ନୂଆଦିଲ୍ଲୀ, 29 ଡିସେମ୍ବର (ହି.ସ.)- କଂଗ୍ରେସ ମହାସଚିବ ଜୟରାମ ରମେଶ ଆରାବଳୀ ପାହାଡ଼ ଓ ଆରାବଳୀ
ରେଞ୍ଜ ସମ୍ପର୍କରେ ଉଚ୍ଚତମ ନ୍ୟାୟାଳୟ ନିଜେ ଦେଇଥିବା ଆଦେଶକୁ ସ୍ଥଗିତ କରିବା ନିଷ୍ପତ୍ତିକୁ
ସ୍ୱାଗତ କରିଛନ୍ତି। ସେ ଏହି ରାୟକୁ କଂଗ୍ରେସର ବିଜୟ ବୋଲି କହି କେନ୍ଦ୍ରୀୟ ପରିବେଶ ମନ୍ତ୍ରୀ
ଭୂପେନ୍ଦ୍ର ଯାଦବଙ୍କ ଇସ୍ତଫା ଦାବି କରିଛନ୍ତି।
ସୋମବାର ସାମ୍ବାଦିକମାନଙ୍କ ସହ କଥାବାର୍ତ୍ତାରେ ଜୟରାମ ରମେଶ କହିଛନ୍ତି
ଯେ ଆଜି ସୁପ୍ରିମକୋର୍ଟରେ “ଦୁଧର ଦୁଧ ଓ ପାଣିର ପାଣି” ସ୍ପଷ୍ଟ ହୋଇଯାଇଛି। କେନ୍ଦ୍ରୀୟ ପରିବେଶ
ମନ୍ତ୍ରୀ ଭୂପେନ୍ଦ୍ର ଯାଦବ ତାଙ୍କ ଓ ଅଶୋକ ଗେହଲୋତଙ୍କ ଉପରେ ରାଜନୀତି କରୁଛନ୍ତି ବୋଲି ଅଭିଯୋଗ
କରିଥିଲେ, ଯାହା ଭୁଲ
ପ୍ରମାଣିତ ହୋଇଛି। ସେ କହିଛନ୍ତି ଯେ ଆରାବଳୀ କେବଳ ଦିଲ୍ଲୀ, ହରିୟାଣା, ରାଜସ୍ଥାନ ଓ ଗୁଜରାଟ ପାଇଁ ନୁହେଁ, ସମଗ୍ର ଦେଶ ପାଇଁ
ଅତ୍ୟାବଶ୍ୟକ। ଭାରତୀୟ ଜନତା ପାର୍ଟି ଆରାବଳୀକୁ ବଞ୍ଚାଇବାକୁ ନୁହେଁ, ବିକ୍ରି କରିବାକୁ
ଇଚ୍ଛୁକ। ଭୂପେନ୍ଦ୍ର ଯାଦବଙ୍କୁ ଇସ୍ତଫା ଦେବା ଉଚିତ ବୋଲି ସେ ଦାବି କରିଛନ୍ତି। ସେ ଏହା ମଧ୍ୟ
କହିଛନ୍ତି ଯେ ଆରାବଳୀରେ ପୁନର୍ବାର ସବୁଜିମା ଫେରାଇ ଆଣିବା ଜୀବନ ପାଇଁ ଅତ୍ୟନ୍ତ ଆବଶ୍ୟକ।
ଉଚ୍ଚତମ ନ୍ୟାୟାଳୟ ୨୦ ନଭେମ୍ବରରେ ଆରାବଳୀ ସମ୍ପର୍କରେ ଦିଆଯାଇଥିବା
ନିଜ ଆଦେଶକୁ ସ୍ଥଗିତ କରି କହିଛନ୍ତି ଯେ ଏହି ବିଷୟରେ ଆହୁରି ଅଧ୍ୟୟନ ଓ ଚିନ୍ତା-ବିମର୍ଶ
ଆବଶ୍ୟକ। ଦିଲ୍ଲୀ-ଏନସିଆର ସହିତ ହରିୟାଣା, ରାଜସ୍ଥାନ ଓ
ଗୁଜରାଟର ପରିବେଶୀୟ ସମତୁଳନ ପାଇଁ ଆରାବଳୀ ରେଞ୍ଜକୁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ମନାଯାଏ।
---------------
ହିନ୍ଦୁସ୍ଥାନ ସମାଚାର / ସ୍ୱାଗତିକା
29 Dec 2025
