ସିଧି, ୨୯ ସେପ୍ଟେମ୍ବର (ହି.ସ.)। ମଧ୍ୟପ୍ରଦେଶର ସିଧି ଜିଲ୍ଲାରେ ମଙ୍ଗଳବାର ଓଡ଼ିଶା ପୁଲିସର ଏକ ଟିମ୍ ଉପରେ ଆକ୍ରମଣ ହୋଇଛି। ୩ଟି ଗାଡ଼ିରେ ଆସିଥିବା ଅସ୍ତ୍ରଧାରୀ ଦୁର୍ବୃତ୍ତମାନେ ପୁଲିସ ଗାଡ଼ିକୁ ଘେରି ତିନି ରାଉଣ୍ଡ ଗୁଳି ଚଳାଇଥିଲେ। ଏଥିସହ ବେସ୍ବଲ୍ ବ୍ୟାଟ୍ରେ ପୁଲିସ ଗାଡ଼ିକୁ ଭଙ୍ଗାରୁଜା କରିବା ପରେ ଏନ୍ଡିପିଏସ୍ ଆଇନ ଅଧୀନରେ ଗିରଫ ହୋଇଥିବା ଜଣେ ଅଭିଯୁକ୍ତଙ୍କୁ ଛଡ଼ାଇ ନେଇ ଫେରାର ହୋଇଯାଇଛନ୍ତି।

ସିଧି ଏସ୍ପି ସନ୍ତୋଷ କୋରି ହିନ୍ଦୁସ୍ଥାନ ସମାଚାରକୁ ଦେଇଥିବା ସୂଚନା ଅନୁସାରେ, ରୀବା ଓ ସିଧି ଜିଲ୍ଲା ସୀମାରେ ଥିବା ଛୁହିଆ ଘାଟିରେ ପୂର୍ବାହ୍ନ ପ୍ରାୟ ୧୧ଟା ୩୦ରେ ଏହି ଘଟଣା ଘଟିଥିଲା। ଓଡ଼ିଶା ପୁଲିସର ଟିମ୍ ଏନ୍ଡିପିଏସ୍ ଆଇନ ଅଧୀନରେ ଗିରଫ ଅଭିଯୁକ୍ତ ଆଦିତ୍ୟ ମିଶ୍ରଙ୍କୁ ରୀବା ଅଦାଲତରେ ହାଜର କରିବା ପାଇଁ ନେଇଯାଉଥିଲା।

ସିଧି ଦେଇ ଯିବା ସମୟରେ ଛୁହିଆ ଘାଟିରେ ଦୁଇଟି ଗାଡ଼ି ସାମ୍ନା ପଟୁ ଏବଂ ଆଉ ଗୋଟିଏ ଗାଡ଼ି ପଛପଟୁ ଆସି ଓଡ଼ିଶା ପୁଲିସର ଗାଡ଼ିର ରାସ୍ତା ଅବରୋଧ କରିଥିଲା। ଗାଡ଼ିରୁ ଦୁର୍ବୃତ୍ତମାନେ ଓହ୍ଲାଇ ପୁଲିସ ଗାଡ଼ି ଉପରେ ବେସ୍ବଲ୍ ବ୍ୟାଟ୍ରେ ଆକ୍ରମଣ କରିଥିଲେ। ଏଥିରେ ଗାଡ଼ିର କାଚ ଭାଙ୍ଗି ରାସ୍ତା ଉପରେ ବିଛାଡ଼ି ହୋଇଯାଇଥିଲା। ଏହାପରେ ଦୁର୍ବୃତ୍ତମାନେ ଗୁଳି ଚଳାଇ ଅଭିଯୁକ୍ତ ଆଦିତ୍ୟଙ୍କୁ ଛଡ଼ାଇ ନେଇ ଫେରାର ହୋଇଯାଇଥିଲେ।

ଘଟଣା ପରେ ଓଡ଼ିଶା ପୁଲିସ ଟିମ୍ ପକ୍ଷରୁ ଡାଏଲ୍-୧୧୨କୁ ଫୋନ୍ କରି ଘଟଣା ସମ୍ପର୍କରେ ଜଣାଯାଇଥିଲା। ତେବେ ଏହି ଆକ୍ରମଣରେ କୌଣସି ପୁଲିସକର୍ମୀ ଆହତ ହୋଇଥିବା ସୂଚନା ମିଳିନାହିଁ।

ଓଡ଼ିଶା ପୁଲିସ ଟିମ୍ର ସଦସ୍ୟ ଈଶ୍ୱର ସିଂହ କହିଛନ୍ତି ଯେ, ଟିମ୍ରେ ମୋଟ ୮ ଜଣ ପୁଲିସକର୍ମୀ ଥିଲେ। ଦୁର୍ବୃତ୍ତମାନେ ପୁଲିସକର୍ମୀଙ୍କ ଆଖିରେ ଲଙ୍କା ସ୍ପ୍ରେ ପକାଇ ଦେଇଥିଲେ। ଏହାପରେ ସେମାନେ ଏକାଧିକ ରାଉଣ୍ଡ ଗୁଳି ଚଳାଇଥିଲେ। ପୁଲିସକର୍ମୀମାନେ କିଛି ବୁଝିବା ପୂର୍ବରୁ ଦୁର୍ବୃତ୍ତମାନେ ଅଭିଯୁକ୍ତଙ୍କୁ ନେଇ ଫେରାର ହୋଇଯାଇଥିଲେ।

ଆକ୍ରମଣକାରୀଙ୍କ ଗୁଳିରେ ପୁଲିସ ଗାଡ଼ିର ଗୋଟିଏ ଟାୟାର ଫାଟିଯାଇଥିଲା। ଫେରାର ହେବା ସମୟରେ ଦୁର୍ବୃତ୍ତମାନେ ବ୍ୟବହାର କରିଥିବା ବେସ୍ବଲ୍ ବ୍ୟାଟ୍ଗୁଡ଼ିକ ଘଟଣାସ୍ଥଳରେ ଛାଡ଼ି ଯାଇଥିଲେ। ଆକ୍ରମଣକାରୀମାନେ ମୈହର ଦିଗକୁ ଫେରାର ହୋଇଥିବା ଜଣାପଡ଼ିଛି।

ହିନ୍ଦୁସ୍ଥାନ ସମାଚାର / ସମନ୍ୱୟ