ମୁମ୍ବାଇ, ୨୦ ମାର୍ଚ୍ଚ (ହି.ସ.)- ବଲିଉଡର ପ୍ରଖ୍ୟାତ ଫ୍ୟାଶନ୍ ଡିଜାଇନର୍ ମନୀଷ ମଲୋହୋତ୍ରାଙ୍କ ମାଆ ସୁଦର୍ଶନ ମଲୋହୋତ୍ରାଙ୍କ ଦେହାନ୍ତକୁ ନେଇ ଚଳଚ୍ଚିତ୍ର ଜଗତରେ ଶୋକର ଛାୟା ଖେଳିଯାଇଛି । ସୁଦର୍ଶନ ମଲୋହୋତ୍ରା ୯୪ ବର୍ଷ ବୟସରେ ଶେଷ ନିଶ୍ୱାସ ତ୍ୟାଗ କରିଛନ୍ତି ।
ଏହି ଦୁଃଖଦ ଖବର ପ୍ରଚାରିତ ହେବା ପରେ, ଅନେକ ପ୍ରମୁଖ ବଲିଉଡ ସେଲିବ୍ରିଟି ମନୀଷଙ୍କ ମୁମ୍ବାଇ ସ୍ଥିତ ବାସଭବନରେ ପହଂଚି ତାଙ୍କୁ ସମବେଦନା ଜଣାଇଥିଲେ । ଏହି ସମୟରେ ଐଶ୍ୱର୍ଯ୍ୟା ରାୟ ବଚ୍ଚନ ଏବଂ ଅଭିଷେକ ବଚ୍ଚନ ମଧ୍ୟ ପରିବାର ସହିତ ଠିଆ ହୋଇଥିବା ଦେଖାଯାଇଥିଲା ।
ସୁଦର୍ଶନ ମଲୋହୋତ୍ରା ଅନ୍ତିମ ଦର୍ଶନ ପାଇଁ ଅନେକ ଚଳଚ୍ଚିତ୍ର ତାରକା ମନୀଷ ମଲୋହୋତ୍ରାଙ୍କ ଘରେ ପହଂଚିଥିଲେ । ଏଥିରେ କରିସ୍ମା କପୁର, ଉର୍ମିଲା ମାତୋଣ୍ଡକର, ମଲାଇକା ଆରୋରା ଏବଂ ଅର୍ଜୁନ କପୁରଙ୍କ ଭଳି ଚଳଚ୍ଚିତ୍ର ତାରକା ସାମିଲ୍ ଥିଲେ । ସୋସିଆଲ ମିଡିଆରେ ପୋଷ୍ଟ ହୋଇଥିବା ଭିଡ଼ିଓ ଏବଂ ଫଟୋରେ ଷ୍ଟାରମାନେ ମନୀଷ ଏବଂ ତାଙ୍କ ପରିବାର ପ୍ରତି ଏହି କଷ୍ଟକର ସମୟରେ ସମବେଦନା ପ୍ରକାଶ କରୁଥିବା ଦେଖାଯାଇଥିଲା । ଏଥିସହ ଫିଲ୍ମ ଇଣ୍ଡଷ୍ଟ୍ରିରେ ତାଙ୍କର ଘନିଷ୍ଠ ବନ୍ଧୁ କରଣ ଜୋହର ମଧ୍ୟ ଏହି ଦୁଃଖର ସମୟରେ ଉପସ୍ଥିତ ଥିଲେ ।
ଏହା ବ୍ୟତୀତ ଅନନ୍ୟା ପାଣ୍ଡେ, ସୋନାଲି ବେନ୍ଦ୍ରେ, ସଞ୍ଜୟ କପୁର, ଶନାୟା କପୁର ଏବଂ ରବୀନା ଟଣ୍ଡନ ମଧ୍ୟ ମନୀଷଙ୍କ ଘରେ ପହଂଚି ସୁଦର୍ଶନ ମଲୋହୋତ୍ରାଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ । ମନୀଷ ତାଙ୍କ ମାଆଙ୍କ ବହୁତ ନିକଟତର ଥିଲେ ଏବଂ ତାଙ୍କୁ ତାଙ୍କର ସର୍ବଶ୍ରେଷ୍ଠ ପ୍ରେରଣା ବୋଲି ମାନିଥିଲେ । ତାଙ୍କ ଟିମ୍ ଦ୍ୱାରା ଜାରି ଏକ ବିବୃତି ଅନୁଯାୟୀ, ଶେଷକୃତ୍ୟ ଶୁକ୍ରବାର ମୁମ୍ବାଇର ସାନ୍ତାକ୍ରୁଜ୍ (ପଶ୍ଚିମ) ସ୍ଥିତ ହିନ୍ଦୁ ଶ୍ମଶାନରେ କରାଯିବ । ତାଙ୍କ ମାଆଙ୍କ ଦେହାନ୍ତ ମନୀଷଙ୍କୁ ଗଭୀର ଭାବରେ ମର୍ମାହତ କରିଛି ଏବଂ ତାଙ୍କ ଜୀବନରେ ଏକ ବିରାଟ ଶୂନ୍ୟସ୍ଥାନ ସୃଷ୍ଟି କରିଛି ।
ହିନ୍ଦୁସ୍ଥାନ ସମାଚାର / ପ୍ରଦୀପ୍ତ
