ନୂଆଦିଲ୍ଲୀ, ୧୩ ଏପ୍ରିଲ (ହି.ସ.)- ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସୋମବାର ଦିନ କହିଛନ୍ତି ଯେ ‘ନାରୀ ଶକ୍ତି ବନ୍ଦନ ଅଧନିୟମ’ ପ୍ରଣୟନ ହେଉଛି ଏକବିଂଶ ଶତାବ୍ଦୀର ସବୁଠାରୁ ଗୁରୁତ୍ୱପୂର୍ଣ୍ଣ ପଦକ୍ଷେପ ମଧ୍ୟରୁ ଗୋଟିଏ। ଏହି ଆଇନ କେବଳ ମହିଳା ସଶକ୍ତିକରଣ ଦିଗରେ ଏକ ଐତିହାସିକ ପଦକ୍ଷେପ ନୁହେଁ ବରଂ ଦେଶର ଗଣତାନ୍ତ୍ରିକ ଢାଞ୍ଚାକୁ ନୂତନ ଶକ୍ତି ପ୍ରଦାନ କରିବ।ପ୍ରଧାନମନ୍ତ୍ରୀ ବିଜ୍ଞାନ ଭବନରେ ‘ନାରୀ ଶକ୍ତି ବନ୍ଦନ ସମ୍ମିଳନୀ’କୁ ସମ୍ବୋଧିତ କରି ମନ୍ତବ୍ୟ ଦେଇଥିଲେ ଯେ ଭାରତୀୟ ସଂସଦ ଇତିହାସରେ ଏକ ନୂତନ ଅଧ୍ୟାୟ ଲେଖିବା ଦ୍ୱାରରେ ଅଛି - ଯାହା ଅତୀତର ସ୍ୱପ୍ନକୁ ସାକାର କରିବ ଏବଂ ଭବିଷ୍ୟତର ସଂକଳ୍ପ ପୂରଣ କରିବ। ସେ ଗୁରୁତ୍ୱାରୋପ କରିଥିଲେ ଯେ ଏହି ନିଷ୍ପତ୍ତି ‘ନାରୀ ଶକ୍ତି’ ପ୍ରତି ଉତ୍ସର୍ଗୀକୃତ ଏବଂ ଦେଶର ବିକାଶ ଯାତ୍ରାରେ ମହିଳାଙ୍କ ଭୂମିକା ଏବେ ପୂର୍ବ ଅପେକ୍ଷା ଅଧିକ ଗୁରୁତ୍ୱପୂର୍ଣ୍ଣ ହୋଇଯାଇଛି।ମୋଦି ସୂଚାଇଛନ୍ତି ଯେ ସଂସଦର ଆଗାମୀ ଅଧିବେଶନ ସମୟରେ, ଏହି ଆଇନକୁ ପ୍ରଭାବଶାଳୀ ଭାବରେ କାର୍ଯ୍ୟକାରୀ କରିବା ପାଇଁ ପଦକ୍ଷେପ ନିଆଯିବ। ସେ କହିଥିଲେ ଯେ ୧୬ ଏପ୍ରିଲରେ ଆରମ୍ଭ ହେଉଥିବା ସ୍ୱତନ୍ତ୍ର ଅଧିବେଶନ ସମୟରେ ଏହି ଦିଗରେ ଠୋସ୍ ପଦକ୍ଷେପ ନିଆଯିବ, ଯାହା ଦ୍ଵାରା ପଞ୍ଚାୟତ ସ୍ତରରୁ ସଂସଦ ପର୍ଯ୍ୟନ୍ତ ସମସ୍ତ ସ୍ତରରେ ମହିଳାମାନଙ୍କର ଅଧିକ ଅଂଶଗ୍ରହଣକୁ ସୁଗମ କରାଯିବ।ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ଯେ ଗଣତାନ୍ତ୍ରିକ ଢାଞ୍ଚାରେ ମହିଳାମାନଙ୍କ ପାଇଁ ସଂରକ୍ଷଣ ପ୍ରଦାନ କରିବାର ଆବଶ୍ୟକତା ଦଶନ୍ଧି ଧରି ଅନୁଭୂତ ହୋଇଆସୁଛି।