ହୁବଳି, ୨୮ ଅଗଷ୍ଟ(ହି.ସ.) – କର୍ଣ୍ଣାଟକ ପବ୍ଲିକ୍ ସର୍ଭିସ୍ କମିଶନ(କେପିଏସ୍ସି) ନିଯୁକ୍ତି ଦୁର୍ନୀତିରେ କେନ୍ଦ୍ରମନ୍ତ୍ରୀ ପ୍ରହ୍ଲାଦ ଯୋଶୀ ରାଜ୍ୟ ସରକାରଙ୍କ ବିରୋଧରେ ଗୁରୁତର ଅଭିଯୋଗ କରିଛନ୍ତି। ଏହି ନିଯୁକ୍ତି ଦୁର୍ନୀତିରେ ରାଜ୍ୟ ସରକାର ସିଧାସଳଖ ସମ୍ପୃକ୍ତ ଥିବା ସେ ଦାବି କରିଛନ୍ତି। ଏହି ମାମଲା ସହ ଜଡ଼ିତ ଜଣେ ନିଖୋଜ ଅଧିକାରୀଙ୍କ ବିଷୟରେ ଉଲ୍ଲେଖ କରି ସେ ସରକାରଙ୍କୁ ଟାର୍ଗେଟ୍ କରି ଅଭିଯୋଗ କରିଛନ୍ତି ଯେ ଅଧିକାରୀଙ୍କୁ ଖୋଜିବା ପରିବର୍ତେ ସରକାର ପ୍ରତିଶୋଧର ରାଜନୀତିରେ ଲିପ୍ତ ଅଛନ୍ତି।

ଶୁକ୍ରବାର ଦିନ ହୁବଲି ଠାରେ ସାମ୍ବାଦିକମାନଙ୍କ ସହ କଥାବାର୍ତା କରି ଯୋଶୀ ପ୍ରଶ୍ନ କରିଛନ୍ତି ଯେ ଜଣେ ଅଧିକାରୀ ନିଖୋଜ ହେବା ବିଷୟରେ ରାଜ୍ୟ ଗୁଇନ୍ଦା ବିଭାଗ ଅବଗତ ନାହିଁ କି? ସେ ଅଭିଯୋଗ କରିଛନ୍ତି ଯେ ପ୍ରବର୍ତନ ନିର୍ଦ୍ଦେଶାଳୟ(ଇଡି) ତଦନ୍ତରୁ ତାଙ୍କୁ ରକ୍ଷା କରିବା ପାଇଁ ରାଜ୍ୟ ସରକାର ହିଁ ଅଧିକାରୀଙ୍କୁ ଲୁଚାଇ ରଖିଥିଲେ।

ଯୋଶୀ କହିଛନ୍ତି ଯେ କେପିଏସ୍ସି ନିଯୁକ୍ତି ଦୁର୍ନୀତି ସମ୍ବନ୍ଧୀୟ ଅନେକ ଗୁରୁତ୍ୱପୂର୍ଣ୍ଣ ଡକ୍ୟୁମେଂଟ ପୂର୍ବରୁ ନିଖୋଜ ହୋଇସାରିଛି। ଏବେ ଏହି ମାମଲାରେ ସମ୍ପୃକ୍ତ ଅଧିକାରୀଙ୍କ ନିଖୋଜ ହେବା ମଧ୍ୟ ଅନେକ ପ୍ରଶ୍ନ ଉଠାଇଛି। ସେ କହିଛନ୍ତି ଯେ ଅଧିକାରୀଙ୍କୁ ଖୋଜିବା ରାଜ୍ୟ ସରକାରଙ୍କ ଦାୟିତ୍ୱ ଏବଂ ସରକାର ଏହି ପ୍ରସଙ୍ଗରେ ସ୍ଥିତି ସ୍ପଷ୍ଟ କରିବା ଉଚିତ୍।

କେନ୍ଦ୍ରମନ୍ତ୍ରୀ ସରକାରଙ୍କ ପ୍ରାଥମିକତା ଉପରେ ପ୍ରଶ୍ନ ଉଠାଇ କହିଛନ୍ତି ଯେ ନିଖୋଜ ଅଧିକାରୀଙ୍କୁ ଖୋଜିବା କିମ୍ବା ରାଷ୍ଟ୍ରୀୟ ସ୍ୱୟଂସେବକ ସଂଘ(ଆର୍ଏସ୍ଏସ୍) ପଦଯାତ୍ରାରେ ସମ୍ପୃକ୍ତ ବ୍ୟକ୍ତିଙ୍କୁ ନିଲମ୍ବନ କରିବା ଅଧିକ ଗୁରୁତ୍ୱପୂର୍ଣ୍ଣ। ସେ କହିଥିଲେ ଯେ ସଂଘର କାର୍ଯ୍ୟକଳାପରେ ଅଂଶଗ୍ରହଣ କରିବା ଉପରେ କୌଣସି ପ୍ରତିବନ୍ଧକ ନାହିଁ।

ଯୋଶୀ ଦାବି କରିଛନ୍ତି ଯେ ୧୯୭୦ ମସିହାରୁ ସଂଘର କାର୍ଯ୍ୟକଳାପରେ ଅଂଶଗ୍ରହଣ କରିଥିବା ଲୋକଙ୍କ ବିରୋଧରେ ଦାଖଲ ହୋଇଥିବା ଅନେକ ମାମଲା ଅଦାଲତରେ ଖାରଜ ହୋଇଛି। ସେ କହିଥିଲେ ଯେ ବିଦ୍ୱେଷ କାରଣରୁ ନିଆଯାଇଥିବା କାର୍ଯ୍ୟାନୁଷ୍ଠାନ ମଧ୍ୟ ନ୍ୟାୟିକ ପ୍ରକ୍ରିୟାରେ ତିଷ୍ଠିବ ନାହିଁ ଏବଂ ଏହା ରାଜ୍ୟ ସରକାରଙ୍କ ପ୍ରତିଷ୍ଠା ଉପରେ ପ୍ରଭାବ ପକାଇବ।

ହିନ୍ଦୁସ୍ଥାନ ସମାଚାର/ବୀଣାପାଣି

.......................................

ହିନ୍ଦୁସ୍ଥାନ ସମାଚାର / ବୀଣାପାଣି