ନୂଆଦିଲ୍ଲୀ, ୨୨ ସେପ୍ଟେମ୍ବର (ହି.ସ.)। କେନ୍ଦ୍ରୀୟ ଅର୍ଥମନ୍ତ୍ରୀ ନିର୍ମଳା ସୀତାରମଣ ମଙ୍ଗଳବାର ଭାରତୀୟ ଶିଳ୍ପ ଜଗତକୁ କେବଳ ବ୍ୟବସାୟର ବିସ୍ତାର ଉପରେ ଗୁରୁତ୍ୱ ନଦେଇ ଦୃଢ଼, ସ୍ଥାୟୀ ଏବଂ ଉତ୍ତମ ପରିଚାଳନାଯୁକ୍ତ କମ୍ପାନୀ ଗଠନ ଉପରେ ଧ୍ୟାନ ଦେବାକୁ ଆହ୍ୱାନ କରିଛନ୍ତି। ୨୦୪୭ ସୁଦ୍ଧା ବିକଶିତ ଭାରତର ଲକ୍ଷ୍ୟ ହାସଲ ପାଇଁ ଶିଳ୍ପ ଜଗତକୁ ଏହି ଦିଗରେ ଆଗକୁ ବଢ଼ିବାକୁ ପଡ଼ିବ ବୋଲି ସେ କହିଛନ୍ତି।

ନୂଆଦିଲ୍ଲୀରେ ଅଲ୍ ଇଣ୍ଡିଆ ମ୍ୟାନେଜମେଣ୍ଟ ଆସୋସିଏସନ୍‌ (ଏଆଇଏମ୍‌ଏ)ର ୫୩ତମ ଜାତୀୟ ପରିଚାଳନା ସମ୍ମିଳନୀକୁ ସମ୍ବୋଧିତ କରି ସୀତାରମଣ କହିଛନ୍ତି ଯେ, ୨୦୨୬-୨୭ ଆର୍ଥିକ ବର୍ଷର ପ୍ରଥମ ତ୍ରୈମାସିକରେ ସମୁଦାୟ ସ୍ଥିର ପୁଞ୍ଜି ଗଠନ ଦେଶର ଜିଡିପିର ୩୪ ପ୍ରତିଶତରୁ ଅଧିକ ହୋଇଛି। ଏବେ ଭାରତୀୟ ଶିଳ୍ପ ଜଗତକୁ ଏପରି ସଂସ୍ଥା ଓ କମ୍ପାନୀ ଗଠନ କରିବା ଆବଶ୍ୟକ, ଯେଉଁଥିରେ ବ୍ୟାପକତା ସହିତ ସ୍ଥାୟୀତ୍ୱ, ଉତ୍ତମ ଗୁଣବତ୍ତା, ସୁଶାସନ ଏବଂ ଦୃଢ଼ ପ୍ରଯୁକ୍ତିଗତ କ୍ଷମତା ରହିବ।

ସେ କହିଛନ୍ତି ଯେ, ଘରୋଇ ନିବେଶକୁ ପ୍ରୋତ୍ସାହନ ଦେବା ପାଇଁ ସରକାର ସୁଚିନ୍ତିତ ଭାବେ ସାର୍ବଜନୀନ ପୁଞ୍ଜିଗତ ବ୍ୟୟ ବୃଦ୍ଧି କରିଛନ୍ତି। ଏହାର ପ୍ରଭାବ ପୁଞ୍ଜି ଗଠନରେ ବୃଦ୍ଧି, ଉତ୍ପାଦନ କ୍ଷେତ୍ରରେ ଉତ୍ପାଦନ କ୍ଷମତାର ଉତ୍ତମ ବ୍ୟବହାର ଏବଂ ଶିଳ୍ପ କ୍ଷେତ୍ରକୁ ବ୍ୟାଙ୍କ ଋଣ ପ୍ରବାହ ବୃଦ୍ଧି ଆକାରରେ ଦେଖିବାକୁ ମିଳୁଛି। ଭାରତୀୟ ଶିଳ୍ପ ଜଗତ କେବଳ ବ୍ୟାପକତା ଉପରେ ଗୁରୁତ୍ୱ ନଦେଇ ଗୁଣବତ୍ତା, ଗବେଷଣା ଓ ବିକାଶ ଏବଂ ସୁଶାସନକୁ ପ୍ରାଥମିକତା ଦେବା ଉଚିତ ବୋଲି ସେ ଆହ୍ୱାନ କରିଛନ୍ତି।

