ଭୁବନେଶ୍ୱର, ୦୮ ଜୁନ (ହି.ସ)- ସୋମବାର ଠାରୁ ରାଜ୍ୟର ସମସ୍ତ ପୌରାଂଚଳରେ ୧୩ ଦିନିଆ ନାଗରିକ ସର୍ମ୍ପର୍କ ଅଭିଯାନ ଆରମ୍ଭ ହେଉଛି। ସହରାଂଚଳ ନାଗରିକ ସମ୍ପର୍କ ନାଗରିକ-କୈନ୍ଦ୍ରିକ ସହରୀ ଶାସନକୁ ସଦୃଢ଼ କରିବା ଏବଂ ସହରୀ ବିକାଶରେ ଜନସାଧାରଣଙ୍କ ଅଂଶଗ୍ରହଣକୁ ବୃଦ୍ଧି କରିବା ପାଇଁ ଏକ ପ୍ରମୁଖ ପଦକ୍ଷେପ ସ୍ୱରୂପ ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ ପକ୍ଷରୁ ସମସ୍ତ ପୌରାଂଚଳରେ ଜୁନ୍ ୯ରୁ ଜୁନ୍ ୨୧ ପର୍ଯ୍ୟନ୍ତ ଏକ ରାଜ୍ୟବ୍ୟାପୀ ସହରାଂଚଳ ଜନସମ୍ପର୍କ ଓ ନାଗରିକ ଭାଗିଦାରୀ କାର୍ଯ୍ୟକ୍ରମ ଆରମ୍ଭ କରାଯାଉଛି।

ଗୃହ ନିର୍ମାଣ ଓ ନଗର ଉନ୍ନୟନ ମନ୍ତ୍ରୀ ଡକ୍ଟର କୃଷ୍ଣ ଚନ୍ଦ୍ର ମହାପାତ୍ର କହିଛନ୍ତି ଯେ ସହରୀ ରୂପାନ୍ତରଣ ପଦକ୍ଷେପଗୁଡ଼ିକର ସଫଳତା ପାଇଁ ସକ୍ରିୟ ନାଗରିକ ଅଂଶଗ୍ରହଣ ଅତ୍ୟନ୍ତ ଜରୁରୀ। ଓଡ଼ିଶା ସରକାର ସହରଗୁଡ଼ିକୁ କେବଳ ଆଧୁନିକ ଓ ସ୍ଥିତିସ୍ଥାପକ ନୁହେଁ, ବରଂ ଲୋକଙ୍କ ଆବଶ୍ୟକତା ଓ ଆକାଂକ୍ଷା ପ୍ରତି ସମ୍ବେଦନଶୀଳ କରିବା ପାଇଁ ପ୍ରତିଶ୍ରୁତିବଦ୍ଧ। ଏହି ରାଜ୍ୟବ୍ୟାପୀ ଜନସମ୍ପର୍କ ଅଭିଯାନ ନାଗରିକ ଏବଂ ସହରୀ ସଂସ୍ଥାଗୁଡ଼ିକ ମଧ୍ୟରେ ଥିବା ଦୂରତାକୁ ଦୂର କରିବାରେ ସାହାଯ୍ୟ କରିବ, ଯାହାଦ୍ୱାରା ସରକାରୀ ସେବାଗୁଡ଼ିକ ଅଧିକ ସୁଗମ, ସ୍ୱଚ୍ଛ ଏବଂ ଉତରଦାୟୀ ହୋଇପାରିବ। ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀଙ୍କ ନେତୃତ୍ୱରେ ଆମେ ଜନ-କୈନ୍ଦ୍ରିକ ସହର ଗଠନ ଦିଗରେ କାର୍ଯ୍ୟ କରୁଛୁ, ଯେଉଁଠାରେ ପ୍ରତ୍ୟେକ ନାଗରିକ ବିକାଶର ଜଣେ ଜଣେ ସକ୍ରିୟ ସହଭାଗୀ ହେବେ, ବୋଲି ମନ୍ତ୍ରୀ ଡଃ ମହାପାତ୍ର ପ୍ରକାଶ କରିଛନ୍ତି।