ଏହି ବିଷୟ ଉପରେ ପ୍ରାୟ ଚାରି ଦଶନ୍ଧି ଧରି ବିଚାର ବିମର୍ଶ ଜାରି ରହିଛି। ବିଭିନ୍ନ ରାଜନୈତିକ ଦଳ ଏବଂ ପିଢ଼ିର ସାମୂହିକ ପ୍ରୟାସ ଦ୍ୱାରା ଏହି ସଫଳତା ସମ୍ଭବ ହୋଇପାରିଛି। ବର୍ଷ୨୦୨୩ ମସିହାରେ ଯେତେବେଳେ ଏହି ଆଇନ ସଂସଦ ଦ୍ୱାରା ଗୃହୀତ ହୋଇଥିଲା, ସେତେବେଳେ ଏହାକୁ ସମସ୍ତ ରାଜନୈତିକ ଦଳ ପକ୍ଷରୁ ସର୍ବସମ୍ମତ ସମର୍ଥନ ମିଳିଥିଲା।ସେ ଆଶା ପ୍ରକାଶ କରିଥିଲେ ଯେ, ଏଥର ମଧ୍ୟ ସମ୍ବାଦ ,ସହଯୋଗ ଏବଂ ଅଂଶଗ୍ରହଣ ମାଧ୍ୟମରେ ପ୍ରଭାବଶାଳୀ ଭାବରେ କାର୍ଯ୍ୟକାରୀ ହେବ। ସେ କହିଥିଲେ ଯେ ସଂସଦର ମର୍ଯ୍ୟାଦା ବଜାୟ ରଖିବା ଏବଂ ଗଣତନ୍ତ୍ରକୁ ସୁଦୃଢ଼ କରିବା ପାଇଁ ଅତ୍ୟନ୍ତ ଜରୁରୀ।ପ୍ରଧାନମନ୍ତ୍ରୀ ତାଙ୍କ ଅଭିଭାଷଣରେ ମହିଳାଙ୍କ ବୃଦ୍ଧି ପାଉଥିବା ଅଂଶଗ୍ରହଣର ଉଦାହରଣ ମଧ୍ୟ ଦେଇଥିଲେ। ସେ ଉଲ୍ଲେଖ କରିଥିଲେ ଯେ ଆଜି ସାରା ଦେଶରେ ରାଷ୍ଟ୍ରପତିଙ୍କଠାରୁ ଅର୍ଥମନ୍ତ୍ରୀ ପର୍ଯ୍ୟନ୍ତ ଗୁରୁତ୍ୱପୂର୍ଣ୍ଣ ପଦବୀରେ ମହିଳାମାନେ କାର୍ଯ୍ୟ କରୁଛନ୍ତି,ସେମାନେ ଦେଶ ପାଇଁ ଗର୍ବ ଆଣିଛନ୍ତି।ଏହା ସହ ସେମାନେ ପଞ୍ଚାୟତିରାଜ ପ୍ରତିଷ୍ଠାନଗୁଡ଼ିକୁ ମହିଳା ନେତୃତ୍ୱର ଏକ ଉତ୍କୃଷ୍ଟ ଉଦାହରଣ ଭାବରେ ଆଲୋକିତ କରିଛନ୍ତି।ସେ କହିଛନ୍ତି ଯେ ଦେଶରେ ୧୪ ଲକ୍ଷରୁ ଅଧିକ ମହିଳା ସ୍ଥାନୀୟ ସଂସ୍ଥାଗୁଡ଼ିକରେ ସକ୍ରିୟ ଭାବରେ କାର୍ଯ୍ୟ କରୁଛନ୍ତି ଏବଂ ପ୍ରାୟ 21ଟି ରାଜ୍ୟରେ, ପଞ୍ଚାୟତରେ ସେମାନଙ୍କର ପ୍ରତିନିଧିତ୍ୱ 50 ପ୍ରତିଶତରେ ପହଞ୍ଚିଛି। ସେ ଏହାକୁ ଭାରତର ଗଣତନ୍ତ୍ର ପାଇଁ ଏକ ପ୍ରମୁଖ ସଫଳତା ବୋଲି ବର୍ଣ୍ଣନା କରିଥିଲେ।