ଭୁବନେଶ୍ୱର, 6 ମାର୍ଚ୍ଚ (ହି.ସ.) – ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ସହାୟତାରେ ଭୁବନେଶ୍ୱର ମ୍ୟୁଜିକ ସର୍କଲ ଦ୍ୱାରା ତିନିଦିନ ଧରି ଅନୁଷ୍ଠିତ ହେବାକୁ ଥିବା ୧୩ତମ ସୁଫିୟାନା ଓ ଆଧ୍ୟାତ୍ମିକ ସଙ୍ଗୀତ କାର୍ଯ୍ୟକ୍ରମ ସମର୍ପଣଏକ ବର୍ଣ୍ଣାଢ୍ୟ ପରିବେଶରେ ରବୀନ୍ଦ୍ର ମଣ୍ଡପ ପ୍ରେକ୍ଷାଳୟରେ ଉଦ୍ଘାଟିତ ହୋଇଯାଇଛି । ଏହି ଉତ୍ସବ ଆସନ୍ତା ୮ ତାରିଖ ପର୍ଯ୍ୟନ୍ତ ରବୀନ୍ଦ୍ର ମଣ୍ଡପରେ ଅନୁଷ୍ଠିତ ହେବ ।
ସଂଧ୍ୟାର ପ୍ରଥମ କାର୍ଯ୍ୟକ୍ରମ ଥିଲା କଲିକତାରୁ ଆସିଥିବା ବିଦୁଷି ମନାଲି ବୋଷଙ୍କ ଦ୍ୱାରା କଣ୍ଠ ସଙ୍ଗୀତ ପରିବେଷଣ । ସେ ମୀରାବାଇ, କବୀରଦାସ, ସୁରଦାସ, ତୁଲସୀଦାସ, ଗୁରୁ ନାନକ, ଖଲାଶ, ବ୍ରହ୍ମାନନ୍ଦ ଓ ଜ୍ଞାନଦାସଙ୍କ ଦ୍ୱାରା ରଚିତ କିଛି ଭକ୍ତି ସଙ୍ଗୀତ ପରିବେଷଣ କରିଥିଲେ ଯାହା ଅତି ଚମତ୍କାର ଓ ସୁମଧୁର ଥିଲା । ସେ ବିଭିନ୍ନ ରାଗ ଓ ତାଳ ସମଷ୍ଟିରେ ଉଚ୍ଚକୁଟିର ସଙ୍ଗୀତ ପରିବେଷଣ କରି ରବିନ୍ଦ୍ର ମଣ୍ଡପରେ ଉପସ୍ଥିତ ଶ୍ରୋତାମାନଙ୍କୁ ମନ୍ତ୍ରମୁଗ୍ଧ କରିଥିଲେ । ତାଙ୍କୁ ତବଲାରେ ଇମନ୍ ସରକାର ଓ ହାରମୋନିୟମ୍ରେ ଜନାବ୍ ସପ୍ତକ୍ ହୁସେନ୍ ସହଯୋଗ କରିଥିଲେ ।
ସଂଧ୍ୟାର ଦ୍ୱିତୀୟ ତଥା ଅନ୍ତିମ ପରିବେଷଣ ଥିଲା ମୁମ୍ବାଇରୁ ଆସିଥିବା ବିଦୁଷି ଅମୃତ କାଲେଙ୍କ ଦ୍ୱାରା ଅଭଙ୍ଗ ସଙ୍ଗୀତ ପରିବେଷଣ । ତାଙ୍କ ପ୍ରସ୍ତୁତିରେ ଥିଲା କିଛି ସୁନ୍ଦର ଭକ୍ତି, ସୁଫି ଓ ନିର୍ଗୁଣୀ ପରମ୍ପରାର ସଙ୍ଗୀତ, ଯାହା ଭଗବାନ ବିଠଲଙ୍କୁ ସମର୍ପଣ କରାଯାଇଥିଲା । ଭଗବାନ ବିଠଲଙ୍କୁ ସାଧାରଣତଃ ଭଗବାନ ବିଷ୍ଣୁ କିମ୍ବା ତାଙ୍କ ଅବତାର କୃଷ୍ଣଙ୍କ ଭାବରେ ବିବେଚନା କରାଯାଏ । ଅମୃତ କାଲେଙ୍କ ସଙ୍ଗୀତ ଚମତ୍କାର ଏବଂ ସୁମଧୁର ଥିଲା ଯାହାକୁ ରବିନ୍ଦ୍ର ମଣ୍ଡପରେ ଉପସ୍ଥିତ ଦର୍ଶକମାନେ ପ୍ରଶଂସା କରିଥିଲେ । ତାଙ୍କୁ ତବଲାରେ ତେଜଭ୍ରୁଷ ଏସ୍? ଜୋଶୀ, ହାରମୋନିୟମ୍ରେଶ ଆକାଶ ରଞ୍ଜିବ ବିଶ୍ୱାଳ, ପଖୱାଜରେ ସୋମ୍ୟ ରଞ୍ଜନ ନାୟକ, ପର୍କ୍ୟୁସନରେ ସିମାଞ୍ଚଳ ମହାରଣା, ମଞ୍ଜିରାରେ ରାଜେଶ କୁମାର ଜେନା ଓ ତାନପୁରାରେ ମନ୍ଦାକିନୀ ଶ୍ରେୟା ସହଯୋଗ କରିଥିଲେ ।
ଉଦ୍ଘା ଟନୀ ସଂଧ୍ୟାର ଅତିଥିମାନେ ଥିଲେ ଭୁବନେଶ୍ୱର ମ୍ୟୁଜିକ ସର୍କଲର ସଭାପତି ଡ଼କ୍ଟର ଅରବିନ୍ଦ ବେହେରା, ଭୁବନେଶ୍ୱର ମ୍ୟୁଜିକ ସର୍କଲର ଉପ ସଭାପତି ବିଦୁ ଭୁଷଣ ମହାନ୍ତି, ଭୁବନେଶ୍ୱର ମ୍ୟୁଜିକ ସର୍କଲର ସଚିବ କ୍ଷୀରୋଦ ପଟ୍ଟନାୟକ ଏବଂ ଭାରତ ସରକାରଙ୍କ ଅବସରପ୍ରାପ୍ତ ପ୍ରଶାସନିକ ଅଧିକାରୀ ନୀଳମାଧବ ମହାନ୍ତି । କାର୍ଯ୍ୟକ୍ରମଟିକୁ ପରିଚାଳନା ଓ ସଂଚାଳନାରେ ସାହାଯ୍ୟ କରିଥିଲେ ଭୁବନେଶ୍ୱର ମ୍ୟୁଜିକ ସର୍କଲର ସଦସ୍ୟା ମୀରା ପଣ୍ଡା । ଏହି ସମର୍ପଣ କାର୍ଯ୍ୟକ୍ରମଟିର ସିଧାପ୍ରସାରଣ ଭୁବନେଶ୍ୱର ମ୍ୟୁଜିକ ସର୍କଲର ୟୁଟ୍ୟୁବ୍ ଚ୍ୟାନେଲରେ ପ୍ରସାରିତ କରାଯାଉଛି ।
---------------
ହିନ୍ଦୁସ୍ଥାନ ସମାଚାର / ବନ୍ଦନା
