ନୂଆଦିଲ୍ଲୀ, ୩ ଅଗଷ୍ଟ (ହି.ସ.)- ଭାରତୀୟ ଜନତା ପାର୍ଟି (ବିଜେପି) ର ସାଂସଦ ନିଶିକାନ୍ତ ଦୁବେ ରାଜ୍ୟ ଲୋକସେବା ଆୟୋଗ ସମେତ ବିଭିନ୍ନ ନିଯୁକ୍ତି ପରୀକ୍ଷାରେ ଅନିୟମିତତା ଅଭିଯୋଗ ନେଇ ଝାଡ଼ଖଣ୍ଡର ହେମନ୍ତ ସୋରେନ ସରକାରଙ୍କୁ ଆଜି ତୀବ୍ର ସମାଲୋଚନା କରି କହିଛନ୍ତି ଯେ, ଗତ ସାତରୁ ଆଠ ବର୍ଷ ମଧ୍ୟରେ ଝାଡ଼ଖଣ୍ଡରେ ପରିବାରବାଦ ଏବଂ ଦୁର୍ନୀତି କାରଣରୁ ଯୁବକମାନେ ଚାକିରିରୁ ବଂଚିତ ହୋଇଛନ୍ତି ଏବଂ ଆଜି ସେମାନେ ଆନ୍ଦୋଳନ କରିବାକୁ ବାଧ୍ୟ ହେଉଛନ୍ତି ।

ଝାଡ଼ଖଣ୍ଡ ନିଯୁକ୍ତି ପରୀକ୍ଷା ବିଷୟରେ ସୋମବାର ସଂସଦ ପରିସରରେ ସାମ୍ବାଦିକମାନଙ୍କ ସହ କଥାବାର୍ତା ବେଳେ ନିଶିକାନ୍ତ ଦୁବେ କହିଛନ୍ତି ଯେ, ଝାଡ଼ଖଣ୍ଡ ଛାତ୍ରଛାତ୍ରୀଙ୍କ ଦାବି ସମ୍ପୂର୍ଣ୍ଣ ନ୍ୟାୟସଙ୍ଗତ । ସେ ଅଭିଯୋଗ କରିଛନ୍ତି ଯେ, ଗତ ୭-୮ ବର୍ଷ ମଧ୍ୟରେ ଝାଡ଼ଖଣ୍ଡ ଲୋକସେବା ଆୟୋଗରେ ପରିବାରବାଦ ଏବଂ ଦୁର୍ନୀତିର ବାତାବରଣ ସୃଷ୍ଟି ହୋଇଛି, ଯେଉଁଥିପାଇଁ ରାଜ୍ୟର ଯୁବକମାନେ ନିଯୁକ୍ତି ପାଇପାରୁ ନାହାଁନ୍ତି ଏବଂ ନିରନ୍ତର ଆନ୍ଦୋଳନ କରିବାକୁ ବାଧ୍ୟ ହେଉଛନ୍ତି ।

ନିଶିକାନ୍ତ ଦୁବେ କହିଛନ୍ତି ଯେ, ଝାଡ଼ଖଣ୍ଡରେ ଜେପିଏସସି ଏବଂ ଜେଏସଏସସିର ନିଯୁକ୍ତି ପରୀକ୍ଷାରେ ଅନିୟମିତତାକୁ ନେଇ ଛାତ୍ରମାନେ ଦୀର୍ଘ ସମୟ ଧରି ବିରୋଧ ପ୍ରଦର୍ଶନ କରିଆସୁଛନ୍ତି, କିନ୍ତୁ ସେମାନଙ୍କ ଅଭିଯୋଗ ଉପରେ କେହି ଗମ୍ଭୀର ଧ୍ୟାନ ଦେଉ ନାହାଁନ୍ତି । ସେ ଅଭିଯୋଗ କରିଛନ୍ତି ଯେ, ଆୟୋଗର ସଦସ୍ୟମାନେ କଂଗ୍ରେସ ଏବଂ ଝାଡ଼ଖଣ୍ଡ ମୁକ୍ତି ମୋର୍ଚ୍ଚା (ଜେଏମଏମ) ର ପ୍ରଭାବରେ ନିଯୁକ୍ତ ହୋଇଥିଲେ, ଯେଉଁଥିପାଇଁ ନିଯୁକ୍ତି ପ୍ରକ୍ରିୟାର ନିରପେକ୍ଷତା ଉପରେ ପ୍ରଶ୍ନ ଉଠିଛି ।

ବିଜେପି ସାଂସଦ କହିଛନ୍ତି ଯେ, ରାଜ୍ୟର ଯୁବକମାନେ ନିଯୁକ୍ତି ଆଶାରେ ବର୍ଷ ବର୍ଷ ଧରି ନିଜକୁ ପ୍ରସ୍ତୁତି କରିଥାନ୍ତି, କିନ୍ତୁ ନିଯୁକ୍ତି ପ୍ରକ୍ରିୟାରେ କ୍ରମାଗତ ବିବାଦ ଯୋଗୁଁ ସେମାନଙ୍କର ଭବିଷ୍ୟତ ପ୍ରଭାବିତ ହେଉଛି । ଛାତ୍ରଛାତ୍ରୀଙ୍କ ଅଭିଯୋଗର ନିରପେକ୍ଷ ତଦନ୍ତ କରି ଦୋଷୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସେ ଦାବି କରିଛନ୍ତି ।

ହିନ୍ଦୁସ୍ଥାନ ସମାଚାର / ପ୍ରଦୀପ୍ତ