ମୋଦୀ କହିଥିଲେ ଯେ ଯେତେବେଳେ ସେ ଗୁଜରାଟର ମୁଖ୍ୟମନ୍ତ୍ରୀ ହୋଇଥିଲେ, ସେତେବେଳେ ତାଙ୍କୁ ଏକ ଗ୍ରାମ ପଞ୍ଚାୟତର ମହିଳାମାନଙ୍କ ସହିତ ସାକ୍ଷାତ କରିବାର ସୁଯୋଗ ମିଳିଥିଲା ଯେଉଁଠାରେ ପ୍ରତ୍ୟେକ ସଦସ୍ୟ ଜଣେ ମହିଳା ଥିଲେ। ଏକ ସାଧାରଣ ଶିକ୍ଷିତ ମହିଳା ପ୍ରଧାନଙ୍କ ଏହି ଲକ୍ଷ୍ୟ ଯେ ଗାଁରେ କେହି ଗରିବ ରହିବେ ନାହିଁ - ତାଙ୍କୁ ଆଜି ମଧ୍ୟ ପ୍ରେରଣା ଦେଇ ଆସୁଛି।ପ୍ରଧାନମନ୍ତ୍ରୀ କହିଥିଲେ ଯେ ମହିଳାଙ୍କ ବୃଦ୍ଧି ପାଇଥିବା ଅଂଶଗ୍ରହଣ ନିଷ୍ପତ୍ତି ଗ୍ରହଣ ପ୍ରକ୍ରିୟାରେ ସମ୍ବେଦନଶୀଳତା ସୃଷ୍ଟି କରିଛି, ଯାହା ଫଳରେ ପ୍ରଶାସନିକ ବ୍ୟବସ୍ଥା ଅଧିକ ପ୍ରଭାବଶାଳୀ ହୋଇଛି। ଏହି କାରଣରୁ ସରକାର ମହିଳାମାନଙ୍କ ଆର୍ଥିକ ଏବଂ ସାମାଜିକ ସଶକ୍ତିକରଣ ପାଇଁ ଅନେକ ଯୋଜନା ଆରମ୍ଭ କରିଛନ୍ତି।ସେ ଉଲ୍ଲେଖ କରିଥିଲେ ଯେ, ଜନ ଧନ ଯୋଜନା ଅଧୀନରେ, 32 କୋଟିରୁ ଅଧିକ ମହିଳାଙ୍କ ପାଇଁ ବ୍ୟାଙ୍କ ଆକାଉଣ୍ଟ ଖୋଲାଯାଇଛି, ଯାହା ଦ୍ୱାରା ସେମାନଙ୍କୁ ଆନୁଷ୍ଠାନିକ ଆର୍ଥିକ ବ୍ୟବସ୍ଥାରେ ସାମିଲ କରାଯାଇଛି। ଏହା ବ୍ୟତୀତ, ମୁଦ୍ରା ଯୋଜନା ଅଧୀନରେ 60 ପ୍ରତିଶତରୁ ଅଧିକ ରୁଣ ମହିଳାମାନଙ୍କୁ ଦିଆଯାଇଛି, ଯାହା ସେମାନଙ୍କୁ ଉଦ୍ୟୋଗ କ୍ଷେତ୍ରରେ ଆଗକୁ ବଢ଼ିବାରେ ସକ୍ଷମ କରିଛି।ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ଯେ ମହିଳାମାନେ ଏବେ ଦେଶର ଷ୍ଟାର୍ଟଅପ୍ ଇକୋସିଷ୍ଟମରେ ଏକ ଦୃଢ଼ ଭୂମିକା ଗ୍ରହଣ କରୁଛନ୍ତି, 42 ପ୍ରତିଶତରୁ ଅଧିକ ଷ୍ଟାର୍ଟଅପ୍ରେ ଅତି କମରେ ଜଣେ ମହିଳା ନିର୍ଦ୍ଦେଶକ ଅଛନ୍ତି।

