ଭୁବନେଶ୍ୱର, 03 ଜୁଲାଇ (ହି.ସ.)ଭିଜିଲାନ୍ସ ପୁରୀ ଜିଲ୍ଲାରେ ମଧୁବାବୁ ପେନ୍ସନ୍ ଯୋଜନା ଅଧୀନରେ ବଣ୍ଟନ ପାଇଁ ଥିବା ସରକାରୀ ଧନର ଅପବ୍ୟବହାର ମାମଲାରେ ଦୁଇ ଜଣ ପୂର୍ବତନ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ଙ୍କୁ ଗିରଫ କରିଛି। ଏମାନଙ୍କ ବିରୁଦ୍ଧରେ ବୃଦ୍ଧ, ଭିନ୍ନକ୍ଷମ ଏବଂ ନିରାଶ୍ରୟ ଲାଭାର୍ଥୀଙ୍କ ପାଇଁ ଉଦ୍ଦିଷ୍ଟ ମୋଟ 30,78,620 ଟଙ୍କା ଆତ୍ମସାତ କରାଯାଇଥିବା ଅଭିଯୋଗ ରହିଛି ।
ଭିଜିଲାନ୍ସ ପକ୍ଷରୁ ଦିଆଯାଇଥିବା ସୂଚନା ଅନୁସାରେ ଗିରଫ ଅଭିଯୁକ୍ତମାନେ ହେଲେ ସୁଲମାନୀ ଜାନୀ, ପୂର୍ବତନ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ , ଗଡ଼ାମୃଗସିରା ଓ ଜାମରସୁଆଁ ଗ୍ରାମ ପଞ୍ଚାୟତ (ସଦର ବ୍ଲକ, ପୁରୀ) ଏବଂ ଟୁନା ପ୍ରଧାନ, ପୂର୍ବତନ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ , ସାହୁପଡ଼ା ଗ୍ରାମ ପଞ୍ଚାୟତ (କଣାସ ବ୍ଲକ, ପୁରୀ)। ବର୍ତ୍ତମାନ ଜାନୀ ସଦର ବ୍ଲକ କାର୍ଯ୍ୟାଳୟ ସହ ଏବଂ ପ୍ରଧାନ ଗୋପ ବ୍ଲକ କାର୍ଯ୍ୟାଳୟ ସହ ସଂଲଗ୍ନ ଥିଲେ।
ଭିଜିଲାନ୍ସ ତଦନ୍ତରେ ଜଣାପଡ଼ିଛି ଯେ, ଉଭୟ ଅଧିକାରୀ 2022 ରୁ 2025 ମଧ୍ୟରେ ସେମାନଙ୍କର ପଦବୀର ଦୁରୁପଯୋଗ କରି ସୁଚିନ୍ତିତ ଭାବେ ଏହି ଆର୍ଥିକ ଅନିୟମିତତା କରିଥିଲେ। ତଦନ୍ତ ଅନୁସାରେ, ସୁଲମାନୀ ଜାନୀ 15,74,820 ଟଙ୍କା ଏବଂ ଟୁନା ପ୍ରଧାନ 15,03,800 ଟଙ୍କା ଆତ୍ମସାତ କରିଥିବା ଜଣାପଡ଼ିଛି। ଅଭିଯୋଗ ଅନୁଯାୟୀ, ଲାଭାର୍ଥୀଙ୍କୁ ବଣ୍ଟନ ନହୋଇଥିବା ରାଶିକୁ ସେମାନେ ଅଟକାଇ ନିଜ ସ୍ୱାର୍ଥରେ ବ୍ୟବହାର କରିଥିଲେ।
ଏହି ସମ୍ପର୍କରେ ଭୁବନେଶ୍ୱର ଭିଜିଲାନ୍ସ ଥାନାରେ ମାମଲା ରୁଜୁ ହୋଇଛି। ଭିଜିଲାନ୍ସ ପକ୍ଷରୁ ମାମଲାର ତଦନ୍ତ ଜାରି ରହିଛି।
---------------
ହିନ୍ଦୁସ୍ଥାନ ସମାଚାର / ସମନ୍ୱୟ
