ନୂଆଦିଲ୍ଲୀ, ୨୩ ଅକ୍ଟୋବର(ହି.ସ.) – କିଂଟୁରର ବୀରାଙ୍ଗନା ରାଣୀ ଚେନ୍ନମ୍ମାଙ୍କ ଜନ୍ମ ବାର୍ଷିକୀ ଏବଂ ବ୍ରିଟିଶମାନଙ୍କ ବିରୁଦ୍ଧରେ ତାଙ୍କର ଐତିହାସିକ ବିଜୟର ୨୦୨ତମ ବାର୍ଷିକୀ ଶୁକ୍ରବାର ଦିନ ସଂସଦ ପରିସରର ପ୍ରେରଣା ସ୍ଥଳ ଠାରେ ଭବ୍ୟତାର ସହ ପାଳନ କରାଯାଇଥିଲା। ଏହି ଅବସରରେ ଲୋକସଭା ବାଚସ୍ପତି ଓମ ବିର୍ଲା, କେନ୍ଦ୍ର ଜଳ ଶକ୍ତି ମନ୍ତ୍ରୀ ସି.ଆର୍. ପାଟିଲ ଏବଂ ରେଳ ଓ ଜଳ ଶକ୍ତି ରାଷ୍ଟ୍ରମନ୍ତ୍ରୀ ଭି. ସୋମନ୍ନାଙ୍କ ସମେତ ଅନେକ ମାନ୍ୟଗଣ୍ୟ ବ୍ୟକ୍ତି ରାଣୀ ଚେନ୍ନମ୍ମାଙ୍କୁ ପୁଷ୍ପମାଲ୍ୟ ଅର୍ପଣ କରିଥିଲେ ଏବଂ ତାଙ୍କ ବୀରତ୍ୱ ଓ ବଳିଦାନକୁ ସ୍ମରଣ କରିଥିଲେ।

ରେଳ ଏବଂ ଜଳ ଶକ୍ତି ରାଷ୍ଟ୍ରମନ୍ତ୍ରୀ ତଥା ତୁମକୁରୁ ସାଂସଦ ଭି. ସୋମନ୍ନାଙ୍କ ନେତୃତ୍ୱରେ ଏହି କାର୍ଯ୍ୟକ୍ରମରେ ସାଂସଦ ପି.ସି. ମୋହନ, ଡକ୍ଟର ସୁଧାକର, କର୍ଣ୍ଣାଟକର ପୂର୍ବତନ ମନ୍ତ୍ରୀ ମୁରୁଗେଶ ନିରାନୀ ଏବଂ ବସନଗୌଡ଼ା ପାଟିଲ ୟତନାଲଙ୍କ ସମେତ ଅନେକ ବିଶିଷ୍ଟ ବ୍ୟକ୍ତି ଯୋଗ ଦେଇଥିଲେ। କର୍ଣ୍ଣାଟକ ଏବଂ ଦିଲ୍ଲୀର ବିଭିନ୍ନ ଜିଲ୍ଲାରେ ରହୁଥିବା କନ୍ନଡ଼ ସମ୍ପ୍ରଦାୟର ଲୋକମାନେ ମଧ୍ୟ ଏହି ଅବସରରେ ରାଣୀ ଚେନ୍ନମ୍ମାଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ।

ଏହି କାର୍ଯ୍ୟକ୍ରମରେ ବିଭିନ୍ନ ମଠର ସନ୍ଥମାନେ ମଧ୍ୟ ଉପସ୍ଥିତ ଥିଲେ। ଏମାନଙ୍କ ମଧ୍ୟରେ ଥିଲେ କୁଡାଲସଙ୍ଗମର ବାସବ ମୃତ୍ୟୁଞ୍ଜୟ ସ୍ୱାମୀ, ବିଦରର ଆଲୁରସ୍ଥିତ ସିଦ୍ଧରୁଧା ମଠର ସନ୍ନ୍ୟାସୀ ଶଙ୍କରାନନ୍ଦ ସ୍ୱାମୀ, କାକ୍କମାରୀସ୍ଥିତ ଗୁରୁଦେବ ଆଶ୍ରମର ଆତ୍ମାରାମା ସ୍ୱାମୀ ଏବଂ ଚାଲକାପୁରାସ୍ଥିତ ସିଦ୍ଧରୁଧା ମଠର ବିନାୟକ ସ୍ୱାମୀ।

ଏହି ଅବସରରେ ଉଦ୍ବୋଧନ ଦେଇ ସୋମନ୍ନା ରାଣୀ ଚେନ୍ନମ୍ମାଙ୍କୁ ଦେଶର ଅଦ୍ୱିତୀୟ ବୀରତ୍ୱ ବୋଲି ବର୍ଣ୍ଣନା କରି କହିଥିଲେ ଯେ ସେ କେବଳ ଯୁଦ୍ଧ ଲଢ଼ି ନଥିଲେ, ବରଂ ସାମ୍ରାଜ୍ୟବାଦୀ ଶକ୍ତିକୁ ଆହ୍ୱାନ ଦେଇଥିଲେ। ତାଙ୍କ ନାମ ଇତିହାସରେ ପ୍ରତିରୋଧ ଏବଂ ଅଦମ୍ୟ ସାହସର ଏକ ଅମର ପ୍ରତୀକ ଭାବରେ ଲିପିବଦ୍ଧ ହୋଇଛି। ଏଭଳି ଜଣେ ସାହସୀ ମହିଳାଙ୍କ ସଫଳତାକୁ ମନେ ପକାଇବା ସମସ୍ତଙ୍କ ପାଇଁ ଗର୍ବ ଓ ଆନନ୍ଦର ବିଷୟ।

ହିନ୍ଦୁସ୍ଥାନ ସମାଚାର/ବୀଣାପାଣି

.......................................

ହିନ୍ଦୁସ୍ଥାନ ସମାଚାର / ବୀଣାପାଣି