ଭୁବନେଶ୍ୱର, ୨୮ ମାର୍ଚ୍ଚ (ହି.ସ.)- ଦିନକୁ ଦିନ ବୃଦ୍ଧି ପାଇବାରେ ଲାଗିଛି ଅଙ୍ଗ ପ୍ରତିରୋପଣର ଚାହିଦା। ଏହାର ଗୁରୁତ୍ୱକୁ ଉପଲବ୍ଧି କରିବା ସହିତ, ବ୍ୟାପକ ସଚେତନତା ପ୍ରସାର, ସଂସ୍ଥାଗତ ପ୍ରସ୍ତୁତିକୁ ଦୃଢ଼ କରିବା, ଅଙ୍ଗଦାତାଙ୍କ ସଂଖ୍ୟା ବିସ୍ତାର କରିବା ଏବଂ ପ୍ରତିରୋପଣ ଫଳାଫଳକୁ ଉନ୍ନତ କରିବା ପାଇଁ ନୀତି ରଣନୀତି ସହିତ ସମନ୍ୱୟ ସ୍ଥାପନ କରିବାର ଜରୁରୀ ଆବଶ୍ୟକତା ରହିଛି। ଏନେଇ, ଏମ୍ସ ଭୁବନେଶ୍ୱର, ଜାତୀୟ ଚିକିତ୍ସା ବିଜ୍ଞାନ ଏକାଡେମୀ (ନାମ୍ସ) ସହଯୋଗରେ, ଚଳିତ ମାସ ୩୦(ସୋମବାର) ସ୍ୱାସ୍ଥ୍ୟସେବାରେ ଅଙ୍ଗ ପ୍ରତିରୋପଣ ଏବଂ କୃତ୍ରିମ ବୁଦ୍ଧିମତା (ଏଆଇ) ଉପରେ ଏକ ପ୍ରସାରଣ କର୍ମଶାଳା ସହ ଆଞ୍ଚଳିକ ନିରନ୍ତର ଚିକିତ୍ସା ଶିକ୍ଷା (ସିଏମ୍ଇ) କାର୍ଯ୍ୟକ୍ରମ ଆୟୋଜିତ ହେବ।
ଏମ୍ସ ଭୁବନେଶ୍ୱର ପରିସରରେ ଅନୁଷ୍ଠିତ ହେବାକୁ ଥିବା ଏହି ଦିନିକିଆ କାର୍ଯ୍ୟକ୍ରମ ସମ୍ପର୍କରେ ସୂଚନା ଦେଇ କାର୍ଯ୍ୟନିର୍ବାହୀ ନିର୍ଦ୍ଦେଶକ ଏବଂ ସିଇଓ ପ୍ରଫେସର (ଡ.) ଆଶୁତୋଷ ବିଶ୍ୱାସ କହିଛନ୍ତି ଯେ ଏହି କାର୍ଯ୍ୟକ୍ରମର ଲକ୍ଷ୍ୟ କ୍ଲିନିକାଲ୍ ଏବଂ ଗବେଷଣା କ୍ଷେତ୍ରରେ ଏଆଇ ସମ୍ପର୍କିତ ବ୍ୟବସ୍ଥାର ବୁଝାମଣା ଏବଂ ଗ୍ରହଣକୁ ତ୍ୱରାନ୍ୱିତ କରିବା ସହିତ ଏନେଇ ରହିଥିବା ପ୍ରମୁଖ ଆହ୍ୱାନଗୁଡ଼ିକୁ ସମାଧାନ କରିବା।
ଓଡ଼ିଶା, ପଶ୍ଚିମବଙ୍ଗ, ବିହାର ଏବଂ ଝାଡ଼ଖଣ୍ଡ ଭଳି ଚାରୋଟି ରାଜ୍ୟର ପ୍ରମୁଖ ସ୍ୱାସ୍ଥ୍ୟ ପ୍ରତିଷ୍ଠାନରୁ ତିନି ଶହରୁ ଅଧିକ ଡାକ୍ତର/ଗବେଷକ ଏହି କାର୍ଯ୍ୟକ୍ରମରେ ଅଂଶଗ୍ରହଣ କରିବାର ଆଶା କରାଯାଉଛି। ଏମ୍ସ ପାଟ୍ନା, ଏମ୍ସ ଦେଓଘର, ଏମ୍ସ କଲ୍ୟାଣୀ ଏବଂ ଏମ୍ସ ଭୁବନେଶ୍ୱରରୁ ମଧ୍ୟ ପ୍ରତିନିଧିମାନେ ଏହି ସିଏମ୍ଇରେ ସାମିଲ ହେବେ।
