ଭବାନୀପାଟଣା, ୨୫ ଜୁନ୍ (ହି.ସ.)- ଆଜି ପି.ଏମ୍. ସ୍ୱନିଧି ଯୋଜନାର ୬ ବର୍ଷ ପୂର୍ତ୍ତି ଅବସରରେ ଆଜି କଳାହାଣ୍ଡି ଜିଲ୍ଲା ସ୍ତରୀୟ “ପି.ଏମ୍. ସ୍ୱନିଧି ମହୋତ୍ସବ” ଭବାନୀପାଟଣା ସ୍ଥିତ ଟାଉନ ହଲଠାରେ ଆୟୋଜିତ ହୋଇଥିଲା । ଏହି ଅବସରରେ ଭବାନୀପାଟଣା ପୌରପାଳିକାର ୧୦ ଜଣ ରାସ୍ତାପାର୍ଶ୍ୱ ବ୍ୟବସାୟୀଙ୍କୁ ପ୍ରଥମ କିସ୍ତି ଋଣର ଚେକ୍ ଏବଂ ଜଣେ ହିତାଧିକାରୀଙ୍କୁ ଦ୍ୱିତୀୟ କିସ୍ତି ଋଣର ଚେକ୍ ଏବଂ ୧୦ ଜଣ ରାସ୍ତାପାର୍ଶ୍ୱ ବ୍ୟବସାୟୀଙ୍କୁ ଏଲ୍.ଓ.ଆର୍. ଅତିଥିମାନଙ୍କ ଦ୍ୱାରା ପ୍ରଦାନ କରାଯାଇଥିଲା । ସେହିପରି ପି.ଏମ୍. ସ୍ୱନିଧି ଯୋଜନାର ସଫଳ ହିତାଧିକାରୀ ଭାବେ ଭବାନୀପାଟଣା ପୌରପାଳିକା, ଜୁନାଗଡ଼ ଏନ୍.ଏ.ସି., କେସିଙ୍ଗା ଏନ୍.ଏ.ସି. ଓ ଧର୍ମଗଡ଼ ଏନ୍.ଏ.ସି.ର ୧୦ ଜଣ ଲେଖାଏଁ, ତଥା ନର୍ଲା ଓ ଜୟପାଟଣା ଏନ୍.ଏ.ସି.ର ୫ ଜଣ ଲେଖାଏଁ ରାସ୍ତାପାର୍ଶ୍ୱ ବ୍ୟବସାୟୀଙ୍କୁ ଉପସ୍ଥିତ ଅତିଥିମାନେ ସମ୍ମାନିତ କରିଥିଲେ। ଏହି କାର୍ଯ୍ୟକ୍ରମରେ ପି.ଏମ୍. ସ୍ୱନିଧି ଯୋଜନା ମାଧ୍ୟମରେ ରାସ୍ତାପାର୍ଶ୍ୱ ବ୍ୟବସାୟୀମାନଙ୍କର ଆର୍ଥିକ ସଶକ୍ତିକରଣ, ସ୍ୱାବଲମ୍ବନ ଏବଂ ଜୀବିକାର ଉନ୍ନତି ସମ୍ପର୍କରେ ବିସ୍ତୃତ ଆଲୋଚନା କରାଯାଇଥିଲା। ଲିଡ୍ ଡିଷ୍ଟ୍ରିକ୍ଟ ମ୍ୟାନେଜର (ଏଲ୍.ଡି.ଏମ୍.) ଉପସ୍ଥିତ ରାସ୍ତାପାର୍ଶ୍ୱ ବ୍ୟବସାୟୀମାନଙ୍କୁ ଡିଜିଟାଲ୍ ପେମେଣ୍ଟ, ଡିଜିଟାଲ୍ କାରବାରର ସୁବିଧା, ଗୁରୁତ୍ୱ ଏବଂ ଏହାର ସୁରକ୍ଷିତ ବ୍ୟବହାର ସମ୍ପର୍କରେ ସଚେତନ କରାଇଥିଲେ। ଏଥିସହ ହିତାଧିକାରୀମାନଙ୍କୁ ଯୋଜନା ଦ୍ବାରା ମିଲୁଥିବା ସୁବିଧା ଏବଂ ମିଲିଥିବା ଅର୍ଥ ର ସଦୁପଯୋଗ କରି ନିଜ ବ୍ୟବସାୟକୁ ଅଧିକ ସୁଦୃଢ଼ କରିବା ପାଇଁ ଉତ୍ସାହିତ କରାଯାଇଥିଲା।
