ନୂଆଦିଲ୍ଲୀ, ଅଗଷ୍ଟ ୦୩ (ହି.ସ.) - ରାଷ୍ଟ୍ରପତି ଦ୍ରୌପଦୀ ମୁର୍ମୁ ସୋମବାର ଦିନ ରାଷ୍ଟ୍ରପତି ଭବନରେ ଉଜବେକିସ୍ତାନର ବୈଦେଶିକ ମନ୍ତ୍ରୀ ସାଇଦୋଭ ବଖ୍ତିୟାର ଓଡିଲୋଭିଙ୍କୁ ଭେଟିଛନ୍ତି । ଉଭୟ ପକ୍ଷ ଭାରତ-ଉଜବେକିସ୍ତାନ ସମ୍ପର୍କକୁ ଆହୁରି ସୁଦୃଢ଼ କରିବା ଏବଂ ବାଣିଜ୍ୟ, ନିବେଶ, ଖଣି, କୃଷି, ଫାର୍ମାସ୍ୟୁଟିକାଲ୍ସ ଏବଂ ସୂଚନା ପ୍ରଯୁକ୍ତି ସମେତ ବିଭିନ୍ନ କ୍ଷେତ୍ରରେ ସହଯୋଗ ବୃଦ୍ଧି କରିବା ଉପରେ ଆଲୋଚନା କରିଥିଲେ।

ଉଜବେକିସ୍ତାନର ବୈଦେଶିକ ମନ୍ତ୍ରୀ ଏବଂ ତାଙ୍କ ପ୍ରତିନିଧି ଦଳକୁ ସ୍ୱାଗତ କରି ରାଷ୍ଟ୍ରପତି କହିଲେ ଯେ ପ୍ରାଚୀନ ବାଣିଜ୍ୟ ମାର୍ଗ ଦ୍ୱାରା ଭାରତ ଏବଂ ଉଜବେକିସ୍ତାନ ମଧ୍ୟରେ ଗଭୀର ଐତିହାସିକ, ସାଂସ୍କୃତିକ ଏବଂ ସଭ୍ୟତାଗତ ସମ୍ପର୍କ ରହିଛି। ସେ କହିଥିଲେ ଯେ ସ୍ଥାପତ୍ୟ, ଭାଷା, ଖାଦ୍ୟପେୟ, ସଙ୍ଗୀତ ଏବଂ ଧାର୍ମିକ ପରମ୍ପରାର ସହଭାଗୀ ଐତିହ୍ୟ ଦୁଇ ଦେଶ ମଧ୍ୟରେ ଭାଗିଦାରୀକୁ ଆହୁରି ସୁଦୃଢ଼ କରିଛି।

ରାଷ୍ଟ୍ରପତି କହିଲେ ଯେ ଉଜବେକିସ୍ତାନର ଉଚ୍ଚସ୍ତରୀୟ ପ୍ରତିନିଧିମଣ୍ଡଳର ଭାରତ ଗସ୍ତ ଏବଂ ଏହା ସହିତ ମିଳିତ ଭାବେ ଆୟୋଜିତ ଭାରତ-ଉଜବେକିସ୍ତାନ ବ୍ୟବସାୟିକ ମଂଚ ଦୁଇ ଦେଶର ବ୍ୟବସାୟିକ ସମ୍ପ୍ରଦାୟର ପରସ୍ପରର ବଜାର ଉପରେ ବିଶ୍ୱାସ ରହିବାର ସଙ୍କେତ ଦେଉଛି। ବିରଳ ମୃତିକା ଖଣିଜ ପଦାର୍ଥ, କୃଷି, ଫାର୍ମାସ୍ୟୁଟିକାଲ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ଭଳି କ୍ଷେତ୍ରରେ ସହଯୋଗର ବ୍ୟାପକ ସମ୍ଭାବନା ବିଷୟରେ ମଧ୍ୟ ସେ ଉଲ୍ଲେଖ କରିଥିଲେ।

ମୁର୍ମୁ କହିଥିଲେ ଯେ ଭାରତର ଆଇ. ଟି. ଇ. ସି. ପ୍ରଶିକ୍ଷଣ କାର୍ଯ୍ୟକ୍ରମ ଏବଂ ଅନ୍ୟାନ୍ୟ ଛାତ୍ରବୃତି ଯୋଜନାଗୁଡ଼ିକ ଏ ପର୍ଯ୍ୟନ୍ତ ଉଜବେକିସ୍ତାନର ୩ ହଜାରରୁ ଅଧିକ ଅଧିକାରୀ, ପେସାଦାର ଏବଂ ଛାତ୍ରଛାତ୍ରୀଙ୍କୁ ଉପକୃତ କରିଛି। ଏଥି ସହିତ ଉଜବେକିସ୍ତାନରେ ୧୬ ହଜାରରୁ ଅଧିକ ଭାରତୀୟ ଛାତ୍ରଛାତ୍ରୀ ଉଚ୍ଚ ଶିକ୍ଷା ଗ୍ରହଣ କରୁଛନ୍ତି। ସେ କହିଥିଲେ ଯେ ଏହି ଛାତ୍ରଛାତ୍ରୀମାନେ ଦୁଇ ଦେଶର ଲୋକମାନଙ୍କ ମଧ୍ୟରେ ଦୃଢ଼ ସମ୍ପର୍କ ଏବଂ ପାରସ୍ପରିକ ବୁଝାମଣାକୁ ପ୍ରୋତ୍ସାହନ ଦେବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛନ୍ତି।

ହିନ୍ଦୁସ୍ଥାନ ସମାଚାର / ଭାନୁ ଚରଣ