Bhubaneswar, 24 ଅକ୍ଟୋବର (ହି.ସ.)
ନୂଆପଡ଼ା ଜିଲ୍ଲା କୋମନା ବ୍ଲକ ଅନ୍ତର୍ଗତ ନୂଆଗାଁ ଗ୍ରାମପଞ୍ଚାୟତରେ ବିଜେଡି ପ୍ରାର୍ଥୀ ଶ୍ରୀମତୀ ସ୍ନେହାଙ୍ଗିନୀ ଛୁରିଆଙ୍କୁ ସ୍ଥାନୀୟ ଜନସାଧାରଣ ବିପୁଳ ସମ୍ୱର୍ଦ୍ଧନା ଦେଇ ବିଜୁ ଜନତା ଦଳ ପ୍ରତି ବିଶ୍ୱାସ ବ୍ୟକ୍ତ କରିଥିଲେ । ଶୁକ୍ରବାର ବିଜୁ ଜନତା ଦଳ (ବିଜେଡି) ପ୍ରାର୍ଥୀ ଶ୍ରୀମତୀ ଛୁରିଆ ନୂଆଗାଁରେ ପ୍ରଚାର ଅଭିଯାନ ଆରମ୍ଭ କରିଛନ୍ତି । କୋମନା ବ୍ଲକ ନୂଆଗାଁ ଗ୍ରାମପଞ୍ଚାୟତ ଅଧୀନସ୍ଥ ନୂଆଗାଁ ଗ୍ରାମରେ ହଜାର ହଜାର ସମର୍ଥକ, ସାଧାରଣ ଲୋକ ଓ ବିଜେଡି କାର୍ଯ୍ୟକର୍ତ୍ତାମାନେ ମିଶି ବିଜେଡି ପ୍ରାର୍ଥୀ ଶ୍ରୀମତୀ ଛୁରିଆଙ୍କୁ ଉଚ୍ଛ୍ୱସିତ ସ୍ୱାଗତ ସମ୍ୱର୍ଦ୍ଧନା ଜଣାଇଥିଲେ ।
ମଧ୍ୟାହ୍ନ ୧୨ଟା ସମୟରେ ପ୍ରଚାର ଆରମ୍ଭ ହୋଇଥିଲା । ବିଜେଡିର ବରିଷ୍ଠ ନେତା ଓ କର୍ମୀଙ୍କ ଦ୍ୱାରା ଗ୍ରାମରେ ବିଶାଳ ଶୋଭାଯାତ୍ରା କରାଯାଇଥିଲା । ଏଥିରେ ବିଜେଡି ପ୍ରାର୍ଥୀ ଶ୍ରୀମତୀ ଛୁରିଆ ସାମିଲ ହୋଇଥିଲେ । ଏହି ବିଶାଳ ଶୋଭାଯାତ୍ରାରେ ନୂଆଗାଁର ଲୋକଙ୍କ ଉତ୍ସାହ ଓ ଆସ୍ଥା ସ୍ପଷ୍ଟ ଭାବରେ ପ୍ରକାଶ ପାଇଥିଲା, ଯାହା ବିଜୁ ଜନତା ଦଳ ଓ ଶ୍ରୀ ନବୀନ ପଟ୍ଟନାୟକଙ୍କ ନେତୃତ୍ୱ ପ୍ରତି ଦୃଢ଼ ବିଶ୍ୱାସକୁ ଦର୍ଶାଇଥିଲା । ପ୍ରଚାର ଆରମ୍ଭ ପୂର୍ବରୁ ଶ୍ରୀମତୀ ଛୁରିଆ ଓ ଅନ୍ୟ ବିଜେଡି ନେତାମାନେ ସ୍ଥାନୀୟ ଜଗନ୍ନାଥ ମନ୍ଦିରରେ ପୂଜାର୍ଚ୍ଚନା କରି ମହାପ୍ରଭୁ ଶ୍ରୀଜଗନ୍ନାଥଙ୍କ ଆଶୀର୍ବାଦ ନେଇଥିଲେ । ଏହି ଅବସରରେ ପୂର୍ବତନ ମନ୍ତ୍ରୀ ଓ ବିଜେଡିର ବରିଷ୍ଠ ନେତା ପୁଷ୍ପେନ୍ଦ୍ର