ସମ୍ବଲପୁର, ୦୮, ଜୁନ୍ (ହି.ସ.) ସମ୍ବଲପୁର ଜିଲ୍ଲା ଶାସନ ଥାନା ଅନ୍ତର୍ଗତ ଗିରିପାଲି ଖଡିଆପଡା ଗ୍ରାମରେ ସୋମବାର ପ୍ରତ୍ୟୁଷରେ ଏକ ଦୁଃଖଦ ଶୋକାକୁଳ ଖବର ସମସ୍ତଙ୍କୁ ବ୍ୟଥିତ କରାଇ ଦେଇଛି । ସୂଚନାନୁସାରେ ସବୁଦିନ ପରି ରବିବାର ରାତିରେ ଗ୍ରାମବାସୀ ଖାଇପିଇ ଶୋଇଥିଲେ । ମାତ୍ର ସୋମବାର ପ୍ରତ୍ୟୁଷରେ ଗୋଟିଏ ପରିବାରର ମାଁ ଓ ଝିଅଙ୍କୁ ନୃଶଂସ ହତ୍ୟା ହୋଇଥିବା ଘଟଣା ଏକ ପ୍ରକାର ଆତଙ୍କ ସୃଷ୍ଟି କରିଥିଲା । ଏହି ଘଟଣା ପ୍ରଚାରିତ ହେବା ସହ ଶାସନଥାନାରେ ପହଞ୍ଚିଥିଲା । ଏଭଳି ଖବର ମିଳିବା ପରେ ଶାସନ ଥାନ ପୋଲିସ ସହ ବହୁ ବରିଷ୍ଠ ପୋଲିସ ଅଧିକାରୀ ଘଟଣା ସ୍ଥଳରେ ପହଞ୍ଚି ଘଟଣାର ସରଜମିନ ତଦନ୍ତ ଆରମ୍ଭ କରିଛନ୍ତି । ଏବେ ପୋଲିସର କଡ଼ା ସୁରକ୍ଷା ବଳୟ ମଧ୍ୟରେ ଗାଁ ରହିଥିବା ବେଳେ ମୃତକଙ୍କ ଘର ଚତୁଃପାର୍ଶ୍ଵରେ ମଧ୍ୟ ପୋଲିସ ନିୟୋଜିତ ହୋଇଥିବା ଦେଖିବାକୁ ମିଳିଛି । ପ୍ରତ୍ୟେକ ସନ୍ଦିଗ୍ଧ ପ୍ରତି ପୋଲିସ ମଧ୍ୟ ତୀକ୍ଷ୍ଣ ନଜର ରଖିଥିବା ଜଣାପଡିଛି । ତେବେ ଗୁଣିଗାରେଡିକୁ ନେଇ ଏହି ନୃଶଂସ ହତ୍ୟାକାଣ୍ଡ ଘଟିଥିବା କିଛି ବ୍ୟକ୍ତି ନିଜ ନାମକୁ ଗୁପ୍ତ ରଖି ଗଣମାଧ୍ୟମକୁ କହିଛନ୍ତି । ତଦନ୍ତାଧୀନ ଏହି ଲୋମହର୍ଷକ ଘଟଣା ଏବେ ସମଗ୍ର ସମ୍ବଲପୁର ଜିଲ୍ଲାରେ ଚର୍ଚ୍ଚାର ପ୍ରସଙ୍ଗ ହୋଇଛି ।
---------------
ହିନ୍ଦୁସ୍ଥାନ ସମାଚାର / ଶୈଳେଶ
