ଆଇଚି-ନାଗୋୟା, ସେପ୍ଟେମ୍ବର 25 (ହି.ସ)। ଭାରତୀୟ ଅଲିମ୍ପିକ୍ ସଂଘର ଅଧ୍ୟକ୍ଷା ପି.ଟି. ଉଷା ଏସୀୟ କ୍ରୀଡ଼ା ୨୦୨୬ର ଷଷ୍ଠ ଦିନରେ ଭାରତୀୟ ବନ୍ଧୁକଚାଳକଙ୍କ ଚମତ୍କାର ପ୍ରଦର୍ଶନକୁ ପ୍ରଶଂସା କରିଛନ୍ତି। ଶୁକ୍ରବାର ଭାରତୀୟ ବନ୍ଧୁକଚାଳକମାନେ ୫୦ ମିଟର ରାଇଫଲ୍ ଥ୍ରୀ ପୋଜିସନ୍ ଟିମ୍ ଏବଂ ୧୦ ମିଟର ଏୟାର ପିସ୍ତଲ୍ ମିକ୍ସଡ୍ ଟିମ୍ ଇଭେଣ୍ଟରେ ଗୋଟିଏ ଲେଖାଏଁ ରୌପ୍ୟ ଓ ସ୍ୱର୍ଣ୍ଣ ପଦକ ଜିତି ଭାରତର ପଦକ ଅଭିଯାନକୁ ଆହୁରି ମଜବୁତ କରିଛନ୍ତି। ପି.ଟି. ଉଷା ସୋସିଆଲ୍ ମିଡିଆ ମଞ୍ଚ ଏକ୍ସରେ ଭାରତୀୟ ଖେଳାଳିଙ୍କ ପ୍ରଶଂସା କରିବା ସହ ସେମାନଙ୍କ ଉତ୍ସାହ ଓ ଏକାଗ୍ରତାକୁ ସାଧୁବାଦ ଜଣାଇଛନ୍ତି। ସେ ରୁଦ୍ରାକ୍ଷ ପାଟିଲ, ଐଶ୍ୱର୍ଯ୍ୟ ପ୍ରତାପ ସିଂହ ତୋମର ଏବଂ ନୀରଜ କୁମାରଙ୍କ ସମେତ ସ୍ୱର୍ଣ୍ଣ ପଦକ ବିଜେତା ସୁରୁଚି ସିଂହ ଓ କମଲଜିତ୍ଙ୍କୁ ଅଭିନନ୍ଦନ ଜଣାଇଛନ୍ତି। ଏଥିସହ ବ୍ୟକ୍ତିଗତ ଫାଇନାଲ୍ରେ ସ୍ଥାନ ପାଇଥିବା ଐଶ୍ୱର୍ଯ୍ୟ ଓ ନୀରଜଙ୍କୁ ଶୁଭକାମନା ଜଣାଇଛନ୍ତି।ପି.ଟି. ଉଷା କହିଛନ୍ତି, “ଆମ ଖେଳାଳିମାନେ ଯେଉଁ ଉତ୍ସାହ ଓ ଏକାଗ୍ରତା ପ୍ରଦର୍ଶନ କରିଛନ୍ତି, ସେଥିପାଇଁ ଆମେ ଗର୍ବିତ। ସୁରୁଚି ଓ କମଲଜିତ୍ଙ୍କ ଯୁବ ପିସ୍ତଲ୍ ମିକ୍ସଡ୍ ଟିମ୍ ଚମତ୍କାର ନିଶାନେବାଜି ପ୍ରଦର୍ଶନ କରିଛି। ଐଶ୍ୱର୍ଯ୍ୟ, ନୀରଜ ଓ ରୁଦ୍ରାକ୍ଷଙ୍କ ୫୦ ମିଟର ଥ୍ରୀ ପୋଜିସନ୍ ଟିମ୍ ମଧ୍ୟ ଦମ୍ଦାର ପ୍ରଦର୍ଶନ କରିଛି। ଫାଇନାଲ୍ ପାଇଁ ଐଶ୍ୱର୍ଯ୍ୟ ଓ ନୀରଜଙ୍କୁ ଶୁଭକାମନା।

ପୁରୁଷ ୫୦ ମିଟର ରାଇଫଲ୍ ଥ୍ରୀ ପୋଜିସନ୍ ଟିମ୍ ଇଭେଣ୍ଟରେ ରୁଦ୍ରାକ୍ଷ ପାଟିଲ, ଐଶ୍ୱର୍ଯ୍ୟ ପ୍ରତାପ ସିଂହ ତୋମର ଓ ନୀରଜ କୁମାରଙ୍କୁ ନେଇ ଗଠିତ ଭାରତୀୟ ଦଳ ୧୭୬୨-୯୪x ସ୍କୋର କରିଥିଲା। ଚୀନ୍ ୧୭୬୬-୯୫x ସ୍କୋର ସହ ସ୍ୱର୍ଣ୍ଣ ପଦକ ଜିତିଥିବା ବେଳେ ଦକ୍ଷିଣ କୋରିଆ ୧୭୫୧-୮୭x ସ୍କୋର ସହ ବ୍ରୋଞ୍ଜ ପଦକ ହାସଲ କରିଥିଲା। ଭାରତୀୟ ଦଳ ୨୦୨୨ ଏସୀୟ କ୍ରୀଡ଼ାରେ ଏହି ଇଭେଣ୍ଟରେ ସ୍ୱର୍ଣ୍ଣ ପଦକ ଜିତିଥିଲା। ତେବେ ଏଥର ଚୀନ୍ଠାରୁ ଭାରତକୁ ନିଜର ଟାଇଟଲ୍ ହରାଇବାକୁ ପଡ଼ିଛି।