ସିଂହଦେଓଙ୍କ ଅଧ୍ୟକ୍ଷତାରେ ସାଧାରଣ ସଭା ଅନୁଷ୍ଠିତ ହୋଇଥିଲା । ସଭାରେ ନୂଆପଡ଼ା ଜିଲ୍ଲାପରିଷଦ ଉପାଧ୍ୟକ୍ଷା ଦୀପିକା ଦୀପ କହିଥିଲେ ଯେ, କୋମନା ବ୍ଲକର ସମସ୍ତ ମୁଖ୍ୟ ଉନ୍ନୟନ କାର୍ଯ୍ୟ ନବୀନ ପଟ୍ଟନାୟକଙ୍କ ଦୂରଦୃଷ୍ଟିସମ୍ପନ୍ନ ନେତୃତ୍ୱରେ ହୋଇଛି । ଗତ ୧୬ ମାସରେ ରାଜ୍ୟରେ ରହିଥିବା ବିଜେପି ସରକାର ବିକାଶର ଗତିକୁ ରୋକି ଦେଇଛି । ନୂଆପଡ଼ା ଜିଲ୍ଲାରେ ପ୍ରାୟ ୧୫୦ଟି ସ୍କୁଲ ବନ୍ଦ କରି ଗ୍ରାମୀଣ ଶିକ୍ଷା ବ୍ୟବସ୍ଥାକୁ ଗଭୀର ଭାବେ ପ୍ରଭାବିତ କରିଛି ।
ଏହି ଅବସରରେ ଶ୍ରୀମତୀ ଛୁରିଆ ତାଙ୍କ ଅଭିଭାଷଣରେ ବିଜେଡି ସଭାପତି ତଥା ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ କୃତଜ୍ଞତା ଜ୍ଞାପନ କରିଥିଲେ । ସେ କହିଥିଲେ ଯେ, ନବୀନ ବାବୁଙ୍କ ଆଶୀର୍ବାଦରେ ନୂଆପଡ଼ା ଲୋକଙ୍କ ସେବା ପାଇଁ ତାଙ୍କୁ ସୁଯୋଗ ମିଳିଛି । ଦିବଙ୍ଗତ ରାଜେନ୍ଦ୍ର ଢୋଲକିଆଙ୍କ ସ୍ୱପ୍ନକୁ ସେ ପୂରଣ କରିବେ ଏବଂ ବିଜେଡି ସରକାର ସମୟରେ ଆରମ୍ଭ ହୋଇଥିବା ସମସ୍ତ ଉନ୍ନୟନ ପ୍ରକଳ୍ପକୁ ଆଗେଇ ନେବେ । ସେ ଅଭିଯୋଗ କରିଥିଲେ ଯେ, ରାଜ୍ୟରେ ବର୍ତ୍ତମାନ ବିଜେପି ସରକାର ନୂଆପଡ଼ା ଜିଲ୍ଲାର ସମସ୍ତ ଉନ୍ନୟନ କାର୍ଯ୍ୟକୁ ବନ୍ଦ କରିଦେଇଛି ଏବଂ ବିଭିନ୍ନ ଦୁର୍ନୀତି ଓ ଘୋଟାଲାରେ ଜଡ଼ିତ ଅଛି । ପୁଲିସ୍ ସବ୍-ଇନ୍ସପେକ୍ଟର୍ ନିଯୁକ୍ତି ପରୀକ୍ଷା ଘୋଟାଲାର ଉଦାହରଣ ଦେଇ ସେ କହିଥିଲେ ଯେ, ପ୍ରଶ୍ନପତ୍ର ପ୍ରଘଟ ହେବାରୁ ହଜାର ହଜାର ଯୁବକଯୁବତୀ ତାଙ୍କ ଯୋଗ୍ୟତା ଥିବା ସତ୍ତ୍ୱେ ପରୀକ୍ଷା ଦେଇପାରିନାହାନ୍ତି ।