ସେ ଏହାକୁ ଵିମେନ ଲେଡ ଡେଭଲପମେଣ୍ଟ ଦିଗରେ ପ୍ରମୁଖ ସଫଳତା ବୋଲି ପ୍ରଶଂସା କରିଛନ୍ତି।ସେ ମାତୃତ୍ୱ ଛୁଟିକୁ 26 ସପ୍ତାହକୁ ବୃଦ୍ଧି, ସ୍କିଲ୍ ଇଣ୍ଡିଆ ମିଶନ, 'ଡ୍ରୋନ୍ ଦିଦି' ପଦକ୍ଷେପ ଏବଂ 'ଭୋକାଲ୍ ଫର୍ ଲୋକାଲ' ଅଭିଯାନରେ ମହିଳାମାନଙ୍କ ଭୂମିକା ମଧ୍ୟ ଉଲ୍ଲେଖ କରିଛନ୍ତି।ହି ପଦକ୍ଷେପଗୁଡ଼ିକ ମହିଳାମାନଙ୍କ ପ୍ରତି ପାରମ୍ପରିକ ମାନସିକତାକୁ ପରିବର୍ତ୍ତନ କରିବାରେ ଗୁରୁତ୍ୱପୂର୍ଣ୍ଣ ଅବଦାନ ଦେଇଛି।ପ୍ରଧାନମନ୍ତ୍ରୀ ଦୃଢ଼ୋକ୍ତି ପ୍ରକାଶ କରିଛନ୍ତି ଯେ ସରକାର ମହିଳାଙ୍କ ଜୀବନଚକ୍ରର ପ୍ରତ୍ୟେକ ପର୍ଯ୍ୟାୟକୁ ଧ୍ୟାନରେ ରଖି ଯୋଜନା ପ୍ରଣୟନ କରିଛନ୍ତି। 'ବେଟି ବଚାଓ, ବେଟି ପଢ଼ାଓ' , 'ପ୍ରଧାନମନ୍ତ୍ରୀ ମାତୃବନ୍ଦନା ଯୋଜନା', 'ସୁକନ୍ୟା ସମୃଦ୍ଧି ଯୋଜନା' ଏବଂ 'ମିଶନ ଇନ୍ଦ୍ରଧନୁଷ' ଭଳି ଯୋଜନାଗୁଡ଼ିକ ମହିଳା ଏବଂ ଝିଅମାନଙ୍କର ସାମଗ୍ରିକ ବିକାଶ ସୁନିଶ୍ଚିତ କରିବା ଲକ୍ଷ୍ୟ ରଖିଛି।ସେ ମନ୍ତବ୍ୟ ଦେଇଥିଲେ ଯେ, ସ୍ୱାଧୀନତା ସଂଗ୍ରାମଠାରୁ ସମ୍ବିଧାନ ପ୍ରସ୍ତୁତ କରିବା ପର୍ଯ୍ୟନ୍ତ, ଭାରତର 'ନାରୀ ଶକ୍ତି' ର ଅବଦାନ ଅତୁଳନୀୟ, ଏବଂ ବର୍ତ୍ତମାନ ଏହି ଶକ୍ତିକୁ ଆହୁରି ଅଧିକ ସୁଯୋଗ ପ୍ରଦାନ କରିବାର ସମୟ ଆସିଛି।ଲ୍ଲେଖଯୋଗ୍ୟ, ସେପ୍ଟେମ୍ବର 2023 ରେ, ସଂସଦ 'ନାରୀ ଶକ୍ତି ବନ୍ଦନ ଅଧିନିୟମ' (ମହିଳା ସଂରକ୍ଷଣ ଆଇନ) ପାସ୍ କରିଥିଲା, ଯାହା ସଂସଦ ଏବଂ ରାଜ୍ୟ ବିଧାନସଭାଗୁଡ଼ିକରେ ମହିଳାଙ୍କ ପାଇଁ ଏକ ତୃତୀୟାଂଶ ସ୍ଥାନ ସଂରକ୍ଷଣର ବ୍ୟବସ୍ଥା କରେ। ଏହାର ପ୍ରଭାବଶାଳୀ କାର୍ଯ୍ୟାନ୍ୱୟନ ସୁନିଶ୍ଚିତ କରିବା ପାଇଁ ଏବେ ପଦକ୍ଷେପ ନିଆଯାଉଛି।ପ୍ରଧାନମନ୍ତ୍ରୀ ସମସ୍ତ ମହିଳାଙ୍କୁ ନୂତନ ଯୁଗର ଆଗମନ ଅଭିନନ୍ଦନ ଜଣାଇ କହିଛନ୍ତି ଯେ ଦେଶ ସେମାନଙ୍କ ସ୍ୱପ୍ନକୁ ସାକାର କରିବା ପାଇଁ ଯଥାସମ୍ଭବ ପ୍ରୟାସ କରୁଛି।

---------------

ହିନ୍ଦୁସ୍ଥାନ ସମାଚାର / ରଶ୍ମିତା