ଭୁବନେଶ୍ୱର, 12 ସେପ୍ଟେମ୍ବର (ହି.ସ.): କୋରାପୁଟର କଫି
ଏବେ ଓଡ଼ିଶାର ସ୍ଥାନୀୟ ପରିଚୟ ଓ କୃଷି କ୍ଷମତାର କାହାଣୀକୁ ବିଶ୍ୱ ମଞ୍ଚରେ ପହଞ୍ଚାଉଛି।
ଶନିବାର ନୂଆଦିଲ୍ଲୀରେ ଆୟୋଜିତ ଦୁଇଦିନିଆ ବ୍ରିକ୍ସ ଇଣ୍ଡିଆ ସମିଟ୍ ୨୦୨୬ରେ କୋରାପୁଟ କଫିର
ପ୍ରଦର୍ଶନକୁ ନେଇ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଗର୍ବ ପ୍ରକାଶ କରିଛନ୍ତି।
ସୋସିଆଲ ମିଡିଆ ପ୍ଲାଟଫର୍ମ
‘ଏକ୍ସ’ରେ ଏକ ପୋଷ୍ଟ କରି ମୁଖ୍ୟମନ୍ତ୍ରୀ ମାଝୀ କହିଛନ୍ତି ଯେ, ଗତ କିଛି ଦିନ ଧରି ସେ ବିଶ୍ୱସ୍ତରୀୟ ମଞ୍ଚରେ
ଓଡ଼ିଶାର ସୁଯୋଗ, ସାମର୍ଥ୍ୟ ଓ ସମ୍ଭାବନାକୁ ସାମ୍ନାକୁ ଆଣିବା ସହ
ରାଜ୍ୟର କ୍ଷମତା ସମ୍ପର୍କରେ ଅବଗତ ହେବା ପାଇଁ ବିଶ୍ୱକୁ ଆମନ୍ତ୍ରଣ କରୁଛନ୍ତି।
ମୁଖ୍ୟମନ୍ତ୍ରୀ କହିଛନ୍ତି, “ଆଜି ଏହା ଦେଖି ବିଶେଷ ଖୁସି ଲାଗୁଛି ଯେ,
ବ୍ରିକ୍ସ ଇଣ୍ଡିଆ ସମିଟ୍ ୨୦୨୬ରେ କୋରାପୁଟ କଫି ଓଡ଼ିଶାର କାହାଣୀର ଆଉ ଏକ
ଦିଗକୁ ବିଶ୍ୱ ସମ୍ମୁଖରେ ଉପସ୍ଥାପନ କରୁଛି।”
ମୁଖ୍ୟମନ୍ତ୍ରୀ କହିଛନ୍ତି ଯେ, ଅନ୍ତର୍ଜାତୀୟ ସମ୍ମିଳନୀରେ କୋରାପୁଟ କଫିର
ଉପସ୍ଥିତି ଓ ପରିଚୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦ୍ୱାରା ପରିକଳ୍ପିତ ‘ଭୋକାଲ୍ ଫର୍
ଲୋକାଲ୍’ ଭାବନାକୁ ପ୍ରତିଫଳିତ କରୁଛି। ସ୍ଥାନୀୟ ଉତ୍ପାଦଗୁଡ଼ିକୁ ବିଶ୍ୱସ୍ତରୀୟ ମଞ୍ଚ ଯୋଗାଇ
ସେଗୁଡ଼ିକୁ ବ୍ୟାପକ ପରିଚୟ ପ୍ରଦାନ କରିବା ଦିଗରେ ଏହା ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ବୋଲି ସେ
କହିଛନ୍ତି।
ଓଡ଼ିଶାବାସୀଙ୍କ ପରିଶ୍ରମ
ଏବଂ ରାଜ୍ୟର ମାଟିର ସମୃଦ୍ଧିକୁ ଓଡ଼ିଶାର ସୀମା ବାହାରେ ପରିଚୟ ମିଳୁଥିବା ଦେଖିବା ତାଙ୍କ ପାଇଁ
ଅତ୍ୟନ୍ତ ଗର୍ବର ବିଷୟ ବୋଲି ମୁଖ୍ୟମନ୍ତ୍ରୀ କହିଛନ୍ତି।
ସେ କହିଛନ୍ତି, “ଏହା ହେଉଛି ସେହି ଓଡ଼ିଶା, ଯାହାକୁ ମୁଁ ବିଶ୍ୱ ଜାଣୁ ବୋଲି ଚାହୁଁଛି—ନିଜ ମାଟି ସହ ଜଡ଼ିତ, ନିଜ ପରିଚୟକୁ ନେଇ ଗର୍ବିତ ଏବଂ ନିଜ କାହାଣୀକୁ ବିଶ୍ୱ ସହ ବାଣ୍ଟିବା ନେଇ
ଆତ୍ମବିଶ୍ୱାସରେ ଭରପୂର।”
ମୁଖ୍ୟମନ୍ତ୍ରୀ କହିଛନ୍ତି ଯେ, ବ୍ରିକ୍ସ ସମ୍ମିଳନୀରେ କୋରାପୁଟ କଫିର ଅଂଶଗ୍ରହଣ
ଓଡ଼ିଶାର ସ୍ଥାନୀୟ ଉତ୍ପାଦଗୁଡ଼ିକର ସମ୍ଭାବନାକୁ ଉଜାଗର କରିଛି।
---------------
ହିନ୍ଦୁସ୍ଥାନ ସମାଚାର / ସ୍ୱାଗତିକା
