ନୂଆଦିଲ୍ଲୀ, ଅକ୍ଟୋବର ୫ (ହି.ସ.) - ପଞ୍ଜାବ ଏବଂ ହରିୟାଣା ହାଇକୋର୍ଟ ମୁଖ୍ୟମନ୍ତ୍ରୀ ଭଗବନ୍ତ ମାନ୍ଙ୍କ ଓଏସଡି ରାଜବୀର ସିଂ ଘୁମ୍ମାନଙ୍କ ସହ ଜଡିତ ଦୁର୍ନୀତି ଅଭିଯୋଗର ତଦନ୍ତକୁ ସିବିଆଇକୁ ହସ୍ତାନ୍ତର କରିବା ପରେ ଭାରତୀୟ ଜନତା ପାର୍ଟି (ବିଜେପି) ଆମ୍ ଆଦମୀ ପାର୍ଟି ସରକାରଙ୍କୁ ଟାର୍ଗେଟ କରିଛି । ବିଜେପି ନେତା ସମ୍ବିତ ପାତ୍ର କହିଛନ୍ତି ଯେ ପଞ୍ଜାବରେ ଦୁର୍ନୀତିର ଗମ୍ଭୀର ଅଭିଯୋଗ ସାମ୍ନାକୁ ଆସିଛି ଏବଂ ବର୍ତମାନ ମୁଖ୍ୟମନ୍ତ୍ରୀ ଭଗବନ୍ତ ମାନ୍ ଏବଂ ଅରବିନ୍ଦ କେଜ୍ରିୱାଲ ଏହି ଅଭିଯୋଗର ଜବାବ ଜନସାଧାରଣଙ୍କ ସମ୍ମୁଖରେ ଦେବା ଉଚିତ ।
ସୋମବାର ପାର୍ଟି ମୁଖ୍ୟାଳୟରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ସମ୍ବିତ ପାତ୍ର କହିଛନ୍ତି ଯେ ବିଜେପି ଦୀର୍ଘ ସମୟ ଧରି ପଞ୍ଜାବ ସରକାରରେ ଦୁର୍ନୀତି ଏବଂ ଆଇନ ଶୃଙ୍ଖଳା ଉପରେ ପ୍ରଶ୍ନ ଉଠାଇଛି । ସେ ଅଭିଯୋଗ କରିଛନ୍ତି ଯେ ସରକାର ଏବଂ ବ୍ୟବସାୟିକ ସ୍ୱାର୍ଥ ମଧ୍ୟରେ ମଧ୍ୟସ୍ଥି ଭାବରେ କାର୍ଯ୍ୟ କରୁଥିବା ଏବଂ ସରକାରୀ କାର୍ଯ୍ୟକୁ ପ୍ରଭାବିତ କରୁଥିବା ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ସହିତ ଜଡିତ ଲୋକଙ୍କ ବିରୋଧରେ ଗୁରୁତର ଅଭିଯୋଗ ରହିଛି ।
ସେ କହିଛନ୍ତି ଯେ ବର୍ତମାନ ହାଇକୋର୍ଟଙ୍କ ନିର୍ଦ୍ଦେଶ ପରେ, ସିବିଆଇ ତଦନ୍ତ ଏହି ଅଭିଯୋଗର ସତ୍ୟତା ପ୍ରକାଶ କରିବା ଉଚିତ୍ । ସମଗ୍ର ପ୍ରସଙ୍ଗରେ ମୁଖ୍ୟମନ୍ତ୍ରୀ ଭଗବନ୍ତ ମାନ୍ ଏବଂ ଆମ୍ ଆଦମୀ ପାର୍ଟି ନେତା ଅରବିନ୍ଦ କେଜ୍ରିୱାଲଙ୍କ ଠାରୁ ସ୍ପଷ୍ଟୀକରଣ ଦାବି କରିଛି ବିଜେପି ।
ସମ୍ବିତ ପାତ୍ର ପଞ୍ଜାବର ଆଇନ ଶୃଙ୍ଖଳା ପ୍ରସଙ୍ଗ ମଧ୍ୟ ଉଠାଇଥିଲେ । ସେ କହିଛନ୍ତି ଯେ ଗତ ୪୮ ଘଂଟା ମଧ୍ୟରେ ରାଜ୍ୟରେ ଚାରିଟି ହତ୍ୟା ଘଟଣା ଘଟିଛି । ଏହି ଘଟଣାଗୁଡ଼ିକୁ ଦର୍ଶାଇ ବିଜେପି ଅଭିଯୋଗ କରିଛି ଯେ ପଞ୍ଜାବରେ ସାଧାରଣ ଲୋକଙ୍କ ସୁରକ୍ଷାକୁ ନେଇ ଏକ ଗୁରୁତର ପରିସ୍ଥିତି ସୃଷ୍ଟି ହୋଇଛି ।
ସେ କହିଥିଲେ ଯେ ଗୋଟିଏ ପଟେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ସହ ଜଡ଼ିତ ଲୋକଙ୍କ ବିରୋଧରେ ଗୁରୁତର ଦୁର୍ନୀତିର ଅଭିଯୋଗର ତଦନ୍ତ ସିବିଆଇ ଦ୍ୱାରା ଆରମ୍ଭ ହେଉଥିବା ବେଳେ ଅନ୍ୟ ପଟେ ରାଜ୍ୟରେ ଅପରାଧ ଘଟଣା ମଧ୍ୟ ଚିନ୍ତାର ବିଷୟ ହୋଇ ରହିଛି । ଉଭୟ ଦୁର୍ନୀତି ଏବଂ ଆଇନ ଶୃଙ୍ଖଳା ପ୍ରସଙ୍ଗରେ ଦଳ ମାନ୍ ସରକାରଙ୍କ ଠାରୁ ଉତର ମାଗିଛି ।
ହିନ୍ଦୁସ୍ଥାନ ସମାଚାର / ଭାନୁ ଚରଣ