ବଲାଙ୍ଗିର 29 ଜାନୁଆରି (ହି.ସ.)

ପୁଇଁତଳା ବ୍ଲକ ଅନ୍ତର୍ଗତ ବିଲେଇସର୍ଡା ଜବାହାରଲାଲ ସରକାରୀ ହାଇସ୍କୁଲର ବାର୍ଷିକୋତ୍ସବ ଉଦଯାପିତ ହୋଇଯାଇଛି। ବିଦ୍ୟାଳୟର ପ୍ରଧାନ ଶିକ୍ଷକ ସ୍ବାଧିନ ସାହୁଙ୍କ ସଭାପତିତ୍ବରେ ଅନୁଷ୍ଠିତ ଉଦଘାଟନୀ ସଭାରେ ପୁଇଁତଳା ବ୍ଲକ ଚେୟାରମ୍ୟାନ ସରୋଜ ପ୍ରଧାନ ମୁଖ୍ୟ ଅତିଥି ଭାବେ ଯୋଗଦେଇ ଛାତ୍ର ଜୀବନରେ ସମୟାନୁବର୍ତ୍ତିତା ର ଯଥେଷ୍ଟ ମୂଲ୍ଯ ରହିଛି। ସମୟାନୁବର୍ତ୍ତିତା ଜୀବନକୁ ସୁଖମୟ କରିଥାଏ। ସମୟର ସଦୁପଯୋଗ ନ କଲେ ବିକାଶର ଧାରା ବହୁ ପଛରେ ପଡିଯିବ ବୋଲି କହିବା ସହ ବିଦ୍ୟାଳୟର ଭିତ୍ତିଭୂମୀ ପାଇଁ ଆବଶ୍ୟକୀୟ ଅଭାବ ଗୁଡିକ ପୂରଣ କରିବାକୁ ପ୍ରତିଶୃତି ଦେଇଥିଲେ। ମୁଖ୍ୟବକ୍ତା ଭାବେ ଶିକ୍ଷାବିତ ଜଳେନ୍ଦ୍ର ସାହୁ ଯୋଗଦେଇ ଶୃଙ୍ଖଳିତ ସମାଜ ଜୀବନ ସୁସ୍ଥ ପରଂପରା ସୃଷ୍ଟି କରେ।ବିଦ୍ୟା ଅଭ୍ଯାସରେ ଶୃଙ୍ଖଳା ରକ୍ଷା ହେଲେ ଛାତ୍ର ଛାତ୍ରୀ ମାନେ କୃତିତ୍ବର ସହିତ ଉତ୍ତୀର୍ଣ୍ଣ ହୋଇଥାନ୍ତି ବୋଲି ନିଜ ବକ୍ତବ୍ଯ ରେ କହିଥିଲେ। ସରପଞ୍ଚ ସୁଶାନ୍ତ ଛତ୍ରିଆ, ଏସଏମସି ସଭାପତି ଚୈତନ୍ୟ ପଣ୍ଡା,ଆଲୁମିନୀ ସଭାପତି ଅନନ୍ତ ବିଶ୍ବାଳ,ସିଆରସିସି ସତ୍ଯ ସାହୁ ପ୍ରମୁଖ ଯୋଗଦେଇ ଛାତ୍ର ଛାତ୍ରୀମାନଙ୍କୁ ଶ୍ରେଣୀ ପାଠ୍ଯ ସହ ବାହ୍ଯ ଜ୍ଞାନ ଶିକ୍ଷା ଗ୍ରହଣ କରିବା ଉଚିତ ବୋଲି କହିଥିଲେ। ସ୍ଵାଗତ ନୃତ୍ଯ ପରେ ଶିକ୍ଷକ ପଂକଜ ମେହେର ବାର୍ଷିକ ବିବରଣୀ ପଠନ କରିଥିଲେ। ଛାତ୍ର ସାର୍ଥକ,ପ୍ରଜ୍ଞା, ପ୍ରିତି,ସୁନେନା,ଶିକ୍ଷକ ସୁଧାଂଶୁ ପଧାନ,ଶିକ୍ଷୟିତ୍ରୀ ପ୍ରତୀଶା ମିଶ୍ର

କାର୍ଯ୍ୟକ୍ରମର ପରିଚାଳନା କରିଥିବା ବେଳେ ଧନ୍ୟବାଦ ଅର୍ପଣ କରିଥିଲେ ଶିକ୍ଷକ କାହ୍ନୁଚରଣ ଧରୁଆ। ଏହି ଅବସରରେ ଅତିଥିମାନଙ୍କ ଦ୍ବାରା ବିଦ୍ୟାଳୟ ତରଫରୁ ଆମ ଲେଖା ଆମ ଚିତ୍ର ପତ୍ରିକାକୁ ଉନ୍ମୋଚିତ କରାଯାଇଥିଲା। ଚଳିତବର୍ଷ ଶ୍ରେଷ୍ଠ ଛାତ୍ର ଭାବେ ଦଶମ ଶ୍ରେଣୀ ଛାତ୍ରୀ ପ୍ରତିଭା ପ୍ରଧାନଙ୍କୁ ଅନୁଷ୍ଠାନ ପକ୍ଷରୁ ସମ୍ବର୍ଦ୍ଧିତ କରାଯାଇଥିଲା। ସଂଜୀବ କୁମାର ମିଶ୍ରଙ୍କ ରଚନା ଓ ନିର୍ଦ୍ଦେଶନାରେ ପୌରାଣିକ ନାଟକ ଅଲାଜୁଗିଆ ଭସ୍ମାସୁର ଓ କନ୍ଯାରତ୍ନ ଏବଂ ନିରୋତ୍ତମା ବିଶ୍ବାଳଙ୍କ ନିର୍ଦ୍ଦେଶିତ ନାଟକ ଅନାଥ ଛାତ୍ର ଛାତ୍ରୀମାନଙ୍କ ଦ୍ବାରା ପରିବେଷଣ ହୋଇଥିଲା । ପୁରସ୍କାର ବିତରଣୀ କାର୍ଯ୍ଯକ୍ରମକୁ ପ୍ରଦୀପ ଦଣ୍ଡସେନା,ରଞ୍ଜିତ ମିଶ୍ର, ସୁଦାମ କୁମ୍ଭାର,ପ୍ରମୋଦ ପ୍ରଧାନ,ସୁଜିତ ଦେହୁରୀ,ସୁବାସିନୀ ସେଠୀ,ଅଶ୍ବିନୀ ମହାଲିଙ୍ଗ, ନିହାରିକା ପଧାନ,ସୁଷମା ମେହେର,ମୁରାରୀ ପର୍ଡିଆ,ରଶ୍ମିତା ନନ୍ଦ ପ୍ରମୁଖ ପରିଚାଳନା କରିଥିଲେ। ଦ୍ବିତୀୟ ଅଧିବେଶନରେ ବିଦ୍ୟାଳୟର ଛାତ୍ରଛାତ୍ରୀମାନଙ୍କ ଦ୍ବାରା ରଙ୍ଗାରଙ୍ଗ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ ହୋଇଥିଲା ।

---------------

ହିନ୍ଦୁସ୍ଥାନ ସମାଚାର / ଗୋପବନ୍ଧୁ