ନୂଆଦିଲ୍ଲୀ, ୨୩ ଅକ୍ଟୋବର (ହି.ସ.)- ଭାରତ କହିଛି ଯେ ଚୀନ୍ ସହ ଲାଗିଥିବା ବାସ୍ତବ ନିୟନ୍ତ୍ରଣ ରେଖା (ଏଲ୍ଏସି)ରେ ସ୍ଥିତି ସମୟ ସମୟରେ ସେତେବେଳେ ହିଁ ବିଗିଡ଼ିଥାଏ, ଯେତେବେଳେ ଚୀନ୍ ସେନା ନିର୍ଦ୍ଧାରିତ ପାଟ୍ରୋଲିଂ ପଦ୍ଧତିରୁ ହଟିଯାଏ। ଏଭଳି ପରିସ୍ଥିତିରେ ଉଭୟ ପକ୍ଷ ସମସ୍ୟାର ସମାଧାନ ଏବଂ ଭୁଲ ବୁଝାମଣାରୁ ରକ୍ଷା ପାଇବା ପାଇଁ କୂଟନୈତିକ ଓ ସାମରିକ ମାଧ୍ୟମର ବ୍ୟବହାର କରିଥାନ୍ତି।

ବିଦେଶ ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସୱାଲ ଶୁକ୍ରବାର ସାମ୍ବାଦିକ ସମ୍ମିଳନୀରେ କହିଛନ୍ତି ଯେ ଯେତେବେଳେ ଚୀନ୍ ସେନା ପୂର୍ବରୁ ନିର୍ଦ୍ଧାରିତ ପାଟ୍ରୋଲିଂ ପଦ୍ଧତିରୁ ହଟିଯାଏ, ସେତେବେଳେ ଭାରତ-ଚୀନ୍ ସୀମାନ୍ତ ଅଂଚଳରେ ସମୟ ସମୟରେ ସ୍ଥିତି ବିଗିଡ଼ିଥାଏ।

ସେ କହିଛନ୍ତି ଯେ ଉଭୟ ପକ୍ଷ ବାସ୍ତବ ନିୟନ୍ତ୍ରଣ ରେଖାରେ ରହିଥିବା ଅବଶିଷ୍ଟ ସମସ୍ୟାଗୁଡ଼ିକର ସମାଧାନ ଏବଂ ଭୁଲ ବୁଝାମଣା ଓ ଭୁଲ ଆକଳନରୁ ରକ୍ଷା ପାଇବା ପାଇଁ ବର୍ତମାନର କୂଟନୈତିକ ଏବଂ ସାମରିକ ବ୍ୟବସ୍ଥାଗୁଡ଼ିକର ବ୍ୟବହାର ଜାରି ରଖିଛନ୍ତି। ଉଭୟ ପକ୍ଷ ଉନ୍ନତ ସୀମା ପରିଚାଳନା ପାଇଁ ଉପଯୁକ୍ତ ଅଂଚଳଗୁଡ଼ିକରେ ଏଲ୍ଏସି ସମ୍ପର୍କିତ ବୁଝାମଣାକୁ ଉନ୍ନତ କରିବାର ଉପାୟ ଉପରେ ଆଲୋଚନା କରିବାକୁ ମଧ୍ୟ ସହମତ ହୋଇଛନ୍ତି।

ଜୟସୱାଲ ଉନ୍ନତ ସୀମା ପରିଚାଳନା ପାଇଁ ଏଲ୍ଏସି ସମ୍ପର୍କିତ ବୁଝାମଣାକୁ ସୁଧାରିବା ନିମନ୍ତେ ହୋଇଥିବା ଚୁକ୍ତିଗୁଡ଼ିକର ଉଲ୍ଲେଖ କରିଥିଲେ। ଏଥିସହ ଭାରତ-ଚୀନ୍ ଦ୍ୱିପାକ୍ଷିକ ସମ୍ପର୍କକୁ ଆଗକୁ ବଢ଼ାଇବା ପାଇଁ ଶାନ୍ତି ଏବଂ ସ୍ଥିରତା ଆବଶ୍ୟକ ବୋଲି ସେ ଗୁରୁତ୍ୱ ଦେଇଥିଲେ।

ଉଲ୍ଲେଖନୀୟ ଯେ ଭାରତ-ଚୀନ୍ ସୀମାର ସ୍ଥିତି ସମ୍ପର୍କରେ ଭାରତ-ତିବ୍ୱତ ସୀମା ପୁଲିସ (ଆଇଟିବିପି)ର ମହାନିର୍ଦ୍ଦେଶକ ଶତ୍ରୁଜିତ ସିଂହ କପୁର କହିଥିଲେ ଯେ ଅରୁଣାଚଳ ପ୍ରଦେଶର ଅନେକ ସ୍ଥାନରେ ଚୀନ୍ ସହ ମୁହାଁମୁହିଁ ସ୍ଥିତିର ଘଟଣା ଘଟିଛି।

--------

ହିନ୍ଦୁସ୍ଥାନ ସମାଚାର / ଗଗନ