ସେହିପରି ଆଇଆଇଟି ଭୁବନେଶ୍ୱର, ପିଜିଆଇଏମ୍ଇଆର୍ ଚଣ୍ଡିଗଡ଼, ନାଇସର୍ ଭୁବନେଶ୍ୱର, ଓଟିଟିଇଟି, ଆଇସର୍ ବ୍ରହ୍ମପୁର, ଆଇଜିଆଇଏମ୍ଏସ ପାଟନା ଭଳି ପ୍ରମୁଖ ପ୍ରତିଷ୍ଠାନ ଏବଂ ରୋଟ୍ଟୋ, ସୋଟ୍ଟୋ ସମେତ ଜାତୀୟ ପ୍ରତିରୋପଣ ସଂଗଠନର ବିଶିଷ୍ଟ ବିଶେଷଜ୍ଞମାନେ ମଧ୍ୟ ଏହି କାର୍ଯ୍ୟକ୍ରମରେ ଯୋଗଦେବେ।
ଏହି କାର୍ଯ୍ୟକ୍ରମକୁ ସ୍ୱାସ୍ଥ୍ୟସେବାରେ ଅଙ୍ଗ ପ୍ରତିରୋପଣ ଏବଂ କୃତ୍ରିମ ବୁଦ୍ଧିମତା(ଏଆଇ) ଭଳି ଦୁଇଟି ଉଚ୍ଚପ୍ରଭାବଶାଳୀ ବିଷୟ ସମ୍ବନ୍ଧରେ ଏକ ବ୍ୟାପକ ଶୈକ୍ଷିକ ପ୍ଲାଟଫର୍ମ ଭାବରେ ଡିଜାଇନ୍ କରାଯାଇଛି। ପ୍ରଥମ ଅଧିବେଶନରେ ଅଙ୍ଗ ପ୍ରତିରୋପଣ, ନୀତିଗତ ଢାଂଚାକୁ ସମ୍ବୋଧିତ କରିବା, ନୈତିକ ଏବଂ ଆଇନଗତ ବିଚାର, ଦାତା ପୁଲ ପ୍ରସାରଣ ରଣନୀତି, ଭିତିଭୂମି ବିକାଶ, ଏବଂ ହୃଦ୍ରୋଗ, ବୃକକ୍, ହେମାଟୋପୋଏଟିକ୍ ଏବଂ ଗୁରୁତ୍ୱପୂର୍ଣ୍ଣ ଯତ୍ନ କ୍ଷେତ୍ରରେ ବହୁବିଧ କ୍ଲିନିକାଲ୍ ଅଭ୍ୟାସ ଉପରେ ଧ୍ୟାନ ଦିଆଯିବ।
ଦ୍ୱିତୀୟ ଅଧିବେଶନରେ ସ୍ୱାସ୍ଥ୍ୟସେବାରେ କୃତ୍ରିମ ବୁଦ୍ଧିମତାର ପରିବର୍ତନଶୀଳ ଭୂମିକା ଅନୁସନ୍ଧାନ କରାଯିବ, କ୍ଲିନିକାଲ୍ ନିଷ୍ପତି ଗ୍ରହଣ, ଡିଜିଟାଲ୍ ପାଥୋଲୋଜି, ଜିନୋମିକ୍ସ, ଟେଲିମେଡିସିନ୍ ଏବଂ ଯମଜ ଡିଜିଟାଲ୍ ମାନବ ଭଳି ଉଦୀୟମାନ ଉଦ୍ଭାବନରେ ଏହାର ପ୍ରୟୋଗ ଉପରେ ଆଲୋଚନା କରାଯିବ।