ସଚେତନତା ଶୋଭାଯାତ୍ରା, ୱାର୍ଡ ସ୍ତରୀୟ ବୈଠକ, ଜନ ପରାମର୍ଶ, ସ୍ୱଚ୍ଛତା ଅଭିଯାନ, ସମ୍ପ୍ରଦାୟର ସହଭାଗିତା କାର୍ଯ୍ୟକ୍ରମ ଏବଂ ସୂଚନା, ଶିକ୍ଷା ଓ ଯୋଗାଯୋଗ କାର୍ଯ୍ୟକ୍ରମ ସମେତ ବିଭିନ୍ନ ନାଗରିକ-କୈନ୍ଦ୍ରିକ କାର୍ଯ୍ୟକଳାପ ମାଧ୍ୟମରେ ସମସ୍ତ ପୌରାଂଚଳରେ ଏହି ଅଭିଯାନ କାର୍ଯ୍ୟକାରୀ କରାଯିବ। ଏଥିରେ ପରିମଳ, ବର୍ଜ୍ୟବସ୍ତୁ ପରିଚାଳନା, ଜଳ ସଂରକ୍ଷଣ, ପରିବେଶ ସ୍ଥିରତା ଏବଂ ନାଗରିକ ଦାୟିତ୍ୱ ଉପରେ ବିଶେଷ ଗୁରୁତ୍ୱ ଦିଆଯିବ।

ଏହି ଅଭିଯାନର ଏକ ପ୍ରମୁଖ ବୈଶିଷ୍ଟ୍ୟ ହେବ 'ନାଗରିକ ସେବା ପ୍ରଦାନ ଶିବିର' ଏବଂ ଜନସମ୍ପର୍କ କାର୍ଯ୍ୟକ୍ରମର ଆୟୋଜନ, ଯାହା ବିଭିନ୍ନ ପୌରସେବା ଏବଂ ସହରାଂଚଳ କଲ୍ୟାଣକାରୀ ଯୋଜନାଗୁଡ଼ିକୁ ସହଜରେ ଉପଲବ୍ଧ କରାଇବା ପାଇଁ ଉଦ୍ଦିଷ୍ଟ। ନାଗରିକମାନେ ସମ୍ପତି କର , ଜଳ ଯୋଗାଣ ସଂଯୋଗ, ବ୍ୟବସାୟିକ ଲାଇସେନ୍ସ , ଗୃହ ନିର୍ମାଣ ନକ୍ସା ଅନୁମୋଦନ, ଆବାସିକ ଯୋଜନା ଏବଂ ଅନ୍ୟାନ୍ୟ ସର୍ବସାଧାରଣ ସେବା ସମ୍ବନ୍ଧୀୟ ସୂଚନା ଓ ସହାୟତା ପାଇପାରିବେ। ନାଗରିକଙ୍କ ସମସ୍ୟାର ତୁରନ୍ତ ସମାଧାନ ପାଇଁ ଉତ୍ସର୍ଗୀକୃତ ସହାୟତା କେନ୍ଦ୍ର ଏବଂ ଅଭିଯୋଗ ପ୍ରତିକାର ବ୍ୟବସ୍ଥା ମଧ୍ୟ ପ୍ରତିଷ୍ଠା କରାଯିବ।

ଏହି କାର୍ଯ୍ୟକ୍ରମରେ ସ୍ୱୟଂ ସହାୟକ ଗୋଷ୍ଠୀ , ଆବାସିକ କଲ୍ୟାଣ ସମିତି , ଯୁବ ସଂଗଠନ, ବ୍ୟବସାୟୀ ସଂଘ ଏବଂ ଗୋଷ୍ଠୀ-ଭିତିକ ସଂସ୍ଥାଗୁଡ଼ିକର ଅଂଶଗ୍ରହଣକୁ ପ୍ରୋତ୍ସାହିତ କରାଯିବ, ଯାହା ନାଗରିକ ସହଭାଗିତା ଏବଂ ମିଳିତ ସହରୀ ବିକାଶ ପାଇଁ ଏକ ବ୍ୟାପକ ମଂଚ ସୃଷ୍ଟି କରିବ।