ବ୍ୟକ୍ତିଗତ ଇଭେଣ୍ଟରେ ଐଶ୍ୱର୍ଯ୍ୟ ୫୮୯-୩୪x ସ୍କୋର ସହ ତୃତୀୟ ଏବଂ ନୀରଜ ୫୮୮-୩୪x ସ୍କୋର ସହ ଚତୁର୍ଥ ସ୍ଥାନରେ ରହିଥିଲେ। ଉଭୟ ୫୦ ମିଟର ରାଇଫଲ୍ ଥ୍ରୀ ପୋଜିସନ୍ର ବ୍ୟକ୍ତିଗତ ଫାଇନାଲ୍ରେ ସ୍ଥାନ ପକ୍କା କରିଛନ୍ତି। ଅନ୍ୟପକ୍ଷରେ, ରୁଦ୍ରାକ୍ଷ ୫୮୫-୨୬x ସ୍କୋର ସହ ନବମ ସ୍ଥାନରେ ରହିଥିବାରୁ ଫାଇନାଲ୍ରେ ସ୍ଥାନ ପାଇପାରି ନାହାନ୍ତି।

ସେହିପରି, ୧୦ ମିଟର ଏୟାର ପିସ୍ତଲ୍ ମିକ୍ସଡ୍ ଟିମ୍ ଇଭେଣ୍ଟରେ ସୁରୁଚି ସିଂହ ଓ କମଲଜିତ୍ ଚମତ୍କାର ପ୍ରଦର୍ଶନ କରି ୪୮୪.୬ ପଏଣ୍ଟ ସହ ସ୍ୱର୍ଣ୍ଣ ପଦକ ଜିତିଛନ୍ତି। ଦକ୍ଷିଣ କୋରିଆ ୪୭୮.୦ ପଏଣ୍ଟ ସହ ରୌପ୍ୟ ଏବଂ ଇରାନ ୪୧୫.୮ ପଏଣ୍ଟ ସହ ବ୍ରୋଞ୍ଜ ପଦକ ହାସଲ କରିଛି। ଇଣ୍ଡୋନେସିଆ ୩୪୯.୪ ପଏଣ୍ଟ ସହ ପ୍ରତିଯୋଗିତାରୁ ବାଦ୍ ପଡ଼ିଛି।

ସ୍ୱର୍ଣ୍ଣ ପଦକ ଜିତିବା ସହ ସୁରୁଚି ଓ କମଲଜିତ୍ ଏସୀୟ ରେକର୍ଡ ମଧ୍ୟ ଭାଙ୍ଗିଛନ୍ତି। ଭାରତୀୟ ଯୋଡ଼ିଙ୍କ ୪୮୪.୬ ପଏଣ୍ଟ ସ୍କୋର ଏହା ପୂର୍ବରୁ ଉଜ୍ବେକିସ୍ତାନ ନାମରେ ଥିବା ୪୮୧.୩ ପଏଣ୍ଟର ରେକର୍ଡଠାରୁ ଅଧିକ। ଚଳିତ ବର୍ଷ ନୂଆଦିଲ୍ଲୀରେ ଆୟୋଜିତ ଏସୀୟ ବନ୍ଧୁକଚାଳକ ଚାମ୍ପିଅନ୍ସିପ୍ରେ ଏହି ପୂର୍ବ ରେକର୍ଡ ସ୍ଥାପିତ ହୋଇଥିଲା।

ଏହି ସ୍ୱର୍ଣ୍ଣ ପଦକ ସହ ଭାରତ ଏସୀୟ କ୍ରୀଡ଼ାରେ ନିଜର ଦ୍ୱିତୀୟ ସ୍ୱର୍ଣ୍ଣ ପଦକ ହାସଲ କରିଛି। ଭାରତର ମୋଟ ପଦକ ସଂଖ୍ୟା ୧୯ରେ ପହଞ୍ଚିଛି। ଏଥିରେ ୨ଟି ସ୍ୱର୍ଣ୍ଣ, ୮ଟି ରୌପ୍ୟ ଓ ୯ଟି ବ୍ରୋଞ୍ଜ ପଦକ ସାମିଲ ରହିଛି।

--------

ହିନ୍ଦୁସ୍ଥାନ ସମାଚାର / ସ୍ୱାଗତିକା