ସୀତାରମଣ କହିଛନ୍ତି ଯେ, ଶିଳ୍ପ ଜଗତକୁ ମିଳୁଥିବା ବ୍ୟାଙ୍କ ଋଣରେ ମଧ୍ୟ ଦ୍ରୁତ ବୃଦ୍ଧି ଘଟିଛି। ଜୁନ୍‌ ମାସରେ ଏଥିରେ ବାର୍ଷିକ ଭିତ୍ତିରେ ୧୯ ପ୍ରତିଶତ ବୃଦ୍ଧି ହୋଇଛି। ଆବଶ୍ୟକତା ଥିବା କ୍ଷେତ୍ରଗୁଡ଼ିକୁ ଋଣ ପହଞ୍ଚୁଛି ବୋଲି ସେ କହିଛନ୍ତି। ସରକାରଙ୍କ ମୁକ୍ତ ବାଣିଜ୍ୟ ଚୁକ୍ତିଗୁଡ଼ିକ ଭାରତର ଶ୍ରମଭିତ୍ତିକ ସାମଗ୍ରୀ ଓ ସେବା ପାଇଁ ନୂଆ ବଜାରର ସୁଯୋଗ ସୃଷ୍ଟି କରୁଛି। ଏହି ସୁଯୋଗର ଲାଭ ଉଠାଇବାକୁ ସେ ଶିଳ୍ପ ଓ ବ୍ୟବସାୟ କ୍ଷେତ୍ରକୁ ଆହ୍ୱାନ କରିଛନ୍ତି।

ସୀତାରମଣ କହିଛନ୍ତି ଯେ, ବିଶ୍ୱ ଅର୍ଥନୈତିକ ଅଭିବୃଦ୍ଧି ହାର ୩ ପ୍ରତିଶତରୁ କମ୍ ରହିଥିବା ସତ୍ତ୍ୱେ ଭାରତୀୟ ଅର୍ଥନୀତି ପ୍ରାୟ ୮ ପ୍ରତିଶତ ହାରରେ ଅଭିବୃଦ୍ଧି କରୁଛି। ସେ କହିଛନ୍ତି ଯେ, ସେପ୍ଟେମ୍ବର ୨ ତାରିଖରେ ଜାପାନ କ୍ରେଡିଟ୍ ରେଟିଂ ଏଜେନ୍ସି ସ୍ଥିର ଆଉଟ୍‌ଲୁକ୍ ସହିତ ଭାରତର ଦୀର୍ଘମିଆଦୀ ବିଦେଶୀ ମୁଦ୍ରା ଏବଂ ସ୍ଥାନୀୟ ମୁଦ୍ରା ଜାରିକର୍ତ୍ତା ରେଟିଂକୁ ‘ବିବିବି ପ୍ଲସ୍’ରୁ ବୃଦ୍ଧି କରି ‘ଏ ମାଇନସ୍’ କରିଛି। ୩୫ ବର୍ଷରୁ ଅଧିକ ସମୟ ପରେ ପ୍ରଥମ ଥର ପାଇଁ ଭାରତକୁ ‘ଏ’ ଶ୍ରେଣୀର ରେଟିଂ ମିଳିଛି ବୋଲି ସେ କହିଛନ୍ତି।

ହିନ୍ଦୁସ୍ଥାନ ସମାଚାର / ସମନ୍ୱୟ