ଅଙ୍ଗ ପ୍ରତିରୋପଣ ଆଧୁନିକ ଚିକିତ୍ସା ବିଜ୍ଞାନର ସବୁଠାରୁ ଗୁରୁତ୍ୱପୂର୍ଣ୍ଣ ସଫଳତା ମଧ୍ୟରୁ ଗୋଟିଏ। ଅନ୍ତିମ ପର୍ଯ୍ୟାୟ ଅଙ୍ଗ ବିଫଳତା ସହିତ ରୋଗୀଙ୍କ ପାଇଁ ଜୀବନ ରକ୍ଷାକାରୀ ଭାବେ ଉଭାହୋଇଛି ଅଙ୍ଗ ପ୍ରତିରୋପଣ। ମାତ୍ର, ଦାତାଙ୍କ ଅଭାବ, ନିତୀଗତ ଜଟିଳତା ଏବଂ ଲଜିଷ୍ଟିକ୍ ବାଧା ଭଳି ନିରନ୍ତର ଚ୍ୟାଲେଞ୍ଜ ଏହାର ସମ୍ଭାବନାକୁ ସୀମିତ କରିଚାଲିଥିବା ଏମ୍ସ କାର୍ଯ୍ୟନିର୍ବାହୀ ନିର୍ଦ୍ଦେଶକ ଡ. ବିଶ୍ୱାସ ପ୍ରକାଶ କରିଛନ୍ତି।
ସମାନ୍ତରାଳ ଭାବରେ, ଏଆଇ ପରିଚାଳିତ ଏକ ପରିବର୍ତନଶୀଳ ଯୁଗର ଆରମ୍ଭ ହୋଇଥିବା କହିଲେ ଅତ୍ୟୁକ୍ତି ହେବ ନାହିଁ। ଚିକିତ୍ସା ସଠିକତାକୁ ଉନ୍ନତ କରିବା ଠାରୁ ଆରମ୍ଭ କରି ବ୍ୟକ୍ତିଗତ ଔଷଧ ପର୍ଯ୍ୟନ୍ତ, ସ୍ୱାସ୍ଥ୍ୟସେବା ପ୍ରଦାନରେ ଏଆଇ ଏକ ଯୁଗାନ୍ତକାରୀ ପରିବର୍ତନ ଆଣିବାର ପ୍ରତିବଦ୍ଧତା ରଖିଛି। ଏହି କର୍ମଶାଳା ଅର୍ଥପୂର୍ଣ୍ଣ ଆଲୋଚନା, ପ୍ରମାଣ ଆଧାରିତ ଜ୍ଞାନ ବଂଟନ ଏବଂ ଆନ୍ତଃଶାଖାଗତ ସହଯୋଗ ମାଧ୍ୟମରେ ଏହି ଦୁଇଟି ଗୁରୁତ୍ୱପୂର୍ଣ୍ଣ କ୍ଷେତ୍ରକୁ ସଂଯୋଗ କରିବାକୁ ଚେଷ୍ଟା କରିବା ନେଇ ମତପୋଷଣ କରିଛନ୍ତି ଡ. ବିଶ୍ୱାସ।
ଏହି ସିଏମ୍ଇ ନୀତି ନିର୍ଦ୍ଧାରକ, ଚିକିତ୍ସକ, ଗବେଷକ ଏବଂ ପ୍ରଯୁକ୍ତିବିଜ୍ଞାନୀମାନଙ୍କ ମଧ୍ୟରେ ସହଯୋଗକୁ ପ୍ରୋତ୍ସାହିତ କରିବା ଲକ୍ଷ୍ୟ ରଖିଛି। ଯାହାକି ଶେଷରେ ଉନ୍ନତ ରୋଗୀ ସେବା, ସ୍ୱାସ୍ଥ୍ୟସେବା ପ୍ରଦାନରେ ନବସୃଜନ ଏବଂ ଭବିଷ୍ୟତ ପାଇଁ ପ୍ରସ୍ତୁତ ଡାକ୍ତରୀ ବୃତିଗତଙ୍କ ବିକାଶରେ ଯୋଗଦାନ ଦେବ।
---------------
ହିନ୍ଦୁସ୍ଥାନ ସମାଚାର / ବନ୍ଦନା
