ଜୟପୁର, ୧୫ ନଭେମ୍ବର (ହି.ସ.)- ଓଡିଶା କେନ୍ଦ୍ରୀୟ ବିଶ୍ୱବିଦ୍ୟାଳୟର ସଂସ୍କୃତ ବିଭାଗ ଓ ମହର୍ଷି ସନ୍ଦୀପନି ରାଷ୍ଟ୍ରୀୟ ବେଦ ବିଦ୍ୟା ପ୍ରତିଷ୍ଠାନ, ଉଜ୍ଜୟିନୀର ମିଳିତ ଆନୁକୁଲ୍ଯରେ ତିନିଦିନିଆ ଜାତୀୟ ବୈଦିକ ସମ୍ମିଳନୀ ଆସନ୍ତା 17–19 ନଭେମ୍ବର 2025 ବିଶ୍ୱବିଦ୍ୟାଳୟ କ୍ୟାମ୍ପସରେ ଆୟୋଜିତ ହେବାର କାର୍ଯ୍ଯକ୍ରମ ରହିଛି । ସମ୍ମିଳନୀର ଉଦ୍ଘାଟନ 17 ନଭେମ୍ବରରେ ହେବ, ଯାହା ଦେଶର ବିଭିନ୍ନ ସ୍ଥାନରୁ ପ୍ରତିଷ୍ଠିତ ବୈଦିକ ଚର୍ଚ୍ଚାକାରମାନଙ୍କୁ ଏକତ୍ର କରିବାକୁ ଯାଉଥିବା ଗୁରୁତ୍ୱପୂର୍ଣ୍ଣ ଶାସ୍ତ୍ରୀୟ ଆୟୋଜନ ହେବ। ଉଦ୍ଘାଟନ ଅଧିବେଶନରେ ଅଧ୍ୟକ୍ଷତା ବିଶ୍ବବିଦ୍ୟାଳୟର ମାନନୀୟ ଭରପ୍ରାପ୍ତ କୁଳପତି ପ୍ରଫେସର ନରସିଂହ ଚରଣ ପଣ୍ଡା କରିବେ। ଏହି ସମ୍ମିଳନୀରେ ଯୋଗଦେବାକୁ ନିର୍ଦ୍ଧାରିତ ପ୍ରମୁଖ ଶିକ୍ଷାବିତ ପ୍ରଫେସର ମୁରଲୀ ମନୋହର ପାଠକ, ମାନ୍ୟନୀୟ କୁଳପତି, SLBSRSU (ମୁଖ୍ୟ ଅତିଥି ଏବଂ ମୁଖ୍ୟ ବକ୍ତା), ପ୍ରଫେସର ସତ୍ରୁଘ୍ନ ପାଣିଗ୍ରାହୀ, ମାନ୍ୟନୀୟ କୁଳପତି, ଓଡିଶା ବିଶ୍ୱବିଦ୍ୟାଳୟ (ଅତିଥି-ସମ୍ମାନିତ), ପ୍ରଫେସର ପତଞ୍ଜଳି ମିଶ୍ର, କାଶୀ ହିନ୍ଦୁ ବିଶ୍ୱବିଦ୍ୟାଳୟ (ବିଶେଷ ଵକ୍ତା) ଓ ଡ଼ଃ ରାକେଶ ଲେଙ୍କା, ଭାରପ୍ରାପ୍ତ କୁଳସଚିବ), CUO (ବିଶିଷ୍ଟ ଅତିଥି) ଭାବେ ଯୋଗଦେବାର କାର୍ଯ୍ଯକ୍ରମ ରହିଛି । ସମ୍ମିଳନୀରେ ବୈଦିକ ମନ୍ତ୍ରମାନଙ୍କ ବ୍ୟାଖ୍ୟାରେ ବେଦ ସାହିତ୍ୟର ଆଧୁନିକ ପ୍ରାସଙ୍ଗିକତା ବିଷୟରେ ଆଲୋଚନା ହେବ; ବିଶେଷ କରି ଭାଷାବିଜ୍ଞାନ, ବୈଦିକ ଆଚାର-ଅନୁଷ୍ଠାନ ଓ ଦାର୍ଶନିକ ମତାବଲମ୍ବୀ ଦୃଷ୍ଟିକୋଣରୁ ଚର୍ଚ୍ଚା ହେବ।
ଏହି ଆୟୋଜନର ସଂଯୋଜକ ଡ଼ଃ ନବୀନ କୁମାର ପ୍ରଧାନ, ଯେଉଁଠାରେ ସହ-ସଂଯୋଜକ ଡ଼ଃ ସଞ୍ଜିବ ସର୍କାର ଓ ବିଭାଗର ଅନ୍ୟାନ୍ୟ ଶିକ୍ଷକମାନେ ଡ଼ଃ ଦେବାଶିଷ କର୍ମକାର, ଡ଼ଃ ବୀରେନ୍ଦ୍ର କୁମାର ସାଦାଙ୍ଗୀ, ଡ଼ଃ ସ୍ରୋତସ୍ୱିନୀ ରାଉତ ଓ ଶ୍ରୀ ସରୋଜ ଦାସ—ସହଯୋଗ କରୁଛନ୍ତି। ବିଭାଗ ପକ୍ଷରୁ ଦେଶର ସମସ୍ତ ଶିକ୍ଷାବିଦ, ଗବେଷକ ଓ ଛାତ୍ରଛାତ୍ରୀଙ୍କୁ ଏହି ଜାତୀୟ ଶାସ୍ତ୍ରୀୟ ମଞ୍ଚରେ ଯୋଗଦେବାକୁ ଆହ୍ୱାନ ଜଣାଯାଇଛି ବୋଲି ବିଶ୍ବବିଦ୍ୟାଳୟର ଲୋକସମ୍ପର୍କ ଅଧିକାରୀ ଡ଼ଃ ଫଗୁନାଥ ଭୋଇ ଜଣାଇଛନ୍ତି ।
ହିନ୍ଦୁସ୍ଥାନ ସମାଚାର / ପିକେପି
