ନୂଆଦିଲ୍ଲୀ, ୨୧ ଜୁଲାଇ (ହି.ସ.) ଲୋକସଭାରେ ବିରୋଧୀ ଦଳର ନେତା ରାହୁଲ ଗାନ୍ଧୀ ମଙ୍ଗଳବାର ବିରୋଧୀ ସାଂସଦମାନଙ୍କ ସହ ଲୋକସଭା ବାଚସ୍ପତି ଓମ୍ ବିର୍ଲାଙ୍କୁ ଭେଟି ନିଟ୍-ୟୁଜି ପ୍ରଶ୍ନପତ୍ର ଲିକ୍, ପରୀକ୍ଷା ପ୍ରଣାଳୀ ସହ ଜଡିତ ବିବାଦ ଏବଂ ଛାତ୍ରମାନଙ୍କ ଉପରେ ହୋଇଥିବା ପୁଲିସ କାର୍ଯ୍ୟାନୁଷ୍ଠାନ ପ୍ରସଙ୍ଗରେ ସଂସଦରେ ବିସ୍ତୃତ ଆଲୋଚନା କରାଇବାକୁ ଦାବି କରିଥିଲେ। ସେ କହିଥିଲେ ଯେ, ଛାତ୍ରମାନଙ୍କ ଭବିଷ୍ୟତ ସହ ଜଡିତ ଏହି ଗୁରୁତର ବିଷୟରେ ସରକାରଙ୍କୁ ଜବାବଦେହ କରାଯିବା ଉଚିତ ଏବଂ ସଂସଦରେ ଏହା ଉପରେ ଖୋଲା ଆଲୋଚନା ହେବା ଆବଶ୍ୟକ।

ରାହୁଲ ଗାନ୍ଧୀଙ୍କ ସହ କଂଗ୍ରେସ ମହାସଚିବ (ସଂଗଠନ) କେ.ସି. ବେଣୁଗୋପାଳ, ସମାଜବାଦୀ ପାର୍ଟିର ଧର୍ମେନ୍ଦ୍ର ଯାଦବ, ଶିବସେନା (ୟୁବିଟି)ର ଅରବିନ୍ଦ ସାୱନ୍ତ, ଆରଏସପିର ଏନ୍.କେ. ପ୍ରେମଚନ୍ଦ୍ରନଙ୍କ ସମେତ ଅନେକ ବିରୋଧୀ ସାଂସଦ ଲୋକସଭା ବାଚସ୍ପତିଙ୍କୁ ଭେଟିଥିଲେ। ବିରୋଧୀ ଦଳ ଦାବି କରିଥିଲା ଯେ, ବିରୋଧୀ ଦଳର ନେତା ଏବଂ ଅନ୍ୟ ବିରୋଧୀ ଦଳଗୁଡ଼ିକୁ ନିଟ୍ ଏବଂ ସିବିଏସଇ ସହ ଜଡିତ ପରୀକ୍ଷା ବିବାଦ, ଛାତ୍ରମାନଙ୍କ ଉପରେ ଦିଲ୍ଲୀ ପୁଲିସର କାର୍ଯ୍ୟାନୁଷ୍ଠାନ ଏବଂ ଏହି ମାମଲାଗୁଡ଼ିକରେ ସରକାରଙ୍କ ଜବାବଦେହିତା ଉପରେ ସଦନରେ ଆଲୋଚନା ପାଇଁ ସମୟ ଦିଆଯାଉ। ଏହା ସହିତ ଶିକ୍ଷାମନ୍ତ୍ରୀଙ୍କୁ ସଦନରେ ଏହି ସମଗ୍ର ମାମଲା ଉପରେ ଉତର ଦେବାକୁ ମଧ୍ୟ ଦାବି କରାଯାଇଥିଲା।

ରାହୁଲ ଗାନ୍ଧୀ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଲେଖିଥିଲେ ଯେ, ବିରୋଧୀ ସାଂସଦମାନେ ଲୋକସଭା ବାଚସ୍ପତିଙ୍କୁ ଭେଟି ଦାବି କରିଛନ୍ତି ଯେ ଛାତ୍ରମାନଙ୍କ ଉପରେ ହୋଇଥିବା କଥିତ ବର୍ବରତା ଏବଂ ପରୀକ୍ଷା ସଙ୍କଟ ଉପରେ ସଂସଦରେ ବିସ୍ତୃତ ଆଲୋଚନା ହେଉ। ଛାତ୍ରମାନେ ନିଜ ଭବିଷ୍ୟତ ସହ ଜଡିତ ବୈଧ ପ୍ରଶ୍ନ ପଚାରୁଥିଲେ, କିନ୍ତୁ ସେମାନଙ୍କୁ ପିଟାଯାଇଥିଲା। ଯଦି ସଂସଦ ଦେଶର ଯୁବମାନଙ୍କ ଭବିଷ୍ୟତ ଉପରେ ଆଲୋଚନା କରିପାରିବ ନାହିଁ, ତେବେ ତାହାର ଉଦ୍ଦେଶ୍ୟ କ'ଣ? ବିରୋଧୀ ଦଳ ଏହି ପ୍ରସଙ୍ଗକୁ ଦବାଇବାକୁ ଦେବ ନାହିଁ ଏବଂ ଛାତ୍ରମାନଙ୍କ ସ୍ୱରକୁ ସଂସଦ ଭିତରେ ଏବଂ ବାହାରେ ଉଭୟ ସ୍ଥାନରେ ଉଠାଇ ଚାଲିବ।

-------------------

---------------

ହିନ୍ଦୁସ୍ଥାନ ସମାଚାର / ଗଗନ