ଇମ୍ଫାଲ, ୩୧ ଅଗଷ୍ଟ (ହି.ସ.)- ମଣିପୁରର କାକଚିଂ ଜିଲ୍ଲାରେ ରବିବାର ରାତିରେ ପ୍ରସ୍ତାବିତ ଜନଗଣନା ବିରୋଧରେ ବାହାରିଥିବା ବଡ଼ ମଶାଲ ଶୋଭାଯାତ୍ରା ସମୟରେ ପ୍ରଦର୍ଶନକାରୀ ଏବଂ ସୁରକ୍ଷା ବଳ ମଧ୍ୟରେ ସଂଘର୍ଷ ହୋଇଥିଲା। ସ୍ଥିତିକୁ ନିୟନ୍ତ୍ରଣ କରିବା ପାଇଁ ପୁଲିସ ଲୁହବୁହା ଗ୍ୟାସର ଗୋଳା ଛାଡ଼ିଥିଲା। ଘଟଣାରେ କିଛି ପ୍ରଦର୍ଶନକାରୀ ସାମାନ୍ୟ ଆହତ ହୋଇଛନ୍ତି।
ୱାବଗାଇ, ହିୟାଙ୍ଗଲମ ଏବଂ ଆଖପାଖ ଅଂଚଳରୁ ଶହ ଶହ ଗ୍ରାମବାସୀ ପ୍ରାୟ ତିନି କିଲୋମିଟର ଲମ୍ବା ମଶାଲ ରାଲିରେ ସାମିଲ ହୋଇଥିଲେ। ପ୍ରଦର୍ଶନକାରୀମାନେ “ନୋ ଏନଆରସି, ନୋ ସେନସସ” ନାରା ଦେଇ ଜନଗଣନାକୁ ବିରୋଧ କରୁଥିଲେ।
ପ୍ରଦର୍ଶନକାରୀମାନଙ୍କ ଦାବି ଥିଲା ଯେ ପ୍ରଥମେ ଜାତୀୟ ନାଗରିକ ପଞ୍ଜିକା (ଏନଆରସି)କୁ ଅପଡେଟ କରାଯାଉ ଏବଂ ଜାତିଗତ ସଂଘର୍ଷ କାରଣରୁ ବିସ୍ଥାପିତ ଲୋକଙ୍କୁ ପୁନର୍ବାସ କରାଯାଉ, ଏହା ପରେ ହିଁ ଜନଗଣନା କରାଯାଉ।
ରାଲି କାକଚିଂ ଜିଲ୍ଲା ମୁଖ୍ୟାଳୟ ଆଡ଼କୁ ଆଗକୁ ବଢ଼ୁଥିଲା। ଏହି ସମୟରେ ପୁଲିସ ପ୍ରଦର୍ଶନକାରୀମାନଙ୍କୁ କେଇରାକ ବନ୍ଧ ଅଂଚଳ ନିକଟରେ ଅଟକାଇଥିଲା। ଏହି ସମୟରେ କିଛି ପ୍ରଦର୍ଶନକାରୀଙ୍କ ଦ୍ୱାରା କଥିତ ଭାବେ ପଥରମାଡ଼ କରାଯିବା ପରେ ପୁଲିସ ଭିଡ଼କୁ ଛତ୍ରଭଙ୍ଗ କରିବା ପାଇଁ ଲୁହବୁହା ଗ୍ୟାସର ଗୋଳା ଛାଡ଼ିଥିଲା।
ହଙ୍ଗାମା ସମୟରେ କିଛି ପ୍ରଦର୍ଶନକାରୀ ସାମାନ୍ୟ ଆହତ ହୋଇଥିଲେ। ପୁଲିସ ସାତ ଜଣଙ୍କୁ ହାଜତକୁ ନେଇଥିଲା, ଯେଉଁମାନଙ୍କ ମଧ୍ୟରେ ଚାରି ଜଣ ମହିଳା ସାମିଲ ଥିଲେ। ତେବେ, ସମସ୍ତଙ୍କୁ ସେହି ରାତି ପରେ ମୁକ୍ତ କରାଯାଇଥିଲା।
ପ୍ରଶାସନ ପକ୍ଷରୁ ସ୍ଥିତି ଉପରେ ନଜର ରଖାଯାଉଛି ଏବଂ ଅଂଚଳରେ ସୁରକ୍ଷା ବ୍ୟବସ୍ଥା ବଢ଼ାଇ ଦିଆଯାଇଛି।
-------------------
ହିନ୍ଦୁସ୍ଥାନ ସମାଚାର / ଗଗନ