ଏହି କାର୍ଯ୍ୟକ୍ରମରେ ଅତିରିକ୍ତ ଜିଲ୍ଲାପାଳ ତଥା ପ୍ରକଳ୍ପ ନିର୍ଦ୍ଦେଶକ ଜିଲ୍ଲା ସହରାଞ୍ଚଳ ଉନ୍ନୟନ ସଂସ୍ଥା (ଡୁଡା) ତନ୍ମୟ କୁମାର ଦରୱାନ, ଉପଜିଲ୍ଲାପାଳ ଭବାନୀପାଟଣା ପ୍ରଭାତ କୁମାର ପରିଡ଼ା, ଜିଲ୍ଲା ସଂସ୍କୃତି ଅଧିକାରୀ ବିବେକାନନ୍ଦ ମହାନନ୍ଦ, ଭବାନୀପାଟଣା ପୌରପାଳିକାର ଅଧ୍ୟକ୍ଷ ବିଷ୍ଣୁ ପ୍ରଧାନ, ଜୁନାଗଡ଼ ଏନ୍.ଏ.ସି.ର ଅଧ୍ୟକ୍ଷା ହିମାଦ୍ରୀ ନାଏକ, ଧର୍ମଗଡ଼ ଏନ୍.ଏ.ସି.ର ଅଧ୍ୟକ୍ଷ ଅଶୋକ ମହାନ୍ତି, କେସିଙ୍ଗା ଏନ୍.ଏ.ସି.ର ଅଧ୍ୟକ୍ଷ ନୃପରାଜ ଯାଦବ, କଳାହାଣ୍ଡି ଲୋକସଭା ସାଂସଦ ଙ୍କ ପ୍ରତିନିଧି ଭାବରେ ସନ୍ତୋଷ ବିଶି, ଧର୍ମଗଡ଼ ବିଧାୟକ ଙ୍କ ପ୍ରତିନିଧି ଭାବରେ ଶ୍ରୀ ନରହରି ପଟ୍ଟନାୟକ ,ଭବାନୀପାଟଣା ପୌରପାଳିକା, ଧର୍ମଗଡ଼, କେସିଙ୍ଗା, ନର୍ଲା, ଜୟପାଟଣା ଓ ଜୁନାଗଡ଼ ଏନ୍.ଏ.ସି.ର କାର୍ଯ୍ୟ ନିର୍ବାହୀ ଅଧିକାରୀମାନେ, ଭାରପ୍ରାପ୍ତ ଜିଲ୍ଲା ସୂଚନା ଓ ଲୋକସମ୍ପର୍କ ଅଧିକାରୀ ଦିନେଶ କୁମାର କହଁର, ଲିଡ୍ ଡିଷ୍ଟ୍ରିକ୍ଟ ମ୍ୟାନେଜର (ଏଲ୍.ଡି.ଏମ୍.) ଏବଂ ବିଭିନ୍ନ ବ୍ୟାଙ୍କର ଶାଖା ପରିଚାଳକମାନେ ଉପସ୍ଥିତ ଥିଲେ । ଶେଷରେ ଉପସ୍ଥିତ ଅତିଥି, ହିତାଧିକାରୀ ଓ ସାଧାରଣ ଜନତାଙ୍କ ମନୋରଞ୍ଜନ ପାଇଁ ସାଂସ୍କୃତିକ କାର୍ଯ୍ୟକ୍ରମ ମଧ୍ୟ ଆୟୋଜନ କରାଯାଇଥିଲା।
ହିନ୍ଦୁସ୍ଥାନ ସମାଚାର / ଜୟକୃଷ୍ଣ
