ଧର୍ମଶାଳା, ୨୬ ଅକ୍ଟୋବର (ହି.ସ.)- ହିମାଚଳ ପ୍ରଦେଶର ଧର୍ମଶାଳାସ୍ଥିତ ଖନିଆରା-ୟୋଲ ଅଂଚଳରେ ପାରାଗ୍ଲାଇଡିଂ ଦୁର୍ଘଟଣାରେ ବୁଲଗେରିଆର ୪୭ ବର୍ଷୀୟ ପାଇଲଟ୍ ମ୍ୟାକ୍ସିମ୍ ଭାଲେଂଟିନୋଭିଚ୍ ଗାଭ୍ରିଲିଚେଙ୍କୋଙ୍କ ମୃତ୍ୟୁ ହୋଇଛି। ଅନ୍ୟପଟେ, ବ୍ରିଟେନର ୬୩ ବର୍ଷୀୟ ପାଇଲଟ୍ ଷ୍ଟିଫେନ୍ଙ୍କୁ ସୁରକ୍ଷିତ ଉଦ୍ଧାର କରାଯାଇଛି। ଉଭୟ ରବିବାର ବୀଡ-ବିଲିଂରୁ ଉଡ଼ାଣ ଭରିଥିଲେ। ପ୍ରାଥମିକ ସୂଚନା ଅନୁସାରେ, ପ୍ରବଳ ପବନ ଯୋଗୁଁ ରାଇଜିଂ ଷ୍ଟାର ପିକ୍ ନିକଟରେ ଏହି ଦୁର୍ଘଟଣା ଘଟିଥିଲା।

ପୁଲିସ ଓ ପ୍ରଶାସନଠାରୁ ମିଳିଥିବା ସୂଚନା ଅନୁସାରେ, ମ୍ୟାକ୍ସିମ୍ ଅକ୍ଟୋବର ୭ ତାରିଖରେ ପର୍ଯ୍ୟଟକ ଭିସାରେ ଭାରତ ଆସିଥିଲେ। ରବିବାର ବୀଡ-ବିଲିଂରୁ ଉଡ଼ାଣ ଭରିବା ପରେ ଅପରାହ୍ଣ ପ୍ରାୟ ୩ଟାରୁ ସାଢ଼େ ୩ଟା ମଧ୍ୟରେ ଖନିଆରା-ୟୋଲ ଅଂଚଳରେ ଦୁର୍ଘଟଣା ଘଟିଥିବା ସୂଚନା ମିଳିଥିଲା।

ଏହାପରେ ସ୍ଥାନୀୟ ପୁଲିସ, ରାଜ୍ୟ ବିପର୍ଯ୍ୟୟ ପ୍ରତିକ୍ରିୟା ବଳ (ଏସ୍ଡିଆର୍ଏଫ୍) ଏବଂ ସ୍ଥାନୀୟ ହିମ ସଂସାର ରେସ୍କ୍ୟୁ ଟିମ୍ ମିଳିତ ଭାବେ ଉଦ୍ଧାର ଅଭିଯାନ ଆରମ୍ଭ କରିଥିଲେ। ରାତି ପ୍ରାୟ ୯ଟାରେ ଘଟଣାସ୍ଥଳକୁ ଯାଇଥିବା ଟିମ୍ ସାରା ରାତି ଖୋଜାଖୋଜି ଅଭିଯାନ ଚଳାଇଥିଲା।

ସୋମବାର ସକାଳ ପ୍ରାୟ ୧୦ଟାରେ ଉଦ୍ଧାର ଅଭିଯାନ ସଫଳତାର ସହ ଶେଷ ହୋଇଥିଲା। ଏହି ଅଭିଯାନରେ ମ୍ୟାକ୍ସିମ୍ଙ୍କ ମୃତ୍ୟୁ ହୋଇଥିବା ବେଳେ ବ୍ରିଟିଶ ନାଗରିକ ଷ୍ଟିଫେନ୍ ଆଂଟୋନି ପର୍ଡିଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଥିଲା। ତାଙ୍କ ସ୍ଥିତି ସୁରକ୍ଷିତ ଥିବା କୁହାଯାଇଛି। ମୃତକଙ୍କ ଶବକୁ ପୋଷ୍ଟମର୍ଟମ ପାଇଁ ଜୋନାଲ ହସ୍ପିଟାଲ ଧର୍ମଶାଳାର ଶବଗୃହରେ ରଖାଯାଇଛି।

କାଙ୍ଗଡ଼ା ଏସ୍ପି କୁଲଭୂଷଣ ବର୍ମା କହିଛନ୍ତି ଯେ, ପୁଲିସ ଏହି ମାମଲାରେ ଆବଶ୍ୟକ ଆଇନଗତ ଔପଚାରିକତା ପୂରଣ କରୁଛି। ଅନ୍ୟପଟେ, ପରିବର୍ତିତ ପାଣିପାଗ ଏବଂ ପ୍ରବଳ ପବନ ମଧ୍ୟରେ ପାରାଗ୍ଲାଇଡିଂ ଉଡ଼ାଣର ସୁରକ୍ଷାକୁ ନେଇ ପୁଣିଥରେ ପ୍ରଶ୍ନ ଉଠିଛି।

----

----

ହିନ୍ଦୁସ୍ଥାନ ସମାଚାର / ଗଗନ