କୋଲକାତା, ୨୯ ସେପ୍ଟେମ୍ବର (ହି.ସ.)। ନିଷିଦ୍ଧ ବାଂଲାଦେଶୀ ଆତଙ୍କବାଦୀ ସଂଗଠନ ଜମାତ୍-ଉଲ୍-ମୁଜାହିଦିନ୍ ବାଂଲାଦେଶ (ଜେଏମ୍ବି)ର ସମ୍ଭାବ୍ୟ ନେଟୱର୍କର ତଦନ୍ତକୁ ନେଇ ଜାତୀୟ ତଦନ୍ତ ଏଜେନ୍ସି (ଏନ୍ଆଇଏ) ମଙ୍ଗଳବାର ସକାଳେ ପଶ୍ଚିମବଙ୍ଗର ୫ଟି ସ୍ଥାନରେ ଏକକାଳୀନ ତଲାସୀ ଅଭିଯାନ ଚଳାଇଛି। ଦକ୍ଷିଣ ଦିନାଜପୁର, ଦକ୍ଷିଣ ୨୪ ପରଗଣା ଏବଂ ପୂର୍ବ ବର୍ଦ୍ଧମାନ ଜିଲ୍ଲାରେ ଏହି ତଲାସୀ କରାଯାଇଛି।

ଏନ୍ଆଇଏ ଟିମ୍ ଦକ୍ଷିଣ ଦିନାଜପୁର ଜିଲ୍ଲାର ହରିରାମପୁର ଓ ବଂଶୀହାରୀ, ଦକ୍ଷିଣ ୨୪ ପରଗଣାର ଡାଏମଣ୍ଡ ହାର୍ବର ଏବଂ ପୂର୍ବ ବର୍ଦ୍ଧମାନ ଜିଲ୍ଲାର ମଙ୍ଗଳକୋଟ ଅଞ୍ଚଳରେ ତଲାସୀ କରିଥିଲେ। ବଂଶୀହାରୀରେ ତଦନ୍ତକାରୀ ଏଜେନ୍ସି ମିଜାନୁର ରହମାନଙ୍କ ଘରେ ମଧ୍ୟ ତଲାସୀ ଚଳାଇଥିଲା।

ପୂର୍ବ ବର୍ଦ୍ଧମାନର ମଙ୍ଗଳକୋଟ ଥାନା ଅଧୀନ ପାଲିଶଗ୍ରାମରେ ତଲାସୀ ଅଭିଯାନ ସମୟରେ ଏନ୍ଆଇଏ ଏକ ମସଜିଦର ଇମାମଙ୍କୁ ହାଜତକୁ ନେଇଛି। ଜେଏମ୍ବି ସହ ତାଙ୍କର ସମ୍ଭାବ୍ୟ ସମ୍ପର୍କ ନେଇ ତାଙ୍କୁ ପଚରାଉଚରା କରାଯାଉଥିବା ଜଣାପଡ଼ିଛି। ସମ୍ଭାବ୍ୟ ନେଟୱର୍କ ଏବଂ ଏହା ସହ ଜଡ଼ିତ ବିଭିନ୍ନ କାର୍ଯ୍ୟକଳାପର ଦିଗକୁ ନେଇ ଏଜେନ୍ସି ତଦନ୍ତ କରୁଛି।

ତଦନ୍ତକାରୀ ଏଜେନ୍ସି ଅନୁସାରେ, ନିକଟରେ ଆସାମରୁ ଗିରଫ ହୋଇଥିବା ଜଣେ ସନ୍ଦିଗ୍ଧଙ୍କୁ ପଚରାଉଚରା କରିବା ସହ ତାଙ୍କ ଇଲେକ୍ଟ୍ରୋନିକ୍ ଉପକରଣ ଯାଞ୍ଚ କରାଯିବା ସମୟରେ ପଶ୍ଚିମବଙ୍ଗରେ ଜେଏମ୍ବିର ଏକ ସମ୍ଭାବ୍ୟ ମଡ୍ୟୁଲ୍ ସକ୍ରିୟ କରିବା ଏବଂ ସୋସିଆଲ୍ ମିଡିଆ ମାଧ୍ୟମରେ ଯୁବକମାନଙ୍କୁ ପ୍ରଭାବିତ କରିବା ସମ୍ପର୍କିତ ତଥ୍ୟ ସାମ୍ନାକୁ ଆସିଥିଲା। ଏହି ସୂଚନା ଆଧାରରେ ମଙ୍ଗଳବାର ପଶ୍ଚିମବଙ୍ଗରେ ଏହି ତଲାସୀ ଅଭିଯାନ କରାଯାଇଛି।

ତେବେ ତଲାସୀ ସମୟରେ ଏପର୍ଯ୍ୟନ୍ତ କ’ଣ କ’ଣ ଜବତ କରାଯାଇଛି, ସେନେଇ ଏନ୍ଆଇଏ ପକ୍ଷରୁ ବର୍ତ୍ତମାନ ସୁଦ୍ଧା କୌଣସି ଆଧିକାରିକ ସୂଚନା ଜାରି କରାଯାଇନାହିଁ। ମାମଲାରେ ଆଗକୁ ତଦନ୍ତ ଜାରି ରହିଛି।

ହିନ୍ଦୁସ୍ଥାନ ସମାଚାର / ସମନ୍ୱୟ