ଅଭିଯାନର କାର୍ଯ୍ୟସୂଚୀକୁ ନାଗରିକ ସେବା, ପରିମଳ ଓ ବର୍ଜ୍ୟବସ୍ତୁ ପରିଚାଳନା, ଜଳ ସଂରକ୍ଷଣ, ପରିବେଶ ସ୍ଥିରତା, ଜନସ୍ୱାସ୍ଥ୍ୟ ସଚେତନତା, ମହିଳାଙ୍କ ଅଂଶଗ୍ରହଣ, ଯୁବ ସହଭାଗିତା ଏବଂ ଗୋଷ୍ଠୀ-ନେତୃତ୍ୱାଧୀନ ବିକାଶ ଭଳି ବିଭିନ୍ନ ସହରୀ ଶାସନ ପ୍ରସଙ୍ଗକୁ ଅନ୍ତର୍ଭୁକ୍ତ କରି ପ୍ରସ୍ତୁତ କରାଯାଇଛି। ବ୍ୟାପକ ଜନସମ୍ପର୍କ କାର୍ଯ୍ୟକଳାପ, କ୍ଷେତ୍ର ସ୍ତରୀୟ ଆଲୋଚନା ଏବଂ ଜନ ପରାମର୍ଶ ମାଧ୍ୟମରେ ଏହି କାର୍ଯ୍ୟକ୍ରମ ନାଗରିକମାନଙ୍କ ମଧ୍ୟରେ ମାଲିକାନା ଭାବନାକୁ ସଦୃଢ଼ କରିବା ସହ ଜୀବନ୍ତ ସହରୀ ସମୁଦାୟର ବିକାଶ ଓ ରକ୍ଷଣାବେକ୍ଷଣରେ ସକ୍ରିୟ ଯୋଗଦାନ ଦେବାକୁ ଉତ୍ସାହିତ କରିବ।

ଗୃହ ନିର୍ମାଣ ଓ ନଗର ଉନ୍ନୟନ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ଶ୍ରୀମତୀ ଉଷା ପାଢ଼ୀ ଗୁରୁତ୍ୱାରୋପ କରି କହିଛନ୍ତି ଯେ ପ୍ରଭାବଶାଳୀ ସହରୀ ଶାସନ ପାଇଁ ନାଗରିକଙ୍କ ସହଭାଗିତା ହିଁ ମୂଳଦୁଆ। ଏହି ଅଭିଯାନ ନାଗରିକ ଏବଂ ସହରୀ ସଂସ୍ଥାଗୁଡ଼ିକ ମଧ୍ୟରେ ଅର୍ଥପୂର୍ଣ୍ଣ ଆଲୋଚନା ପାଇଁ ଏକ ବ୍ୟାପକ ମଞ୍ଚ ଭାବରେ ପ୍ରସ୍ତୁତ କରାଯାଇଛି। ଏହା ନାଗରିକ ସେବା ଏବଂ ସରକାରୀ ପଦକ୍ଷେପ ବିଷୟରେ ଜନସଚେତନତା ବୃଦ୍ଧି କରିବା ସହ ନିଜ ସହରର ଯତ୍ନ ନେବା ପାଇଁ ସମୁଦାୟକୁ ଉତ୍ସାହିତ କରିବ। ସେହିପରି, ଏହା ପୌରାଞ୍ଚଳଗୁଡ଼ିକୁ ନାଗରିକମାନଙ୍କଠାରୁ ମୂଲ୍ୟବାନ ମତାମତ ପାଇବାରେ ସାହାଯ୍ୟ କରିବ, ଯାହା ସେବା ପ୍ରଦାନ ଏବଂ ଶାସନ ପ୍ରକ୍ରିୟାରେ ସୁଧାର ଆଣିବାରେ ସହାୟକ ହେବ, ବୋଲି ଶ୍ରୀମତୀ ପାଢୀ କହିଛନ୍ତି।

---------------

ହିନ୍ଦୁସ୍ଥାନ ସମାଚାର / ବନ୍ଦନା