ପୁରୀ, ୧୬ ଜୁଲାଇ (ହି.ସ.)- ଗୁରୁବାର ଦିନତମାମ ଝିପିଝିପି ବର୍ଷା ସତ୍ୱେ ଘୋଷଯାତ୍ରାରେ ଲକ୍ଷାଧିକ ଶ୍ରଦ୍ଧାଳୁଙ୍କ ସମାଗମ ହୋଇଛି । ରଥାରୁଢ଼ ଶ୍ରୀବିଗ୍ରହଙ୍କୁ ଦର୍ଶନ କରିବା ଓ ରଥ ଟାଣିବା ପାଇଁ ଶ୍ରୀକ୍ଷେତ୍ର ବଡ଼ଦାଣ୍ଡରେ ଭକ୍ତଙ୍କ ଭିଡ଼ ଜମିଛି । ରଥାରୁଢ଼ ଚତୁର୍ଦ୍ଧାମୂର୍ତିଙ୍କୁ ଦର୍ଶନ କରିଛନ୍ତି ଭକ୍ତ । ଘଂଟ ଘଂଟା, ଶଙ୍ଖ, ବିଜେ କାହାଳୀର ଧ୍ୱନୀ ସାଙ୍ଗକୁ ଭକ୍ତଙ୍କ ହରିବୋଲ, ହୁଳହୁଳି ଏବଂ ଜୟ ଜଗନ୍ନାଥ ଧ୍ୱନୀରେ ପ୍ରକମ୍ପିତ ହୋଇଉଠିଛି ଗଗନ ପବନ । ଘର୍ ଘର୍ ନାଦ କରି ବଡ଼ଦାଣ୍ଡରେ ଗଡିଛି ତିନି ରଥ । ନିର୍ଦ୍ଧାରିତ ସମୟ ଠାରୁ ୧ ଘଂଟା ବିଳମ୍ବରେ ଅର୍ଥାତ୍ ଅପରାହ୍ନ ୫ଟାରେ ପ୍ରଥମେ ଶ୍ରୀବଳଭଦ୍ରଙ୍କ ତାଳଧ୍ୱଜ ରଥଟଣା ଆରମ୍ଭ ହୋଇଥିଲା । ଏହାପରେ ଦେବୀ ସୁଭଦ୍ରାଙ୍କ ଦର୍ପଦଳନ ଓ ପରେ ଶ୍ରୀଜଗନ୍ନାଥଙ୍କ ନନ୍ଦିଘୋଷ ରଥ ଶରଧାବାଲି ଅଭିମୁଖେ ଯାତ୍ରା କରିଛି । ବଡଭାଇ ଶ୍ରୀବଳଭଦ୍ର, ଭଉଣୀ ସୁଭଦ୍ରାଙ୍କୁ ସାଙ୍ଗରେ ଧରି ରତ୍ନବେଦିରୁ ଯଜ୍ଞବେଦିକୁ ନବଦିନ ବ୍ୟାପୀ ଯାତ୍ରାରେ ବାହାରିଛନ୍ତି କାଳିଆ ଠାକୁର ।
ଆଜି ସକାଳୁ ଶ୍ରୀଜୀଉଙ୍କ ଦୈନନ୍ଦିନ ନୀତିକାନ୍ତି ସମ୍ପନ୍ନ ହୋଇଥିଲା । ରଥ ପ୍ରତିଷ୍ଠା ପରେ ନିର୍ଦ୍ଧାରିତ ସମୟରେ ପହଣ୍ଡି ଆରମ୍ଭ ହୋଇଥିଲା । ଧାଡି ପହଣ୍ଡିରେ ଆସି ତିନି ଠାକୁର ରଥାରୁଢ଼ ହୋଇଥିଲେ । ପ୍ରଥମେ ଚକ୍ରରାଜ ସୁଦର୍ଶନ ଧାଡି ପହଣ୍ଡିରେ ଆସି ପୂର୍ବାହ୍ନ ୯ଟା ୧୫ ରେ ଦର୍ପଦଳନ ରଥରେ ବିରାଜମାନ କରିଥିଲେ । ପରେ ବଡ ଠାକୁର ଶ୍ରୀବଳଭଦ୍ରଙ୍କ ଶ୍ରୀବିଗ୍ରହ ତାଳଧ୍ୱଜ ରଥରେ ୧୦ଟା ୪୫ରେ, ଏହାପରେ ଦେବୀ ସୁଭଦ୍ରାଙ୍କ ଶ୍ରୀବିଗ୍ରହ ଦର୍ପଦଳନ ରଥରେ ପୂର୍ବାହ୍ନ ୧୧ଟାରେ ଏବଂ ଶେଷରେ ଜଗତର ନାଥ ଶ୍ରୀଜଗନ୍ନାଥଙ୍କ ଶ୍ରୀବିଗ୍ରହ ହଲିହଲି ଝୁଲିଝୁଲି ଆସି ଅପରାହ୍ନ ୨ଟା ୧୦ରେ ନନ୍ଦିଘୋଷ ରଥରେ ବିରାଜମାନ କରିଥିଲେ । ଜଗତଗୁରୁ ଶଙ୍କରାଚାର୍ଯ୍ୟ ତାଙ୍କ ଅନୁଗାମୀ ମାନଙ୍କ ସହିତ ଯାଇ ରଥାରୁଢ଼ ଚତୁର୍ଦ୍ଧାମୂର୍ତିଙ୍କ ଦର୍ଶନ କରିଛନ୍ତି ।
ଏହାପରେ ତିନି ରଥରେ ଗଜପତି ମହାରାଜା ଦିବ୍ୟସିଂହ ଦେବଙ୍କ ଛେରାପହଁରା ପରେ ରଥରେ କାଷ୍ଠନିର୍ମିତ ଅଶ୍ୱ ଯୋଚାଯାଇଥିଲା, ସାରଥୀ ସ୍ଥାପନ କରାଯାଇଥିଲା । ନୀତିନିର୍ଘଂଟ ଅନୁଯାୟୀ ଅପରାହ୍ନ ୪ଟା ପରିବର୍ତେ ପ୍ରାୟ ୧ ଘଂଟା ବିଳମ୍ବରେ ଅର୍ଥାତ୍ ଅପରାହ୍ନ ୫ଟାରେ ରଥଟଣା କାର୍ଯ୍ୟ ଆରମ୍ଭ ହୋଇଥିଲା । ପ୍ରଥମେ ଶ୍ରୀ ବଳଭଦ୍ରଙ୍କ ତାଳଧ୍ୱଜ ରଥଟଣା ଆରମ୍ଭ ହୋଇଥିଲା । ଏହାପରେ ଦେବୀ ସୁଭଦ୍ରାଙ୍କ ଦର୍ପଦଳନ ରଥ ଓ ପରେ ଶ୍ରୀଜଗନ୍ନାଥଙ୍କ ନନ୍ଦିଘୋଷ ରଥଟଣା ଆରମ୍ଭ ହୋଇଥିଲା । ବେଶ୍ ଉତ୍ସାହ, ଉଦ୍ଦିପନାର ସହ ରଥ ଦଉଡ଼ିକୁ ଭକ୍ତ, ପୋଲିସ ଓ ପ୍ରଶାସନିକ ଅଧିକାରୀମାନେ ଟାଣିଥିଲେ । ଭିଡ଼ କାରଣରୁ ଅନେକ ଭକ୍ତ ରଥ ଦଉଡି ଟାଣିନପାରି ଦଉଡିକୁ ଛୁଇଁ ପ୍ରଣାମ କରୁଥିବାର ଦେଖିବାକୁ ମିଳିଥିଲା । ସନ୍ଧ୍ୟା ୭ଟା ଶେଷ ଖବର ସୁଦ୍ଧା ତାଳଧ୍ୱଜ ରଥ ମରଚିକୋଟ ଛକ ନିକଟରେ ଅଟକି ଥିବାବେଳେ ଦର୍ପଦଳନ ରଥ ଶ୍ରୀମନ୍ଦିର କାର୍ଯ୍ୟାଳୟ ନିକଟରେ ଏବଂ ନନ୍ଦିଘୋଷ ରଥ ଶ୍ରୀମନ୍ଦିର ସିଂହଦ୍ୱାର ଠାରୁ କିଛି ବାଟ ଆଗକୁ ଆସିଛି । ଆସନ୍ତାକାଲି ଦ୍ୱିତୀୟ ଦିନରେ ମଧ୍ୟ ରଥଟଣା କାର୍ଯ୍ୟ ଜାରି ରହିବ ।
ଭକ୍ତଙ୍କ ଶୃଙ୍ଖଳିତ ଦର୍ଶନ, ଭିଡ଼ ନିୟନ୍ତ୍ରଣ ଏବଂ ଆଇନଶୃଙ୍ଖଳା ରକ୍ଷା ପାଇଁ ପୁରୀ ସହରର ବିଭିନ୍ନ ସ୍ଥାନ ସମେତ ବଡଦାଣ୍ଡ ଓ ରଥ ଚାରିପାଖ, ସମୁଦ୍ର କୂଳ ଓ ରେଳଷ୍ଟେସନରେ ବ୍ୟାପକ ପୋଲିସ ବ୍ୟବସ୍ଥା କରାଯାଇଛି ।
ହିନ୍ଦୁସ୍ଥାନ ସମାଚାର / ପ୍ରଦୀପ୍ତ
