ନୂଆଦିଲ୍ଲୀ, ୧୫ ସେପ୍ଟେମ୍ବର (ହି.ସ.)- କଂଗ୍ରେସ ସାଧାରଣ ସମ୍ପାଦକ ଜୟରାମ ରମେଶ ଅଭିଯୋଗ କରିଛନ୍ତି ଯେ, କେନ୍ଦ୍ର ସରକାର ୟୁପିଆଇ କାରବାର ଉପରେ ଶୁଳ୍କ ଲାଗୁ କରିବାକୁ ପ୍ରସ୍ତୁତ ହେଉଛନ୍ତି । ସଂଶୋଧିତ ପେମେଂଟ ଆଣ୍ଡ ସେଟଲମେଂଟ ସିଷ୍ଟମ ଆକ୍ଟ, ୨୦୦୭ ଅଧୀନରେ ଜାରି ହୋଇଥିବା ଏକ ନୂତନ ବିଜ୍ଞପ୍ତି ଦ୍ୱାରା ଏହି ଦିଗରେ ଏକ ପଦକ୍ଷେପ ନିଆଯାଇଛି ବୋଲି ସେ କହିଛନ୍ତି ।
ଜୟରାମ ରମେଶ ମଙ୍ଗଳବାର ଦିନ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ କହିଛନ୍ତି ଯେ, ଅଗଷ୍ଟ ୬ ରେ କଂଗ୍ରେସ ଯେଉଁ ଆଶଙ୍କା ପ୍ରକାଶ କରିଥିଲା ଏବଂ କେନ୍ଦ୍ର ଅର୍ଥମନ୍ତ୍ରୀ ମଧ୍ୟ ଏନେଇ ପ୍ରତିକ୍ରିୟା ରଖିଥିଲେ, ବର୍ତମାନ ସରକାର ସେହି ଦିଗରେ ଆଗକୁ ବଢ଼ୁଥିବା ପରି ମନେ ହେଉଛି । ନୂତନ ବିଜ୍ଞପ୍ତି ବ୍ୟାଙ୍କ ଏବଂ ସେବା ପ୍ରଦାନକାରୀଙ୍କୁ କେବଳ ୨,୦୦୦ ରୁ କମ୍ ୟୁପିଆଇ କାରବାର ପାଇଁ ଶୁଳ୍କ ଆଦାୟ କରିବାକୁ ନିଷେଧ କରେ, କିନ୍ତୁ ଏହି ପରିମାଣରୁ ଅଧିକ କାରବାର ପାଇଁ କୌଣସି ସ୍ପଷ୍ଟ ସୁରକ୍ଷା ପ୍ରଦାନ କରେ ନାହିଁ ।
ଏହା ଭବିଷ୍ୟତରେ ୟୁ. ପି. ଆଇ. କାରବାର ଉପରେ ଶୁଳ୍କ ଲାଗୁ କରିବାର ମାର୍ଗ ପ୍ରଶସ୍ତ କରିବ ବୋଲି ସେ ଅଭିଯୋଗ କରିଛନ୍ତି । ପରେ, ଅନ୍ୟ ଏକ ବିଜ୍ଞପ୍ତି ମାଧ୍ୟମରେ, ଏହି ସୀମାକୁ ମଧ୍ୟ ପରିବର୍ତନ କରାଯାଇପାରିବ ଏବଂ ସରକାର ଚାହିଁଲେ ସାଧାରଣ ଡିଜିଟାଲ୍ ବ୍ୟକ୍ତି-ରୁ-ବ୍ୟକ୍ତି କାରବାର ଉପରେ ଏକ ଶୁଳ୍କ ମଧ୍ୟ ଲାଗୁ କରିପାରିବେ ।
ସେ ଅଭିଯୋଗ କରିଛନ୍ତି ଯେ ସରକାର ଏହି ପ୍ରସଙ୍ଗରେ ଆନ୍ତରିକତା ଏବଂ ସ୍ୱଚ୍ଛତା ଦେଖାଇ ନାହାଁନ୍ତି ଏବଂ ଡିଜିଟାଲ୍ ପେମେଂଟ କରୁଥିବା ଲୋକଙ୍କ ବିଶ୍ୱାସ ଭାଙ୍ଗିଛନ୍ତି । ସେ ପ୍ରଶ୍ନ କରିଛନ୍ତି ଯେ ଆମେରିକୀୟ କମ୍ପାନୀଗୁଡ଼ିକ ପାଇଁ ଡିଜିଟାଲ୍ ପେମେଂଟ ସିଷ୍ଟମ୍ ଖୋଲିବା ଏବଂ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ସନ୍ତୁଷ୍ଟ କରିବା ପାଇଁ ଏହି ପଦକ୍ଷେପ ଉଦ୍ଦିଷ୍ଟ କି?
ହିନ୍ଦୁସ୍ଥାନ ସମାଚାର / ପ୍ରଦୀପ୍ତ
