ଭୁବନ, ୩ ଜୁଲାଇ (ହି.ସ.)- ଢେ଼ଙ୍କାନାଳ ଜିଲ୍ଲା ଭୁବନରେ ତୃତୀୟା ଦେବ ଜିୟୁଙ୍କ ପବିତ୍ର ରଥଯାତ୍ରା ନିମନ୍ତେ ଶୁକ୍ରବାର ଅପରାହ୍ନରେ ବିଜ୍ଞାପିତ ଅଞ୍ଚଳ ପରିଷଦ ସଭାଗୃହରେ ସଭାପତି ତଥା ନଗରପାଳ ଶୁଭେନ୍ଦୁ କୁମାର ସାହୁଙ୍କ ଅଧ୍ୟକ୍ଷତାରେ ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି। ଏହି ବୈଠକରେ ରଥଯାତ୍ରା ପୂର୍ବରୁ ରାସ୍ତାଘାଟ, ଡ୍ରେନ୍ ମରାମତି କରିବା ସହିତ ଝୁଲି କରି ରହିଥିବା ବିଦ୍ୟୁତ୍ ତାରକୁ ଉଚ୍ଚ କରାଯିବା, ପାନୀୟ ଜଳ ଯୋଗାଣ ଓ ପରିମଳ ବ୍ୟବସ୍ଥା ସମେତ ଯାତ୍ରା ପାଇଁ ଦେବୋତ୍ତର ବିଭାଗରୁ ୧ ଲକ୍ଷ ଟଙ୍କା ଅନୁଦାନ ପାଇଁ ଚିଠି କରାଯିବା ସମ୍ପର୍କରେ ଆଲୋଚନା ହୋଇଥିଲା । ଏହି ପ୍ରସ୍ତୁତି ବୈଠକରେ ଜଗନ୍ନାଥଙ୍କ ଆଦ୍ୟ ସେବକ ରାମଚନ୍ଦ୍ର ରାଉତ, ମୁଖ୍ୟ ପୂଜକ ତୁଷାରକାନ୍ତି ମିଶ୍ର, ପୁରୀ ଗୋବର୍ଦ୍ଧନ ପୀଠର ମହାସଚିବ ପଣ୍ଡିତ ମାତୃ ପ୍ରସାଦ ମିଶ୍ର, ଦଶହରା କମିଟି ମୁଖ୍ୟ ଅଧ୍ୟାପକ ଦିଲ୍ଲୀପ ଦାସ, ପୂର୍ବତନ ନଗରପାଳ ନରହରି ସାହୁ,ଭୁବନ ଥାନା ଏସ ଏଇ ମାନସ ନାୟକ, ବିଦ୍ୟୁତ ବିଭାଗ ଯନ୍ତ୍ରୀ ନଳିନୀ ଶଙ୍କର ରଥ, ଜନସ୍ୱାସ୍ଥ୍ୟ ବିଭାଗ ସହକାରୀ ଯନ୍ତ୍ରୀ ସୋନାଲି ନାୟକ, କାଉନସିଲର ପପୁ କୁମାର ସାହୁ, ନରେନ୍ଦ୍ର ବେହେରା, କାଳୀ ବଜାର ବଣିକ ସଂଘ ସଭାପତି ସୁବ୍ରତ କୁମାର ସାହୁ, ନୂଆ ବଜାର ବଣିକ ସଂଘ ସମ୍ପାଦକ ବସନ୍ତ କୁମାର ପୋଥାଳ, ଲକ୍ଷ୍ମଣ ଦାସ, ସତ୍ୟାନନ୍ଦ ପୃଷ୍ଟି, ଆଇନଜିବୀ କୁଞ୍ଜ ବିହାରୀ ଚିନରା, ଜଗବନ୍ଧୁ ବିହାରୀ, ଭବାନୀ ଶଙ୍କର ପୋଥାଳ ପ୍ରମୁଖ ଯୋଗଦେଇ ଆଲୋଚନାରେ ଅଂଶଗ୍ରହଣ କରିଥିଲେ।
ଆସନ୍ତା ୧୪ ତାରିଖ ମଙ୍ଗଳବାର ନେତ୍ରୋତ୍ସବ ଓ ନବ ଯୌବନ ବେଶରେ ମହାପ୍ରଭୁ ଦର୍ଶନ ଦେବେ । ୧୬ ତାରିଖ ଗୁରୁବାର ସକାଳ ୬ଟା ସମୟରେ ଦେଉଳ ଫିଟା, ୭ଟା ଦ୍ୱାରପାଳ ପୂଜା, ପାଟବସ୍ତ୍ର ଆନୟନ,୧୦ଟା ମା ହିଙ୍ଗୁଳା ପୀଠରୁ ଆଜ୍ଞାମାଳ ବିଜେ,୧୧ଟା ମହାପ୍ରସାଦ ନୀତି, ୧୨ଟା ରଥ ପ୍ରତିଷ୍ଠା, ଅପରାହ୍ନ ୧ଟା ଚତୁର୍ଦ୍ଧାମୂର୍ତ୍ତିଙ୍କ ପହଣ୍ଡି, ୨ଟା ଛେରା ପହଁରା, ୨ଟା ୩୦ ଚାରମାଳ ଫିଟା, ୩ଟାରେ ରଥ ଟଣା ଆରମ୍ଭ ହୋଇ ସନ୍ଧ୍ୟା ୬ଟାରେ ନୂଆ ବଜାରରେ ବିଶ୍ରାମ, ୬ଟା ୩୦ ରେ ସନ୍ଧ୍ୟାଧୂପ, ଆଳତି ଓ ରାତ୍ର ୭ଟା ସମୟରେ ଭଜନ ସନ୍ଧ୍ୟା ପରିବେଷଣ କରାଯିବ ବୋଲି ଚୂଡ଼ାନ୍ତ ନିଷ୍ପତି ହୋଇଥିଲା । ଶେଷରେ ସମ୍ପାଦକ ନିରଞ୍ଜନ ଗୁରୁ ଧନ୍ୟବାଦ୍ ଅର୍ପଣ କରିଥିଲେ।
ହିନ୍ଦୁସ୍ଥାନ ସମାଚାର / ସୁଶାନ୍ତ
