୍ରୀ ଡକ୍ଟର ହିମନ୍ତ ବିଶ୍ୱ ଶର୍ମାଙ୍କ ଉପରେ କଠୋର ଆକ୍ରମଣ କରିଥିଲେ । ସେ କହିଥିଲେ ଯେ, ମୁଖ୍ୟମନ୍ତ୍ରୀଙ୍କ ବିରୁଦ୍ଧରେ ଆଇନଗତ କାର୍ଯ୍ୟାନୁଷ୍ଠାନ ନିଆଯିବ ଏବଂ ଗୋଟିଏ ଦିନ ଆସିବ ଯେତେବେଳେ ତାଙ୍କୁ ଆସାମବାସୀଙ୍କ ନିକଟରେ ହାତ ଯୋଡ଼ି କ୍ଷମା ମାଗିବାକୁ ପଡିବ ।

ତାଙ୍କ ଭାଷଣର ଆରମ୍ଭରେ ରାହୁଲ ଗାନ୍ଧୀ ଆସାମର ସାଂସ୍କୃତିକ ଐତିହ୍ୟ ବିଷୟରେ ଉଲ୍ଲେଖ କରି କହିଥିଲେ ଯେ, ଏହି ଭୂମି ଶ୍ରୀମନ୍ତ ଶଙ୍କରଦେବ, ଅଜାନ ଫକିର, ଜୁବୀନ ଗର୍ଗ ଏବଂ ତରୁଣ ଗୋଗୋଇଙ୍କର । ସେ କହିଥିଲେ ଯେ, ଜୁବୀନ ଗର୍ଗ ସର୍ବଦା ସମାଜକୁ ଏକତ୍ର କରିବା ପାଇଁ କାମ କରିଥିଲେ ଏବଂ କେବେ କାହାର ଭାବନାକୁ ଆଘାତ ଦେଇ ନଥିଲେ ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ କେନ୍ଦ୍ର ସରକାରଙ୍କୁ ଟାର୍ଗେଟ କରି ସେ ଅଭିଯୋଗ କରିଥିଲେ ଯେ ଆସାମକୁ ଏକ ଏଟିଏମ୍ ପରି ବ୍ୟବହାର କରାଯାଉଛି । ରାଜ୍ୟର ଜମି ଗୌତମ ଆଦାନୀ ଏବଂ ବାବା ରାମଦେବଙ୍କ ଭଳି ଶିଳ୍ପପତିଙ୍କୁ ଦିଆଯାଉଛି, ଯେତେବେଳେ ଏହି ଜମି ଆସାମର ଜନସାଧାରଣ ଏବଂ ଚାଷୀଙ୍କର । ସେ କହିଛନ୍ତି ଯେ, ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଯେକୌଣସି ସମୟରେ ପ୍ରଧାନମନ୍ତ୍ରୀ ମୋଦିଙ୍କ ରାଜନୈତିକ କ୍ୟାରିଅରକୁ ଶେଷ କରିପାରନ୍ତି । ସେ ନରେନ୍ଦ୍ର ମୋଦି ଏବଂ ଅମିତ ଶାହଙ୍କ ଉପରେ ଭ୍ରଷ୍ଟାଚାରର ମଧ୍ୟ ଅଭିଯୋଗ ଆଣିଥିଲେ ।

ହିନ୍ଦୁସ୍ଥାନ ସମାଚାର / ପ୍ରଦୀପ୍ତ