ଏହି ପ୍ରଚାର କାର୍ଯ୍ୟକ୍ରମରେ ବିଜେଡିର ବରିଷ୍ଠ ଉପସଭାପତି ଦେବୀପ୍ରସାଦ ମିଶ୍ର ଯୋଗ ଦେଇଥିଲେ । ସେ ଲୋକଙ୍କୁ ଆହ୍ୱାନ କରି କହିଲେ ଯେ, ନବୀନ ପଟ୍ଟନାୟକଙ୍କ ନେତୃତ୍ୱରେ ନୂଆପଡ଼ା ବିକାଶ ଦିଗରେ ଆଗେଇ ଯାଇଛି । ବିଜେଡି ସବୁବେଳେ ଆଦିବାସୀ, ଦଳିତ ଓ ଅବହେଳିତ ଶ୍ରେଣୀଙ୍କ ଅଧିକାର ଏବଂ ସମ୍ମାନ ପାଇଁ ଲଢ଼ୁଛି । ଗ୍ରାମୀଣ ସଂଯୋଗ, ଶିକ୍ଷା, ସ୍ୱାସ୍ଥ୍ୟ ଓ ସାମାଜିକ ନ୍ୟାୟ ଅଭିଯାନରେ ସଫଳ ହୋଇଛି । ପ୍ରଚାର କାର୍ଯ୍ୟକ୍ରମ କୋମନା ବ୍ଲକର ନୂଆଗାଁ, ଟିକିରିପଡ଼ା ଓ ପେନୋର ଗ୍ରାମପଞ୍ଚାୟତ ଅଞ୍ଚଳରେ ହୋଇଥିଲା । ଶ୍ରୀମତୀ ଛୁରିଆ ପ୍ରତ୍ୟେକ ସ୍ଥାନରେ ଗ୍ରାମବାସୀ ଓ ସ୍ଥାନୀୟ ପ୍ରତିନିଧିଙ୍କ ସହ ଆଲୋଚନା କରି ତାଙ୍କ ସମସ୍ୟା ଓ ଆଶା-ଆକାଂକ୍ଷା ଶୁଣିଥିଲେ । ଏହି ସମୟରେ ଲୋକଙ୍କ ପକ୍ଷରୁ ବିପୁଳ ସମର୍ଥନ ଓ ଆଶୀର୍ବାଦ ମିଳିଥିଲା । ପ୍ରଚାର ଅଭିଯାନରେ ନୂଆପଡ଼ା ଜିଲ୍ଲା ସଭାପତି ଅବନୀ ରଞ୍ଜନ ଯୋଶୀ, ବିଜେଡି ସାଧାରଣ ସମ୍ପାଦକ ମନୋଜ ମିଶ୍ର, ନୂଆପଡ଼ା ଜିଲ୍ଲାପରିଷଦ ଉପାଧ୍ୟକ୍ଷା ଦୀପିକା ଦୀପ, ବରିଷ୍ଠ ନେତା କାର୍ତ୍ତିକ ଦୀପ ପ୍ରମୁଖ ନେତାମାନେ ସାମିଲ ଥିଲେ । ପରିଶେଷରେ ପ୍ରଚାର କାର୍ଯ୍ୟକ୍ରମ ଏକ ଦୃଢ଼ ସନେ୍ଦଶ ସହ ସମାପ୍ତ ହୋଇଥିଲା । ସମନ୍ୱିତ ବିକାଶ, ଶାନ୍ତି ଓ ପ୍ରଗତି ପାଇଁ ବିଜେଡି ପ୍ରତିଶ୍ରୁତିବଦ୍ଧ । ନୂଆପଡ଼ାର ଦୀର୍ଘକାଳୀନ ବିକାଶ ଯାତ୍ରା କେବଳ ନବୀନ ପଟ୍ଟନାୟକଙ୍କ ନେତୃତ୍ୱରେ ହିଁ ସମ୍ଭବ ବୋଲି ସମସ୍ତେ ଏକମତ ହୋଇଥିଲେ ।
---------------
ହିନ୍ଦୁସ୍ଥାନ ସମାଚାର / ରଶ୍ମିତା